Zetkaja so při jubilejnym koliku

štwórtk, 05. julija 2018
artikl hódnoćić
(0 )

Chrósćicy/Pančicy-Kukow (MG/SN). Dnja 6. julija 2003 bu Ekumeniski putniski puć wot městow Zhorjelca do Vacha swjatočnje poswjećeny. Składnostnje 15lětneho jubileja su na 460 kilometrow dołhej čarje kóžde 15 kilometrow kolik do zemje zbili a na nim woprawdźitu mušlu přičinili, na kotrejž steji ličba 15. Při tutych kolikach zetkaja so jutře, pjatk, we 18 hodź. małe skupinki k wječornej nutrnosći. Su to hospodowarjo, putnicy a aktiwni pućowarjo. Ale tež wšitcy zajimcy su přeprošeni. W Budyskim wo­krjesu stejitej kolikaj, hdźež so tajki nyšpor wotměje, w Hornim Wunjowje před Opitzec hospodu a pola klóštra Mariji­neje hwězdy při zachodźe do Lipja.

Ke klóšterskemu „jubilejnemu kolikej“ póńdźe w 16.45 hodź. skupinka wot Chróšćanskeje hospody pěši, k čemuž putniska mać Monika Gerdesowa wšitkich zajimcow wutrobnje přeproša, so jim přizamknyć. Štóž chce direktnje na nyšpor přińć a kolik njenamaka, ­njech je dźesać mjeńšin do šesćich na klóšterskim dworje. Někotři wobdźělnicy tež wottam póńdu. Po nyšporje a wróćopuću přizamknje so na zahrodźe Chróšćanskeje hospody wot něhdźe 19.30 hodź. towaršliwa bjesada. Něhdyši putnicy, ­přichileni wjesnjenjo a zajimcy na put­nikowanju su na małe „putniske zet­kanje“ na česć 15. róčnicy ekumeniskeho putniskeho puća wutrobnje přepro­šeni.

Wosebity dar dóstanu wšitcy, kotřiž lětsa 15. narodniny swjeća abo su hižo 15 lět. Woni smědźa lětsa we wšitkich čestnohamtskich hospodach podłu puća darmotnje přenocować. Dalše informa­cije dóstanu zajimcy pod www.oekumenischer-pilgerweg.de.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND