Žane pjenjezy za najmjeńšich
Kulturny dom Konjec bychu rady na dobro wjesnych dźěći přetwarili
Konjecy (SN/MWj). Za młodźinski klub, Domowinsku skupinu, blidotenisowe towarstwo a Serbski muski chór Delany je Konječanski towarstwowy dom „Delany“ kaž mała parlička, hdźež móža so wobstajnje zetkawać. Před lětami su dom zdźěla ponowili, tak zo hodźi so wón derje wužiwać. Nětko zrodźichu Erika Maywaldowa, Regina Šołćina a dalše žony ideju, dotal lědma wužiwanu rumnosć bywšeje předawarnje w přizemju kulturneho domu tak přetwarić, zo móhli ju za kulturne kubłanje dźěći wužiwać. Tuchwilu so pola Maywaldec doma w Šunowje zetkawaja, chcedźa-li z dźěćimi hodownu hru abo spěwy a reje za mejemjetanje nazwučować. Hdyž so na tajkich zetkanjach druhdy 15 hač do 20 dźěći wobdźěla, je cyły delni poschod Maywaldec domu „wobsadźeny“.
Policija (29.11.17)
Technika pomhała
Budyšin. Kak moderna technika w awtach při njezbožach pomha, je so wčera w Budyšinje pokazało. Na křižowanišću Zeppelinowa/Nowosólska chcyše wodźer BMWja w 17.30 hodź. nalěwo do centruma wotbočić. Dokelž ampla hižo žołte pokaza, muž bóle na płun stłóči, zo by z křižowanišća přišoł. Při tym poča so awto na mokrej jězdni suwać a prasny do ample. Dokelž bě BMW 60lětneho wodźerja z nuzowym systemom eCall wuhotowany, tón awtomatisce centralu zazwoni a sposrědkowa wšitke trěbne daty kaž městnosć, ličbu wosobow w awće a ličbu aktiwizowanych airbagow. Dokelž dyrbjachu ze zranjenymi ličić, zasadźichu mjez druhim lěkarja a wuchowanske awto. Zranił drje so nichtó njeje, škoda pak wučinja 21 000 eurow.
Ćežke časy za měšćansku kasu
Při nastajenju hospodarskich planow w hornjołužiskich komunach so wotbłyšćuje, zo změja so wone přichodny čas z pjenježnymi starosćemi bědźić. Najnowši přikład su Wojerecy.
Wojerecy (AK/SN). Město Wojerecy dyrbi so na ćežke hospodarske planowanje nastajić. Tole zdźěli wyši měšćanosta Stefan Skora (CDU) na wčerawšim posedźenju měšćanskich radźićelow. Hižo nětko maja Wojerecy deficit 6,6 milionow eurow. Hač do lěta 2020 wón dale rozrosće. Etat, kotryž hodźał so schwalić, město tuchwilu předpołožić njemóže.
Předewšěm přiražki za pěstowarnje rozrostu. W tymle wobłuku dyrbja přichodne lěta 8,8 milionow eurow wjace wudać. Na tamnym boku liča z tym, zo změja dwaj milionaj eurow mjenje dochodow z dawkow. Tež klučowych připokazanjow budźe nimale 870 000 eurow mjenje, Skora připowědźi. Po jeho słowach to woznamjenja, zo hač do lěta 2020 žane přidatne srědki za wotpłaćenje kreditow njezměja a tež žane srědki za swójske inwesticije.
Krótkopowěsće (29.11.17)
Wotnožce agentury zawru
Kamjenica. Wot 1. januara 2018 dźěłowa agentura w Budyskim wokrjesu wotnožce w Biskopicach a Radebergu zawrje. Tak reaguje Zwjazkowa agentura za dźěło w Sakskej na woteběracu ličbu bjezdźěłnych. W Biskopicach bě w septembrje hišće 260 ludźi bjez dźěła registrowanych, w Radebergu 272. Wosobinsce wšak chce agentura klientam dale narěčenski partner wostać.
Wuknjenje rěče wolóžić
Choćebuz. Nowa kniha „Pó serbsku! – Gramatika za wuknjecych“ předleži. Wona zaběra so na lochke wašnje z delnjoserbskej gramatiku. Podate su husto wužiwane frazy, kotrež maja šulerjam přistup k delnjoserbšćinje wolóžić. Dale je kóždy tekst tež do němčiny přełoženy. Rěčny centrum WITAJ je knihu za delnjoserbšćinu wuknjacych wudał. Zwučowanski zešiwk k tomu ma klětu wuńć.
Chcedźa zaso Witaj-skupinu
Najznaćiši hit njepobrachował
Policija (28.11.17)
Najebać zakaz dale jěła
Słona Boršć. Na wotpočnišću při awtodróze A 4 pola Słoneje Boršće je policija njedźelu popołdnju transporter kontrolowała. Zastojnicy zwěsćichu, zo jězdźidło ani přizjewjene ani zawěsćene njebě. 55lětnej wodźerce su tuž dalšu jězbu z awtom zakazali. To pak ju po wšěm zdaću njemyleše. Přetož tři hodźiny pozdźišo su dalši policisća samsnu žonu na parkowanišću blisko Kodersdorfa znowa z transporterom lepili.
Hdźež so něhdy smykachu
Dźěl wobydlerjow Brěmjenja chce swój hašenski hat zdźeržeć
Brěmjo/Wulka Dubrawa (CS/SN). Tójšto wobydlerjow Brěmjenja bě na zašłe posedźenje Wulkodubrawskeje gmejnskeje rady přišło, dokelž jim cyle specielny problem pod nochćemi pali. Wosrjedź wsy ma so hat za hašensku wodu zhubić. Město toho chce gmejna tam cisternu do zemje zatwarić, z kotrejež móhli wobornicy w nuzowym padźe hašensku wodu klumpać. Wobydlerjam pak so to scyła njelubi. Woni nochcedźa swój hat tak jednorje z ruki dać. Naprašowanje mjez Brěmjenjanami pak bě wunjesło, zo su jich měnjenja nastupajo hat rozdźělne. Połojca wjesnjanow chce jón zdźeržeć, tamna połojca nic.
Štomy prawje wurězać wuknyli
Jedne z mało zymskich dźěłow na zahrodźe je štomy wurězować. Mnozy wšak to radšo fachowcam přewostajeja, dokelž so zmylkow boja. W Njebjelčicach su minjenu sobotu lajkam rozkładli, kak to prawje činja.
Njebjelčicy (aha/SN). Na cyłodnjowski seminar, hdźež zaběrachu so teoretisce kaž tež praktisce z wurězanjom sadowcow, je Njebjelčanska gmejna zajimcow přeprosyła. Wot Sakskeje krajneje załožby za přirodu a wobswět spěchowane zarjadowanje su tam mjeztym třeći raz přewjedli. Wjace hač dwaceći wobdźělnikow z Konjec, Lejna, Pančic-Kukowa a dalšich wokolnych wsow, ale wězo tež z Njebjelčic wjesnjanosta gmejny Tomaš Čornak (CDU) sobotu w gmejnskej sydarni witaše. Mjez zajimcami běchu tež wjacore žony.
