Přednošuje wo Brazilskej
Chrósćicy. Wo swojim přebytku w brazilskim pralěsu, wo zetkanju z Indianami a dalšimi zajimawymi ludźimi rozprawja jutře, sobotu, w 19.45 hodź. Pětr Rab w Chróšćanskej putniskej hospodźe. Stajnje při sebi měješe Kukowčan swoju kameru, z kotrejž je fantastiske motiwy zapopadnył. Turistiska ekspedicija wjedźeše jeho něhdźe 3 000 km po Brazilskej.
Sceniske wodźenje po muzeju
Budyšin. Njedźelu, 25. februara, poskići Budyski Serbski muzej dalše rjane dožiwjenje. W zwisku z wustajeńcu „Krabat – Muž – Mytos – Marka“ wotměja tam mjeztym třeće sceniske wodźenje po přehladce. Krabat, pisar a Čorny młynk chcedźa hosći po wosebitej přehladce wo chorwatskim wyšku wodźić. Jako Krabata dožiwja zajimcy Wolfganga Krausa, jako pisarja genealogu Hansa-Jürgena Schrötera a jako Čorneho młynka Dietera Klimeka. Wodźenje započnje so w 15 hodź. a traje něhdźe hodźinu.
Rjad wuměłskich rozmołwow
Hižo dźěćom pjekarstwo zbližić
Ćěkancy trjebaja wjac zwiskow
Wojerecy (AK/SN). Zetkawanski kofej towarstwa „Wojerecy pomhaja z wutrobu“ a iniciatiwy „Sylnić aktiwnych w dźěle z ćěkancami“ (samo.fa) wjedu ćěkancow a Němcow hromadźe. To ma dale a wjac Wojerowčanow za spomóžne.
Tójšto rěčow je na žurli młodźinskeho kluba „Ossi“ słyšeć. Prawidłownje přichadźeja tam Syričenjo, Irakčenjo, Libanonjenjo, Eritrejčenjo, Němcy a dalši na zetkawanski kofej. Tak tež minjenu srjedu. „Přińdźemy, dokelž trjebamy zwiski. Jenož tak němčinu derje nawuknjemy. Jeničce wučba w šuli njedosaha“, měnitaj Gamela Ebey a jeje mandźelski Mustafa Omar ze syriskeho Kobanê. Ze swojimi dźěćimi Aziz, Hivi, Mohamadom a Hesu bydlitaj wonaj hižo dwě lěće we Wojerecach, lěto maja swójske bydlenje. Na srjedownym zarjadowanju woni kulturny program kedźbliwje sćěhuja. Dźěći ćěkancow rejuja a spěwaja. „Předewšěm na zetkawanskim kofeju tworja so kmótřistwa a přećelstwa. My skićimy jenož móžnosće za to“, podšmórnje koordinatorka wobydlerskeho zwjazka „Wojerecy pomhaja z wutrobu“ Birgit Radeck.
Dobre nazhonjenja dale dawać
Njebjelčicy (JK/SN). Dobre nazhonjenja, zachować a wobstajnje polěpšeć žiwjenske wuměnjenja na wsy, chce a smě Njebjelčanska gmejna tež dalšim komunam w Sakskej posrědkować. Na wčerawšim posedźenju gmejnskeje rady informowaše wjesnjanosta Tomaš Čornak (CDU) wo tym, zo wobdźěli so w naležnosćach wuwića gmejnow mjez druhim na wuradźowanju zwjazka dožiwjenskich wsow lětsa w Rodewischu. Tam budźe přednošować wo wuwićowym koncepće gmejny kaž tež wo dotal dobrych nazhonjenjach, dźeń a bóle so wusměrjeć na přijomne a přichodakmane žiwjenje na wsy.
Słónčne, přiwšěm zymske wjedro, wodnjo z temperaturami wokoło ...
Krótkopowěsće (23.02.18)
Wotewru kofejownju
Wojerecy. Čitać a čitacym připosłuchać maja we Wojerecach za wažne. Hród a měšćanski muzej zarjadujetej nětko tuž tak mjenowanu „Čitansku kofejownju“. Nošerstwo za projekt přewzała je Towaršnosć za domiznowědu Wojerec – muzejowe towarstwo. Jako prěni čitać a powědać budźe we wobłuku swjedźenja k 750ćinam města wjelelětny nawoda muzeja a załožer zwěrjenca Günter Peters.
Powjetša zwjazkarstwo
Żagań/Mužakow. Němsko-pólske parkowe zwjazkarstwo w hraničnych kónčinach so jasnje powjetši. Kaž w zdźělence załožby Mužakowskeho Parka wjercha Pücklera rěka, přistupi lěta 2010 wutworjenemu zwjazkej jutře pjeć dalšich zelenišćow w Pólskej, Sakskej a Braniborskej, mjez nimi tež Njeswačanski park. Z rozšěrjenjom zwjazkarstwa chcedźa hišće wjac turistow přiwabić.
Wustajeńca NDRskeho designa
Wulkowoheń hašeć dyrbjeli
Policija (22.02.18)
Pytaneju paduchow zajeli
Kamjenc. Policija móžeše tele dny w Kamjencu dweju paduchow na městnje njeskutka zajeć. Mužej w starobje 37 a 46 lět běštaj so wutoru krótko po połnocy na ležownosć firmy na přemysłowej přestrjeni při Wolacej hórce w Bambruchu zadobyłoj. Tam chcyštaj po wšěm zdaću kolesa a dźěle awtow spakosćić. Kedźbliwy wobydler pak zawoła policiju. Jako paduchaj policajske awto pytnyštaj, spytaštaj ze swojim awtom ćeknyć. Zastojnicy pak jeju njedaloko městna njeskutka zadźeržachu a zajachu. Při kontroli personalijow zwěsćichu, zo běchu skućićelow hižo dalšich padustwow dla pytali. W awće namakachu rubiznu, kotruž móžachu njeskutkej w Hessenskej přirjadować.
Simson pokradnyli
Mužakow. Mopedy marki Simson z NDRskeje produkcije w Suhlu su chětro požadane, a to, kaž wupada, tež mjez paduchami. Hakle njedawno běchu njeznaći tajki w Mužakowje na Jabłońskej dróze pokradnyli. Kaž policija dźensa zdźěli, su paduši jeničce prědnje koleso mopeda ze zamkom stejo wostajili, wšo dalše pak sobu wzali. Policija nětko přepytuje.
Nadróžne twarnišća wotpočuja
Budyšin (SN/mwe). Mnohe wokrjesne dróhi Budyskeho wokrjesa su a wostanu tež w přichodnych tydźenjach twarnišćo. Tole wuchadźa z najnowšeho wozjewjenja krajnoradneho zarjada wo wobchadnych wobmjezowanjach, zawčerawšim aktualizowanych. Na mnohich dróhach, kaž mjez Prěčecami a Błohašecami, mjez Kamjenej a Stróžu pola Rakec a w Hodźiju na Drježdźanskej dróze, tuchwilu njedźěłaja, dokelž je tam hač do 28. februara zymska přestawka. Wobchadne wobmjezowanja tuž na to pokazuja, zo na twarnišćach měr knježi, dołhož su temperatury a spadki „zymske“.
Na naprašowanje SN nowinski rěčnik Budyskeho krajnoradneho zarjada Gernot Schweitzer zdźěli: „Wokomiknje je zaso zymniše wjedro připowědźene. Tohodla so twarske dźěła dale dlija. Při minusowych temperaturach ze sněhom žana twarska firma z dróhotwarom njezapočnje.“
Wobora ma noweho nawodu
Gmejna Radwor Rüdigerej Schmidtej zamołwitosć přepodała
Radwor (CS/SN). Radworscy gmejnscy radźićeljo su wutoru na swojim zjawnym posedźenju Rüdigera Schmidta za noweho gmejnskeho nawodu dobrowólneje wohnjoweje wobory wobkrućili. Dwaj so hłosa wzdaštaj. Po wólbach přepoda wjesnjanosta Wincenc Baberška (CDU) Łupjanej powołanske wopismo. Runje tajke dósta Sandro Jentsch z Chelna, kotrehož su za zastupowaceho gmejnskeho wohnjowoborneho nawodu powołali. Kameradojo pak njemóžachu jeho na hłownej zhromadźiznje dobrowólneje wohnjoweje wobory w Radworju 21. januara oficialnje wuzwolić, dokelž nima hišće trěbnu kwalifikaciju. Jentsch chce ju w meji na kursu wohnjowoborneje šule w Narću nachwatać. We wothłosowanju z wokrjesnym wohnjowym mištrom Mafredom Pethranom je hižo wo to postarane, zo jemu městno na dalekubłanju za wodźace funkcije na mjenowanym kubłanišću přewostaja. Rüdigera Schmidta běchu 26. januara z 53 přihłosowanjemi a dwanaće napřećiwnymi hłosami za noweho gmejnskeho wohnjowoborneho nawodu wuzwolili.
