W dowolu za sprjewine město wabić
Budyšin (SN/MWj). Wot spočatka lětnich prózdnin Budyska turistiska informacija wobydlerjam poskića, zo móža so na swojej dowolowej jězbje z wosobinskim „pósłancom“ stać a w cuzbje za swoje rjane město wabić. Informaciske pakćiki wo měsće a regionje su w turistiskej informaciji na Hłownym torhošću přihotowane. Tam móža sej zajimcy tajke darmotnje wotewzać, zo bychu je swojim hosćićelam w dowolu přepodali. Štóž zajimy hosćićela hižo trochu bliže znaje, móže swój pakćik z dalšimi brošurkami wudospołnić dać. Pućowanske karty maja tam runje tak kaž karty za kolesowanje a wjele dalšeho.
We wosebitym pakćiku zapřijate su na kóždy pad pohladnica wo Budyšinje, lětny plan zarjadowanjow w měsće a dowolowy magacin za Hornju Łužicu. W nim prezentuje so turistiski poskitk za wšón region. Rady poradźuja sobudźěłaćerjo turistiskeje informacije tež nastupajo hóstne dariki. A štóž chce w dowolu na wosebite wašnje na to skedźbnić, zwotkel pochadźa, njech wobleče so Budyski T-shirt abo zlěpi sej wotpowědny nalěpk na awto.
Kupać budźe móžno, stanować nic
Ručež LMBV zrěčenje z Wojerecami podpisa, móža so ludźo w Šibojskim jězoru kupać. Tam ma město wulke plany. Hač pak so wone zwoprawdźić hodźa, je skerje dwělomne.
Wojerecy (AK/SN). Zapadny přibrjóh Šibojskeho jězora chce město Wojerecy zaměrnje wužiwać. Tole podšmórny wyši měšćanosta Stefan Skora (CDU) na wčerawšim posedźenju měšćanskeje rady. „Zrěčenje mjez LMBV a městom je z našeje strony podpisane. Pobrachuje hišće podpismo LMBV. Potom móhli so ludźo w jězoru kupać“, wón rozłoži. Wotpowědnu dowolnosć su spočatk meje wot Budyskeho krajnoradneho zarjada dóstali.
Na olympiadźe so wubědźowali
Krótkopowěsće (27.06.17)
Prapremjera Jana Cyža zaklinči
Mönchengladbach. W koncertnym rjedźe „Gladbachske koncerty“ w sewjerorynsko-westfalskim Mönchengladbachu budźe twórba Budyskeho komponista Jana Cyža prapředstajena. We wobłuku 2. koncerta na dźěłarničce „Zynki kolesa!“ zaklinči w tamnišej radnicy 30. junija Cyžowa kompozicija „B(e)(a)rt – ok!, ok?“ za wiolinu, violoncello a akordeon.
CDU a Lěwica přidobyłoj
Berlin. Nahladnosć SPD na wuchodźe Němskeje dale woteběra. Wot meje je přichilnosć wolerjow wot 20 na nětko 15 procentow spadnyła, kaž institut Insa w nadawku časopisa Super Illu zwěsća. CDU a Lěwica móžeštej po šěsć procentach přidobyć: Křesćanscy demokraća bychu 34 a Lěwica 25 procentow měli, bychu-li njedźelu wólby byli.
Skorža padustwow dla
Lipsk. Mašiny, material abo cyłe wobhrodźenja – wulke twarske zawody w Sakskej a Saksko-Anhaltskej skorža dale mnohich padustwow na twarnišćach dla. Ličba tajkich padow drje woteběra, načinjena škoda pak je ćim wjetša, zdźěli zwjazk twarskeje industrije w Lipsku. Wosebje boja so dźeń a wjace cwólbow, kotrež cyłe twarnišća wurumuja.
Utahscy młodostni kěrluš serbsce zanjesli
Chrósćicy (aha/SN). Runja dotalnym festiwalam zahajichu tež tónraz njedźelu z Božej mšu pod hołym njebjom. Na nju přichwatachu wěriwi ze wšěch serbskich wosadow. Chróšćanski wosadny farar Měrćin Deleńk witaše přitomnych w serbskej, němskej a jendźelskej rěči. Kemše z nim swjećeštaj franciskanski rjadnik pater Paulus a generalny wikar a předsyda Zhorjelskeho tachantskeho kapitla dr. Alfred Hoffmann. Dujerjo Chróšćanskeje wosady Božu mšu runje tak wobrubichu kaž wjacore wukrajne kulturne skupiny. Wosebje jimacy bě zanjeseny kěrluš Utahskeho cyłka American Rhythm Folk Ensemble. Jeho čłonojo běchu hakle we Łužicy dźěl swojeho kěrluša zeserbšćili, kotryž tam wuběrnje přednjesechu.
Spagat mjez swójbu a powołanjom
Hodźij (CRM/SN). W přijomnej korčmje „Tři Hwězdy“ při zwjazkowej dróze B 6 rozjimachu njedawno na přeprošenje Budyskeho zwjazka Žónskeje unije CDU temu, kotraž so za kóždu generaciju znowa staja, mjenujcy zjednoćenje powołanskeho dźěła z nadawkami w swójbje. K tomu poda nětčiša předsydka skupiny Budyskeho wokrjesa Marja Michałkowa jako wjelelětna zapósłanča CDU Němskeho zwjazkoweho sejma krótke stejišćo. Wona potwjerdźi, zo je paket naprawow za swójby pola nas zawěrno mnohostronski. Tak nimaja po jeje wuprajenju w žanym druhim kraju telko pjenjez za młode swójby k dispoziciji.
Skupiny pod jednej třěchu
Ćišćanske kulturne towarstwo 20lětne wobstaće swjećiło
Ćisk (UH/SN). Wjesne kulturne skupiny pod jedyn kłobuk zwjesć bě zaměr 1997 załoženeho Ćišćanskeho kulturneho towarstwa. Na te wašnje měješe wjes tež na kulturnym polu lěpje hromadu zrosć. Předewšěm su so tehdy swojim serbskim korjenjam wěnowali. To jenož njewoznamjenješe wobchować serbske nałožki a tradicije, ale tež serbsku rěč. Počasu wutwori so pjeć kreatiwnych skupin: nałožkowa a rejwanska, kružk kreatiwneho tworjenja, projektowy cyłk Ćišćanskeho statoka a klub seniorow. W nich so mnozy wjesnjenjo swojemu hobbyjej wěnuja. Runje dokelž je jeho paleta zaběrow jara wobšěrna, kulturne towarstwo mnohe regionalne a nadregionalne podawki sobu wobohaća.
Policija (27.06.17)
Sydom ludźi so zraniło
Budyšin. Na zwjazkowej dróze B 96 blisko awtodróhoweje wotbóčki Budyšin-zapad je so wčera připołdnju ćežke wobchadne njezbožo stało. 65lětna wodźerka Opela bě so w prawej křiwicy na napřećiwnu jězdnju dóstała a frontalnje do Škody zrazyła. Wona a jeje sobujěduca w samsnej starobje kaž tež dwě žonje w tamnym awće so ćežko zranichu. Wodźer Škody a jeho dźěsći w starobje jednoho a pjeć lět so snadnje zranichu.
Hosćenc połny starožitnosćow
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Štóž lubuje derje jěsć a je runočasnje stawiznisce zajimowany, tomu je Lejnjanski hosćenc prawa adresa. Tamniši mějićel Rajner Kubica woboje zaruča. Hižo jako mały hólčec je wón w hosćencu staršeju staršim wjesnjanam, hdyž přińdźechu po swjatoku na piwko, rady připosłuchał, kak „wo starych časach“ powědachu. Po tym zo chodźeše hač do 1968 tři lěta w Chrósćicach do šule, bě na to pjeć lět pola kapałnikow w Drježdźanach, hdźež započa so přez tamniši flair za stawizny zajimować. Šulu wuchodźił je w Pančicach-Kukowje, hdźež měješe w 9. a 10. lětniku stawiznisku wučbu pola Jurja Ryćerja. Nawuknywši po tym powołanje pinčnika dźěłaše na to jako tajki někotre lěta we wjacorych hosćencach.
