Přemało městna w pěstowarni
Starši a kubłarki Čornochołmčanskeje pěstowarnje „Krabat“ žadaja sej za dźěći lěpše rumnostne wuměnjenja. To je Wojerowskeho wyšeho měšćanostu Stefana Skoru (CDU) a wjacorych měšćanskich radźićelow pohnuło, dźěćace zarjadnišćo wopytać.
Čorny Chołmc (AK/SN/MiR). Z wida dźědow a wowkow rysowaše Frank Galle situaciju wobmjezowaneho městna w Čornochołmčanskej pěstowarni „Krabat“, kotraž je w nošerstwje Dobroćelskeho dźěłaćerskeho skutka (AWO) Łužica. „Tu ma so nuznje něšto změnić. Prošu při tym stronske hranicy přewinyć. Financy za to maja być“, rjekny Čornochołmčan. Tuchwilu staraja so w zarjadnišću z 43 městnami wo 37 dźěći w žłobikowej a pěstowarskej starobje. 13 z nich chodźi do žłobika, 24 do pěstowarnje. Jeničce za dobu wot januara do decembra 2018 maja hižo jědnaće přizjewjenjow. Maja tam tež Witaj-skupinu, wo kotruž stara so Silwija Stephanowa, a serbskorěčnu kubłarku Georgiju Kubašowu za chowancow žłobika.
Krótkopowěsće (23.11.17)
Studenća dyrbja wjac płaćić
Lipsk. Mnohe uniwersity w Sakskej dyrbja płaćiznu jědźe, podruže kaž tež semesterske popłatki zwyšić. Přičina su stupace personalne kóšty a woteběraca ličba studentow, zdźěla powěsćernja dpa. Drježdźanski studentski skutk informuje, zo dyrbja tam studowacy wot noweho lěta w mensach a kafeterijach 1,5 procentow wjac płaćić a wot apryla wo 5,40 eurow wyši semesterski popłatk.
Njezbožo přepytować přestali
Hof. Přepytowanja busoweho njezboža w juliju w Hornjej Frankskej su zastajene. Posudki fachowcow dotalne dopóznaća wobkrućeja, statne rěčnistwo Hof zdźěli. 3. julija bě šofer busa pućowanskeho předewzaća z Lubija na A 9 pola Münchberga kónc kopjenja wobchada přepozdźe widźał a do nakładneho awta zrazył. Bus so na to wupali, 18 ludźi přisadźi žiwjenje, třicećo so zranichu.
Přećiwo smogej w stolicy
Policija (21.11.17)
Kwady kradnyli
Sepicy. Po wšěm zdaću chětro kamjenjaty puć domoj mějachu njeznaći paduši w Sepicach. Z hale na Drježdźanskej pokradnychu w času wot minjeneje soboty popołdnja do njedźele připołdnja wjacore kwady. Kaž policija zdźěla, je wobsedźer zwěsćił, zo pobrachuja nimo štyrjoch dźěćacych dalši sportowy kwad, wjacore crossowe nahłowniki kaž tež grat a narunanske dźěle. Škoda wučinja něhdźe 15 000 eurow.
Pomnik w Hućinje poswjećeny
Słužba na wsy wšudźe njezaručena
Róžant (JK/SN/JaW). W minjenym času su gmejny zarjadniskeho zwjazka Při Klóšterskej wodźe naćiski wo wohnjoškitnych wustawkach rozjimowali. Žadanja na škitne naprawy kaž tež wohnjowe wobory ze stron krajnoradneho zarjada su nimale njespjelnjomne. Dalši, hišće bóle palacy problem na wsach je, zaručić wšědne zasadźenje wobornikow w nuzowym padźe. Je-li trjeba, ma znajmjeńša šěsć wobornikow hotowych być a so podać na městno zasadźenja, zo bychu škodźe zadźěwali abo pomhali. To pak njeje přeco a wšudźe móžno.
Na minjenym posedźenju gmejnskich radźićelow gmejny Ralbicy-Róžant dyrbješe wjesnjanosta Hubertus Ryćer (CDU) přiznać, zo njeje w Róžeńće móžno hotowosć wohnjoweje wobory wodnjo zaručić. Runje Róžeńčanski wóz wohnjoweje wobory z hadźicami pak je na městnje wohenja trěbny, zo móhli wobornicy hašeć. Jenički Róžeńčanski wobornik, kiž je wodnjo zasadźomny, njemóže pak wóz sam na městno zasadźenja dowjezć. Tam pak jón wobornicy z druhich wsow na kóždy pad trjebaja. Rozsud bě nuznje trěbny.
W zajimje žonow
Biskopicy (SN/at). Za čas po wotpohladanym zawrjenju porodneje kliniki w Biskopicach namjetuje tamniša městna skupina SPD, zarjadować porodźernju (Hebammenkreißsaal). Budyskemu krajnemu radźe Michaelej Harigej (CDU) so tale mysl mjeztym tež lubi, rěka w nowinskej zdźělence Biskopičanskeje SPD. Kaž jeje předsydka dr. Uta Strewe wuwjedźe, je „porodźernja wot babow nawjedowany model porodopomocneho dohladowanja w klinice. Baby tam w swójskej zamołwitosći strowe samodruhe žony do a za čas poroda kaž tež po tym bjez lěkarskeho porodneho pomocnika dohladuja.“ Dźeń a wjace maćerjow přeje sej tajke intensiwne, wosobinske dohladowanje z mało zapřimnjenjemi, rjekny dr. Strewe. „Poskitk njeby jeno dźěru w regionje płatał, Biskopicy bychu tak tež zwonka njeho na přidatnej atraktiwiće nabyli.“
Biskopičanska SPD poskića nawodnistwu kliniki, zarjadnistwu a wobydlerjam rozmołwu wo swojim namjeće.
Generaciski nadawk
Njebjelčicy su „jadriwa wjes“
Njebjelčicy (SN/at). Wubědźowanje „Jadriwa wjes!“ 2017 zwjazkoweho ministerstwa za zežiwjenje a ratarstwo ma tež serbskeho dobyćerja. Njebjelčicy njejsu so jenož do kruha 22 finalistow dóstali, wone su w kategoriji „jadriwe a stabilne wsy“ samo dobyli. Jury we wobkrućenju piše: „Wjes w serbskorěčnym dźělu Hornjeje Łužicy je swoju srjedźiznu ze zarjadnistwami za zhromadnosć a nowowuhotowane zelenišća skutkownje wuwiła. Zwjazujo zjawny a priwatny angažement, wuměłstwo a přirodu zachowuja tam tradicije, na přikład twarskeje kultury a rěče, do přichoda.“
Počesćenje zaměrny angažement wjesnjanosty Tomaša Čornaka (CDU) a jeho gmejnskeje rady na dobro wobydlerjow znowa wysoko připóznawa.
„Dobyćerjam je so na wuběrne wašnje poradźiło, wuwić do přichoda kmane ideje a koncepty k wuhotowanju swojich wjesnych jadrow jako centrum wjesneho žiwjenja“, zjima zwjazkowy minister za ratarstwo Christian Schmidt (CSU) wukony dobyćerjow pjeć kategorijow kaž tež wysokeje kwality požadanjow dla prěni raz spožčenych pjeć wosebitych mytow.
Krótkopowěsće (21.11.17)
Synoda etat wobzamknyła
Drježdźany. Synoda ewangelsko-lutherskeje krajneje cyrkwje Sakskeje je na kóncu wuradźowanjow w Drježdźanach klětuši budget wobzamknyła. Tón předwidźi dochody a wudawki 218 milionow eurow, štož je nimale 7,2 milionaj eurow mjenje hač w lětušim etaće. Přičina je wočakowany spad dochodow z cyrkwinskeho dawka a z financneho zarunanja Ewangelskeje cyrkwje w Němskej.
Swjedźenske hry dale póńdu
Čorny Chołmc. Pokročowanje Krabatowych swjedźenskich hrow je zawěsćene. Kaž towarstwo Krabatowy młyn zdźěli, staj producentka swjedźenskich hrow Doris Siebecke a předsyda towarstwa Tobias Čižik njedźelu wotpowědne zrěčenje wo dalewjedźenje hač do 2023 podlěšiłoj. Klětu planuja 15 předstajenjow stawizny z Krabatom. Předpředań zastupnych lisćikow zahaja 15. januara.
Ze stawiznami so zaběrali
Starši na hrajkanišću pomhaja
Róžant (JK/SN). Hižo dlěši čas sej starši pěstowarskich dźěći kaž tež mnohe młode swójby z Ralbic žadaja, natwarić nowe abo znajmjeńša ponowić a rozšěrić dotalne hrajkanišćo tamnišeje pěstowarnje. Te dźě nimo pěstowarskich tež dalše dźěći jako zjawne hrajkanišćo wužiwaja, štož je mjeztym slědy zawostajiło. Ralbičanske hrajkanišćo tuž w formje, poskitku a wuhotowanju dźensnišim narokam hižo njewotpowěduje. Starši kaž tež staršiska přirada su so tuž na gmejnu wobroćili a ju wo pomoc prosyli. Serbske šulske towasrtwo jako nošer ze swójskeje mocy tak wobšěrny nadawk zmištrować njemóže. Ma-li pak so hrajkanišćo dale zjawnje wužiwać, je gmejna wužadana. Tež wona pak srědki nima, hrajkanišćo w načasnej formje natwarić. Tohodla zrodźichu ideju, zo starši w swójskej režiji trěbne zakładne kaž tež přihotowanske dźěła sami wukonjeja. Wo tym su so staršiska přirada, starši kaž tež nošer a gmejna nětko dojednali. Gmejnje jeničce zbywa so wo to starać, zo namaka wotpowědnu firmu, kotraž hrajkanišćo z načasnymi nastrojemi wuhotuje.
