Worklecy/Kozarcy/Wěteńca (aha/SN). Wot lěta 2009 podawataj so zapósłancaj Sakskeho krajneho sejma Alojs Mikławšk a Marko Šiman (wobaj CDU) z kolesom po swojimaj wólbnymaj wokrjesomaj 52 a 53. Wčera po Božej mši w Radworju nastajištaj so wonaj k někotrym předewzaćelam Wulkodubrawskeje gmejny a po tym na swojej něhdźe 60 kilometrow dołhej turje do Worklec, hdźež witaše jeju kaž tež kandidata za nowy zwjazkowy sejm Rolanda Ermera a wjesnjanostu Franca Bruska (wobaj CDU) pjekarski mišter Michael Šlapa.

Prěnjotny zaměr bě, zhonić wo starosćach a wuwićowych tendencach rjemjeslniskich zawodow a pytać móžnosće, kak hodźa so problemy ručišo rozrisać. Michael Šlapa předstaji swoju pjekarnju, kotruž wot lěta 1996 wjedźe, a móže na dobru bilancu zhladować. Tuchwilu ma z mandźelskej wosom přistajenych. Mjeztym wudźeržuje tež filialu w Kamjencu. Wšědnje pjeku we Worklecach něhdźe 1 500 całtow, sobotu štyri razy telko. Lětny wobrot wučinja něhdźe 400 000 eurow. Šlapa skedźbni na wulku běrokratiju nastupajo zličbowanje. Roland Ermer, sam pjekar w Njedźichowje, hódnoćeše, zo ma pjekarnja na wsy přichod.