Krótkopowěsće (16.01.18)
Serbska rada stejišćo zapodała
Drježdźany. W Sakskim krajnym sejmje su wčera prěnje słyšenje wo nowym kulturnorumowym zakonju přewjedli. Zapósłancam předležeštej namjetaj knježaceje koalicije CDU a SPD kaž tež Lěwicy. Stejišćo k tomu zapodała je tohorunja Rada za serbske naležnosće Sakskeje. Rada so za to wupraja dotalne rjadowanja wobchować, kaž jeje předsydka Marja Michałkowa SN zdźěli.
„Alternatiwne fakty“ su njesłowo
Darmstadt. „Njesłowo lěta 2017“ rěka „alternatiwne fakty“. Tole je njewotwisna jury dźensa w Darmstadće wozjewiła. Zapřijeće je „zamylacy wuraz za pospyt, wopačne twjerdźenja jako legitimny srědk zjawneho rozestajenja legalizować“, rěka we wopodstanjenju. Šěsćwosobowa komisija bě njesłowo lěta ze 684 wšelakich namjetow wuzwoliła.
Wiki za přichodnu generaciju
Natwarjacy kurs serbšćiny
Budyšin. Wot 5. februara hač do 11. junija 2018 wotměje so w Budyšinje natwarjacy kurs serbšćiny. Wučba je stajnje póndźelu wot 18 hodź. do 19.30 hodź. w Serbskej zakładnej šuli na Friedricha Listowej 8. Přizjewjenja přijimuje Rěčny centrum WITAJ pod telefonowym čisłom 03591/ 550400 abo e-mejlnje pod .
Radźićeljo so zetkaja
Slepo. Wjacore losy za twarske dźěła při nastawacym němsko-serbskim šulskim centrumje chcedźa čłonojo Slepjanskeje gmejnskeje rady na swojim posedźenju jutře, wutoru, w 19 hodź. w tamnišim Serbskim kulturnym centrumje rozdawać. Mjez druhim póńdźe wo wokna, wonkowne durje, škit před słóncom, róštotwar a fasadu. Wo nutřkownym wuhotowanju šulskeho twarjenja chcedźa tohorunja wuradźować.
Zymska zelenina w srjedźišću
Wojerecy. Kak móžeš zymsku zeleninu w kuchni wužiwać, kak strowa wona je a kotre jědźe móžeš z njej přihotować, to budźe tema přichodneho zarjadowanja za seniorow na Wojerowskej dźěćacej a młodźinskej farmje. Wone budźe štwórtk, 18. januara, wot 10 do 12.30 hodź. Zajimcy su witani.
Najebać hnojenje měd tež dźensa strowy
Chrósćicy (SN/MWj). Město putniskeje, literarneje abo hudźbneje steješe přirodowědna tema minjeny pjatk na programje we wobłuku sedmeje kulturneje zymy w Chróšćanskej putniskej hospodźe. Tam witaše Monika Gerdesowa Konječanskeho pčołarja Jana Šołtu. 15 zajimcam wón wo swojim wjelelětnym dźěle jako pčołar powědaše. Z kelko česćownosću so tomu wěnuje, wo tym swědčeše hnydom spočatnje jeho wuprajenje, zo je pčołka jeničke skoćatko, kiž njeslaknje, ale wumrěje. Zo je Jan Šołta z pčołarstwom wusko zwjazany, bě tohorunja z toho wusłyšeć, kelko lědma znatych serbskich wobrotow wón w tym zwisku znaje. Te wužiwaše Konječan wězo tež za wjacore nastroje pčołarja, kotrež bě sobu přinjesł.
W srjedźišću wječora pak steješe film, kotryž běchu před wosom lětami šulerjo Ralbičanskeje serbskeje wyšeje šule we wobłuku cyłodnjowskeho poskitka z pomocu SAEK nawjerćeli. W nim předstajene su najwšelakoriše dźěła, kotrež ma pčołar w běhu lěta wobstarać, započejo z wurjedźenjom kołćow po zymje přez wobstajnu kontrolu płastow hač k žnjam a přihotam na přichodnu zymu.
Policija (15.01.18)
Tragiski wukónc nurjenja
Brězowka. Při nurjenju w Brězowskim jězoru sta so sobotu popołdnju njezbožo. Třo mužojo w starobje 55, 59 a 77 lět podachu so tam zhromadnje pod wodu. Jako najmłódši z nich nadobo hižo blisko tamneju njebě, wonaj za nim pytaštaj a we hłubokosći šěsć metrow namakaštaj. Wućahnywši jeho z wody so nurjakomaj kaž tež přiwołanej lěkarce poradźi muža wožiwić, tak zo dowjezechu znjezboženeho do chorownje. Tam pak wón we wječornych hodźinach zemrě.
Wulki zajim za čaporowe wiki
Krótkopowěsće (15.01.18)
Wustajeńca zaso přistupna
Budyšin. Aktualna wustajeńca Ludmiły Bizoldoweje w Budyskej Serbskej kulturnej informaciji „Kak přińdźech za čas wuměnka k molowanju“ je wot dźensnišeho zaso přistupna. Kaž direktor Załožby za serbski lud Jan Budar zdźěli, je SKI swoju inwenturu dwaj dnjej prjedy hač planowane dokónčiła a je tuž nětko zaso wočinjena. SKI je wot póndźele do pjatka wot 10 do 16.30 hodź. wotewrjena.
Znowa mjez najlěpšimi
Stuttgart. Hornjołužiska hórska šćežka słuša znowa k najlěpšim pućowanskim šćežkam Němskeje. Kónc tydźenja su ju w Stuttgarće z wosebitym mytom za kwalitu počesćili. Po lěće 2015 je to druhe tajke wuznamjenjenje. Hornjołužiska hórska šćežka wjedźe po šěsć etapach wjac hač 107 kilometrow wot Wjazońcy hač do Žitawy, mjez druhim tež přez dwurěčne wsy z tykowanymi domami.
Wučerjow nabožiny wuzběhnył
Policija (12.01.18)
Njezbožo strowotneho problema dla
Jitk. Njekedźbliwosć abo přewulka spěšnosć njeběštej zawčerawšim po připołdnju přičina wobchadneho njezboža, kotrež sta so na kromje Jitka: 79lětny wodźer Golfa bě tam w prawej křiwicy na lěwym boku jězdnje frontalnje do štoma zrazył. Kaž Zhorjelska policajska direkcija zdźěli, bě šofer do toho tak mjenowany cokorowy šok poćerpjeł. Wón kaž tež jeho 77lětna sobujěduca so při zražce zraništaj, a wobeju dowjezechu do chorownje, hdźež jeju lěkarsce zastarachu. Kaž w zdźělence policije dale rěka, nětko přepytuja, hač bě muž snano lochkomyslnje jednał. Na wosobowym awće nasta něhdźe 6 000 eurow škody. Dokelž njebě hižo kmane dale jěć, dyrbjachu je wotwlec.
Gmejna zastupjena
Tež Dźěwinskaj radźićelej w dźěłowej skupinje
Dźěwin (AK/SN). W dźěłowej skupinje „Škit před imisiju“ staj nětko tež čłonaj Dźěwinskeje gmejnskeje rady zastupjenaj. Tole je tamniši parlament na swojim wčerawšim posedźenju jednohłósnje schwalił. Dźěłowa skupina rozestaja so w Slepjanskej wosadźe z wulkimi poćeženjemi přez proch a haru Wochožanskeje brunicoweje jamy dla. Dotal wobsteješe wona ze zastupjerjow Trjebinskeje a Slepjanskeje gmejny kaž tež LEAG. Z wčerawšim rozsudom Dźěwinskeje gmejny delegowachu do skupiny gmejnskeho radźićela Jensa Hanuscha z Brězowki a jako jeho zastupjerja radźićela Olivera Peta, tohorunja z Brězowki.
Kaž wjesnjanosta Helmut Krawc (SPD) rjekny, běchu sej w zašłej rozmołwje z LEAG žadali, zo je tež Dźěwinska gmejna zastupjena. „Škit před imisiju trjebamy runje tak tule na městnje, předewšěm w Brězowce. Tohodla je derje, zo smy w dźěłowej skupinje zapřijeći.“
Wo dźiwich pčołkach
Budyšin. Pod hesłom „Wohrožena mnohotnosć – naše dźiwje pčołki a jich škit“ přednošuje dr. Andreas Scholz jutře, sobotu, w 15 hodź. w Budyskim měšćanskim muzeju. W Sakskej je něhdźe 400 najwšelakorišich družin dźiwich pčołkow. Přednošk skići dohlad do jich mnohotnosće, do jich žiwjenskich wašnjow a podawa tohorunja pokiwy zajimowanym zahrodkarjam.
Sprjewine město za čas NDR
Budyšin. Z hosćom w rjedźe „Łužiske literarne dopołdnjo“ njedźelu, 14. januara, w 11 hodź. w Budyskim Dźiwadle na hrodźe budźe Drježdźanski awtor Dietmar Sehn. Wón je swoje dźěćatstwo blisko Budyšina přežiwił a na Lipšćanskim literarnym instituće studował. Loni je jeho kniha „Wěš hišće? – stawizny z Budyskeho wšědneho dnja NDR“ wušła. W njej wopisuje wón mjez druhim nakup w bywšim Domje mody na Naměsće Čerwjeneje armeje, rozdźělne bydlenske poměry, wopyty w hosćencach a wuchodźowanja po měsće. Wopytowarjo podadźa so na časowu jězbu do Budyskeje zańdźenosće.
Předawaja lisćiki
Ralbičanscy šulerjo pomhali
Z pjenježnym darom 205 eurow su wotchadnicy Ralbičanskeje wyšeje šule pomocny projekt w afriskim Malawiju podpěrali a mi přepodali. Tele pjenjezy wužiwam za dweju mótkow, dwójnikow Andrewa a Alexandera Mitaye ze wsy Madisi, kotrajž běštaj w mojim 5. lětniku šulskeho lěta 2012/2013, jako sym sama we wobłuku pomocneho projekta na šuli St. Francis dźěłała a jeju wuwučowała. Wot toho časa jeju podpěruju. Dokelž mataj jenož hišće mać, jimaj tež wyšu šulu z pjenjezami spěchuju. Wobaj staj mudraj hólcaj, čehoždla so nadźijam, zo z dobrymi znamkami za swój lěpši přichod dźěłataj. Wudawki za šulu w Malawiju su so lětsa zaso podróšili, tak zo wučinjeja wone nětko na wosobu lětnje 270 eurow. Z wutroby so wjeselu, zo mi lońši Ralbičanscy wotchadnicy pomhaja, dźěl šulskich pjenjez za woneju hólcow zwjesć.
