Komuny měli so přihotować

srjeda, 31. januara 2018
artikl hódnoćić
(0 )
Na dwudnjowskej fachowej dźěłarničce w kompjuterowym muzeju Konrada Zusy we Wojerecach su so z temu „Kubłanje za digitalny dźěłowy a žiwjenski swět“ dokładnje zaběrali. Mjez wobdźělnikami běchu Jens Leschner z Wojerec, Gerrit Kratz z hessenskeho Rodgauwa a dr. Susanne Felger (wotlěwa) z badensko-württembergskeho Weinheima.  Foto: Andreas Kirschke Na dwudnjowskej fachowej dźěłarničce w kompjuterowym muzeju Konrada Zusy we Wojerecach su so z temu „Kubłanje za digitalny dźěłowy a žiwjenski swět“ dokładnje zaběrali. Mjez wobdźělnikami běchu Jens Leschner z Wojerec, Gerrit Kratz z hessenskeho Rodgauwa a dr. Susanne Felger (wotlěwa) z badensko-württembergskeho Weinheima. Foto: Andreas Kirschke

Fachowa dźěłarnička we Wojerecach so z digitalizaciju zaběrała

Wojerecy (AK/SN). Komuny měli so na nowy digitalny dźěłowy a powołanski swět lěpje nastajić. „Wone dyrbjeli akterojo a zdobom pohonjerjo być. Njeměli wuwiće zaspać.“ To je Jens Leschner, sobudźěłaćer koordinowanišća za kubłanje města Wojerec a regionalneho dźěłanišća za kubłanje, demokratiju a žiwjenske perspektiwy tele dny w kompjuterowym muzeju Konrada Zusy we Wojerecach zwuraznił. Na dwudnjowskej fachowej dźěłarničce su so tam z temu „Kubłanje za digitalny dźěłowy a žiwjenski swět“ dokładnje zaběrali.

Zakład zarjadowanja bě „Weinheimska iniciatiwa“, zwjazowaca badensko-württembergski Weinheim, hessenski Rodgau a sakske Wojerecy. Wšitke tři města přisłušeja wokrjesej, su srjedźneje wul­ko­sće a na polu kubłanja aktiwne. Na swojim kóždolětnym forumje běchu loni zhromadnu deklaraciju k digitalizaciji dźěłowych městnow schwalili. „Štóž sam njećěri, toho druzy ćěrja“, rjekny Stefan Jaud, fachowy nawoda wotrjada za socialne naležnosće a kubłanje města Rodgauwa. Tam su mjeztym konkretny plan „Rodgau hotuje so na přichod“ wuwili.

We Wojerecach wěnowachu so nětko hłownje kubłanju. Tež we łužiskim měsće so na digitalny přichod hotuja, štož je wjace hač jenož ryzy infrastrukturna naležnosć. „Je to socialny a wšotowaršnostny nadawk“, rjekny měšćanosta za socialne naležnosće Thomas Delling. Při tym su we Wojerecach po jeho słowach hižo derje přihotowani. Tak su internetnu stronu města dospołnje přetworili. Pod www.hoyerswerda-750.de informuja nimo toho wo přihotach měšćanskeho jubileja. Mjeztym w interneće tež na wšelake zarjadowanja skedźbnjeja. „Tema digitalizacija je nam přewšo wažna. Tuchwilu nowe medije instalujemy a tohorunja wužiwamy“, rjekny Günter Kiefer, nawoda Wojerowskeho křesćanskeho gymnazija Johanneum. Wón je so zhromadnje z fachowym wučerjom za informatiku Jörgom Meißnerom na fachowej dźěłarničce wobdźělił. Tež Johanneum je swoju internetnu stronu dospołnje předźěłał, Kiefer wuzběhny. Přichodne tydźenje chcedźa tam dalše rumnosće za digitalne medije zarjadować a z kompjuterami a beamerami wuhotować. Šula dyrbjała wužadanjam digitalizacije wotpowědować. Günter Kiefer pak so starosći, zo so při wšej digitalnej a fachowej kompetency přemało na socialnu kompetencu šulerjow dźiwa. „Tohodla je wažne so tež tutej temje intensiwnje wěnować, zo njebychmy so wuwića bojeć trjebali, kotrež je dźeń a spěšniše.“

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND