Policija (03.08.17)
Z třomi promilemi za wodźidłom
Kamjenc. Zastojnicy Kamjenskeho policajskeho rewěra su so wutoru wječor njemało dźiwali, kontrolujo 42lětneho šofera BMWja na Christiana Weißmantelowej. Měrjenski nastroj jim pokazowaše, zo ma muž tři promile alkohola w kreji. Při tym bě samo hišće awto wodźił. To pak nětko dlěši čas wjac njebudźe, dokelž jemu zastojnicy nablaku jězbnu dowolnosć sćazachu. Nimo toho leži pad jako njeskutk na blidźe Zhorjelskeho statneho rěčnistwa.
79lětna do Opela zajěła
Nowe Město. Na Sprjejčanskim puću w Nowym Měsće je wutoru připołdnju 79lětna ze swojim Huyndaijom do parkowaceho Opela zajěła. Při tym so njekedźbliwa šoferka lochko zrani. Wěcna škoda wučinja něhdźe 7 000 eurow.
Sydom zranjenych při njezbožach
Zhorjelc. We wobłuku Zhorjelskeje policajskeje direkcije, kotrejž nimo wobłuka awtodróhi A 4 šěsć policajskich rewěrow přisłuša, registrowachu wčera 59 wobchadnych njezbožow. Sydom wosobow je so zraniło.
Město kupjele kulturne srjedźišćo
Połčas w sotrowni
Mały Wjelkow (SN). Přewšo raduja so ludźo, a to nic jeno z Hornjeje Łužicy, nad pisanym kulturnym lěćom w Małowjelkowskej sotrowni. „Třinaće derje wopytanych zarjadowanjow z hudźbu a reju smy hižo wotměli. Ze stilistiskej a wobsahowej mnohostronskosću zbudźichmy tójšto wjesela“, praji hłowny organizator Mike Salomon. Hač do 10. septembra planuja w Małym Wjelkowje hišće 15 zarjadowanjow.
Prěnju stwu sej wobhladać
Kamjenc (SN). W nowym Kamjenskim centrumje seniorow AZURIT z nutřkownymi dźěłami zaměrnje pokročuja. Dom chcedźa spočatk septembra wotewrěć. Zajimcy móža sej hižo prěnju mustrowu stwu wobhladać. Přichodnje chcedźa seniorow w hladanskim srjedźišću w 94 stwach z jednym a jědnaće z dwěmaj łožomaj zaměstnić. Dalokož móžno budu sej tež swójske meble sobu přiwjezć móc. Wšitkim ma so tam přijomne bydlenje w swójbnej atmosferje zmóžnić.
Zapósłancaj na lětnjej turje
Worklecy/Kozarcy/Wěteńca (aha/SN). Wot lěta 2009 podawataj so zapósłancaj Sakskeho krajneho sejma Alojs Mikławšk a Marko Šiman (wobaj CDU) z kolesom po swojimaj wólbnymaj wokrjesomaj 52 a 53. Wčera po Božej mši w Radworju nastajištaj so wonaj k někotrym předewzaćelam Wulkodubrawskeje gmejny a po tym na swojej něhdźe 60 kilometrow dołhej turje do Worklec, hdźež witaše jeju kaž tež kandidata za nowy zwjazkowy sejm Rolanda Ermera a wjesnjanostu Franca Bruska (wobaj CDU) pjekarski mišter Michael Šlapa.
Prěnjotny zaměr bě, zhonić wo starosćach a wuwićowych tendencach rjemjeslniskich zawodow a pytać móžnosće, kak hodźa so problemy ručišo rozrisać. Michael Šlapa předstaji swoju pjekarnju, kotruž wot lěta 1996 wjedźe, a móže na dobru bilancu zhladować. Tuchwilu ma z mandźelskej wosom přistajenych. Mjeztym wudźeržuje tež filialu w Kamjencu. Wšědnje pjeku we Worklecach něhdźe 1 500 całtow, sobotu štyri razy telko. Lětny wobrot wučinja něhdźe 400 000 eurow. Šlapa skedźbni na wulku běrokratiju nastupajo zličbowanje. Roland Ermer, sam pjekar w Njedźichowje, hódnoćeše, zo ma pjekarnja na wsy přichod.
Ma wobšěrnu zběrku lampow
Kaž w dowolowym času z wašnjom, tež lětsa na tymle městnje stajnje wutoru a štwórtk wosebitu seriju wozjewjamy. W njej předstajamy wosobiny, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Zboka puća Při Zmijowej horje w Běłym Chołmcu napadnje ći statok z jara rjenje zapołoženej a hladanej zahrodu. Nimo toho je tam bydlacy 74lětny Siegfried Bleža w swojej dwójnej garaži zarjadował wustajeńcu z njeličomnymi eksponatami, kotrež njepokazuja jenož na wuwiće žehlawkow, kaž je dźensa wužiwamy. Wobšěrna zběrka wopřijima tež wobswětlenje a wulku paletu přewšo zajimaweje techniki, kotraž zaruča wěstotu na dróze, na železniskich kolijach kaž tež na wodźe a w brunicowych jamach.
Budyski Kamjentny dom přeproša kóždu srjedu w awgusće na lětnje ...
Serbske sroki w němskej receptowej knize
Budyšin (SN/BŠe). W Budyskej pěstowarni „Kraj pjerachow“ Dźěłaćerskeho dobroćelstwa maja wot awgusta 2001 Witaj-skupinu. A koncept sej starši, kotřiž bydla w měšćanskej štwórći Strowotna studnja, jara waža. „Tuchwilu mam 17 dźěći w skupinje, a dalše přizjewjenja předleža“, praji kubłarka Stefanie Šramina. Lětsa rozžohnuje wona štyri dźěći do šule, kotrež stanu so přichodnu póndźelu z chowancami Serbskeho šulskeho a zetkawanskeho centruma Budyšin. „Při přizjewjenju dźěsća za Witaj-skupinu dźiwamy na to, zo starši serbšćinu tež po pěstowarskim času dale spěchuja“, kubłarka wuzběhnje.
Rozsudźa-li so starši za model Witaj, zeznawaja so jich dźěći nimo rěče tež z kulturu a tradicijemi Serbow. Kóžde lěto wuhotuje skupina na přikład mejemjetanje a spěwa samozrozumliwje serbske pěsnički. „Štyri dźěći skupiny su ruskeho pochada, tamne su němske bjez serbskich korjenjow“, Radworčanka rozłožuje. Zajim někotrych staršich za serbstwo ju stajnje zaso překwapja.
Westernske jěchanje wuskutkuje měr a wěstosć (6)
Woměrje, stajnje woměrje rěka kredo, podaš-li so na Helmec burski statok Dubjany dwór (Eichhof) w Jitku. Tónle měr nimaja jenož konje w kreji, cyła wokolina wuprudźa wodychnjenje. „To je bjez dźiwa, wšako lubuja na westernske jěchanje specializowane konje měr. Njejsu to zwěrjata, kotrež so wotsamo wjele hibaja“, měni Kornelia Helm. Na tamnym boku brunače dokładnje wědźa, hdy su jich kwality trěbne, na přikład, hdyž maja howjada hromadu wjesć. Runje dźensa chce tole konjaca hospodarska mišterka a trenarka B ze swojimi konjemi trenować. Před rohami maćernych kruwow dźě maja wone wulki respekt. Z treningom so konje, howjada a čłowjek na so zwuča. „Westernske jěchanje njeje w našich kónčinach jara rozšěrjene. Tu faworizuja ludźo skerje klasiske jěchanje“, praji 41lětna mějićelka Dubjaneho dwora. Mjeztym pak su sej mnozy wotkryli přijomnu sportowu družinu a waža sej wurunanosć konjow. Dźěći, wosebje holcy, wědźa wo jich dobrodušnosći. Měrna ruka trenarki a wobswět skludźatej někotružkuli temperamentnišu krej.
Krótkopowěsće (02.08.17)
Serb mjez kandidatami
Choćebuz/Berlin. K wólbam zwjazkoweho sejma nastupi w Braniborskej lětsa tež Serb. We wólbnym wokrjesu 64 kandiduje Torsten Mak za Die Partei, kaž z krajneje lisćiny strony wuchadźa. Wona ma so za stronu za dźěło, prawniski stat, škit zwěrjatow, spěchowanja elity a bazoweje demokratije. Torsten Mak je bywši wučer Delnjoserbskeho gymnazija a předsyda Rady za serbske naležnosće Braniborskeje.
Přepytuja přećiwo policistam
Budyšin. Po nowych rozestajenjach mjez domoródnymi młodostnymi a požadarjemi azyla wosrjedź Budyšina přepytuja tež přećiwo policistam. Jim wumjetuja w interneće ranjenja a namócnosće, k čemuž je tam wotpowědny widejo wozjewjeny. Zhorjelska policajska direkcija chce k wujasnjenju wšitkich wobdźělenych słyšeć.
Srědki za wutwar interneta
