Prěni raz zhromadnje do noweho lěta pućowali
Na najwšelakoriše wašnje su zawčerawšim w dwurěčnej Łužicy nowe lěto witali. Nowosć dožiwichu w Bóščanskej gmejnje. Tam zetkachu so wobydlerjo prěni raz k hwězdnemu pućowanju.
Bóšicy (SN/MWj). Na wšěch 180 wobydlerjow Bóščanskeje gmejny je so prěni dźeń noweho lěta na hwězdnym pućowanju wobdźěliło. Ideju za prěnje zarjadowanje tajkeho razu měješe wjesnjanosta Stanij Ryćer (Rjemjesło Bóšicy). „Mysličku za to sym raz w někajkej bjezsparnej nocy zrodźił“, wón Serbskim Nowinam přeradźi. Doniž pak tak daloko njebě, měješe wón tójšto přihotow na starosći. Tak wumysli sej štyri čary, kotrež wjedźechu z Bóšic, Wětrowa, Jaseńcy a Hory do Bóšic. Nimo toho bě za kóždeho wobdźělnika wosebitu značku zhotowić dał. „Myslach sej, zo by rjenje było, by-li znajmjeńša 50 ludźi přišło. Hač do sto wšak móhło jich tež być. Zo je na kóncu 180 wobydlerjow přišło, je mje wězo zwjeseliło, ličił pak z telko zajimcami njejsym“, hłowny organizator powěda.
Policija (03.01.18)
Awtomat rozbuchnyli
Mały Wjelkow. Silwesterske praskotaki njejsu Nowe lěto w Małym Wjelkowje jenož k zawjeselenju wužiwali. Tam běchu zawčerawšim něhdźe w 6 hodź. cigaretowy awtomat rozbuchnyli a za to po wšěm zdaću pyrotechniske wudźěłki wužiwali. Hač su njeznaći cigarety abo pjenjezy spakosćili, njeje znate. Škoda wučinja něhdźe 3 000 eurow.
Na lětny swjedźeń
Sulšecy. Kulowske towarstwo Bratrowstwo wuhotuje sobotu, 6. januara, w 19 hodź. swój lětny swjedźeń w Sulšečanskim kulturnym domje. Tam wospjetuje Radworski chór Meja swój hodowny koncert. Po tym móža sej wopytowarjo zhromadnje zarejwać. K rejam zahraje Gunter Schulze z Kamjenca. Wšitcy su wutrobnje přeprošeni.
Za akademiju so přizjewić
Budyšin. We wobłuku lětušeho Łužiskeho hudźbneho lěća wotměje so znowa chórowa akademija. Za nju móža so zajimcy hač do kónca januara w Budyskim měšćanskim zarjadnistwje přizjewić. Akademija pod nawodom Friedemanna Böhmy steji pod hesłom „Salve Regina“. Wobdźělnicy nazwučuja marijanske kěrluše z wjacorych dobow. Zakónčacy koncert budźe 4. awgusta w klóšterskej cyrkwi w Pančicach-Kukowje.
Za pjeć lět tójšto mjenje dołha
Kulow (AK/SN). Wopłóčkowy zawod města Kulowa swój dołh dale pomjeńša. Tole podšmórny komornik Thomas Woelke na zašłym posedźenju měšćanskeje rady. Hospodarski plan 2018 su radźićeljo jednohłósnje wobzamknyli. „W lěće 2016 měješe wopłóčkowy zawod hišće 2,761 milionow eurow dołha. W lěće 2021 budźe to milion. W běhu pjeć lět potajkim 1,7 milionow eurow wotpłaćimy, štož je nahladny wukon“, praji Thomas Woelke. Tak wostanje zawod jednanjakmany.
Wuslědk wjetši hač planowany
W Budyskim měšćanskim lěsu chcedźa wapno sypać a puć twarić
Budyšin (CK/SN). Z předanje drjewa chce město Budyšin w lěće 2018 dohromady 406 000 eurow dochodow docpěć. W měšćanskim lěsu ma so 7 468 kósnych metrow štomow podrězać, z toho 4 159 kósnych metrow za rězaki. Tole wuchadźa z hospodarskeho plana za komunalny lěs, kotryž je měšćanska rada na swojim zašłym posedźenju jednohłósnje wobzamknyła. Nimale 30 000 eurow wudadźa za zawěsćenje pućow přez měšćanski lěs a 25 000 eurow za znowazalěsnjenje na płoninje 4,5 hektarow.
Cyłkowne dochody wučinjeja 1,1 milion eurow, wudawki 1,2 milionaj eurow. Z deficitom 104 000 eurow planuje město prěni raz negatiwny hospodarski wuslědk. Přičina toho je wutwar jara špatneho puća wot Wuježka hač k parkowanišću pod Čornobohom, kotryž wužiwaja za transport drjewa. Za to nadźija so město Budyšin spěchowanskich srědkow. Z cyłkowneje inwesticije 896 000 eurow by komuna potom 17 procentow swójskeho podźěla płaćić dyrbjała. Hač pak móža lětsa woprawdźe twarić, njewotwisuje jenož wot financow. Hišće njepředleži žana dowolnosć přirodoškita.
Prěnje dny kóždeho noweho lěta steji we wobchodach ...
Přewjedu zaso hwězdny pochod
Krótkopowěsće (03.01.18)
Milina tuńša
Kamjenica. Energijowy zastaraćel enviaM je płaćiznu za milinu znižił. Kaž koncern wčera zdźěli, płaći wot spočatka lěta kilowattowa hodźina něhdźe cent mjenje hač loni. Nimale 750 000 priwatnych a přemysłowych kupcow ma z toho dobytk. Móžne zniženje bě, dokelž wudawa enviaM mjenje pjenjez za wužiwanje milinowych syćow a ma tež mjenje dawkow a wotedawkow.
Mało dowěry
Berlin. Ludźo na wuchodźe Němskeje medijam a cyrkwjam mało dowěrjeja. To wujewja Forsa-woprašowanje. Jeno 16 procentow ludźi na wuchodźe dowěrja telewiziji, na zapadźe 30 procentow; 27 proc. wěri nowinam, na zapadźe 43 proc.; a 41 proc. wěri radiju, na zapadźe 59 proc. Na wuchodźe dowěrja jeno 13 proc. ludźi katolskej a 34 proc. ewangelskej cyrkwi, na zapadźe 30 a 50 proc.
Podrězaja štomy
Kak móža poprjancy žiwjenje wuchować?
Slepo (SN). Z telewizije MDR znaty domjacy lěkar dr. Carsten Lekutat budźe 17. februara 2018 ze swojej jewišćowej show z hosćom w Slepjanskim Serbskim kulturnym centrumje. Tam póńdźe mjez druhim wo to, kak móžeš z poprjancami fit a strowy wostać.
Dr. Lekutat njeje jeno sam z poprjancami 20 kilogramow nadwahi wotbył, ale wužiwa poprjancy tež za lěkowanje swojich pacientow. Kak to funguje, zhonja wopytowarjo w Slepom, hdźež předstaji wón stawiznički ze swojeje lěkarskeje praksy a přeradźi triki, kotrež woprawdźe funguja. Wšo to garněruje z tójšto žortom. Na te wašnje móže publikum takrjec za kulisy lěkarskeje praksy pohladać, při čimž njeje ničo wumyslene, ale ryzy wěrnosć. Carsten Lekutat mjenuje tule formu zabawy meditainment. „Wuspěch njeje to, kak často so publikum směje, ale kelko dopóznaćow wo strowym zežiwjenju sej wopytowar sobu domoj bjerje a je we wšědnym žiwjenju wužiwa.“
Zastupne lisćiki móža sej zajimcy hižo w Serbskim kulturnym centrumje skazać. Wotewrjeny je tón wot wutory do pjatka stajnje wot 10 do 17 hodź. a njedźelu wot 13 do 17 hodź.
