Krótkopowěsće (15.04.16)

pjatk, 15. apryla 2016 spisane wot:

Próstwa Turkowskeje přizwolena

Berlin. Chłostanske jednanje přećiwo satěrikarjej Janej Böhmermannej ranjenja turkowskeho prezidenta Recep Tayyipa Erdoğana dla je móžne. Zwjazkowe knježerstwo je dźensa próstwje Turkowskeje wotpowědowało. Tole zdźěli zwjazkowa kanclerka Angela Merkel (CDU) nowinarjam w Berlinje.

Wjace wobchadnych njezbožow

Zhorjelc. Ličba wobchadnych njezbožow je w Budyskim a Zhorjelskim wo­krjesu loni prěni króć po třoch lětach zaso přiwzała. Tole wuchadźa z wozjewjeneje bilancy Zhorjelskeje policajskeje direkcije. Cyłkownje běchu 15 799 zražkow zličili (2014: 15 598). Při tym so 35 ludźi smjertnje zrani, pjećo wjace hač 2014. Hłowne přičiny běchu smalenje, njedosahacy wotstawk a alkohol.

Wotstawk dźeń a wjetši

Berlin. Aktualna roprawa UNICEF pokazuje, zo bywa wotstawk mjez chudymi a bohatymi dźěćimi w industrijnych krajach dźeń a wjetši. Najlěpje wotrěznje w mjezynarodnym přirunowanju mjez 41 krajemi Europskeje unije a OECD Danska. Němska zarjaduje so na 14. městnje. Přepytowali běchu wobłuki, zasłužbu, strowotu abo spokojnosć ze žiwjenjom.

Policija (15.04.16)

pjatk, 15. apryla 2016 spisane wot:

Padustwo awta wudawał

Zhorjelc. 32lětny Durinčan ze Sangerhausena chcyše po wšěm zdaću swoju zawěsćernju wobšudźić. W měrcu wón policiji zdźěli, zo su jemu awto pokradnyli. Pólska ­policija je awto před něšto dnjemi w Zgorzelecu nadešła. Tam měješe sej je 32lětny wotewzać. Jako wón za­wčerawšim po swoje jězdźidło přijědźe, napadny zastojnikam, zo běše wón jara podobny na wosobu, kotraž bě awto w měsće ­wotstajiła. Wobstražowanska kamera bě tule scenu tehdy filmowała. W přesłyšowanju młody muž na to při­zna, zo je ­padustwo jeničce wudawał. Nětko so kriminalna policija z tymle padom zaběra. Awto wostanje najprjedy raz sćazane. Tež pólska policija pruwuje, hač je muž ­zakonje zranił.

Gmejna dawki zwyši

pjatk, 15. apryla 2016 spisane wot:

Reaguja na napjate hospodarske połoženje

Hamor (AK/SN). Komplikowane pjenježne połoženje Hamorskeje gmejny pytnu wobydlerjo nětko tež w swójskej móšni. Na swojim zašłym posedźenju je gmejnska rada ležownostny dawk A za ratarske a lěsne płoniny wot 300 na 310 procentow zwyšiła, ležownostny dawk B za wobtwarjene płoniny wot 380 na 415 procentow. Změna płaći wot spočatka tohole lěta. „Zwyšenje je hladajo na napjate połoženje w gmejnje trěbne. Hižo dlěši čas wo tym rozmyslujemy. Nětko je tónle krok trěbny“, rozłoži komornica Stefanie Arndt.

Z dawka A změja 5 000 eurow přidatnych dochodow, z dawka B 60 000 eurow. Jednotliwy wobsedźer ležownosće płaći 25 eurow wob lěto wjace. Wjesnjanosta Achim Junker (CDU) rěčeše wo njewoblubowanym kroku. Zwyšene dawki nětko w dalokej měrje sakskemu přerězkej wotpowěduja. Wone su dźěl naprawow gmejny ke konsolidowanju swojich financow. Wona dyrbi Vattenfallej hač do dwanaće milionow eurow přemysłoweho dawka wróćić a dale 3,2 milionaj eurow „dawka bohatych“ a 2,3 miliony eurow wokrjesneho wotedawka zwjesć.

Lěs wjace hač dawaćel drjewa

pjatk, 15. apryla 2016 spisane wot:

Najwšelakoriše nadawki lěsnistwa steja w srjedźišću wosebiteho dnja, kiž lěsnistwowy wobwod Hornja Łužica jónu wob lěto organizuje. Za tydźeń zaso tak daloko budźe.

Pěskecy (HS/SN). Wěsće powučny a zabawny za jednotliwca a za swójby budźe 23. apryl. Budźe-li tež hišće sucho, čaka na wopytowarjow lěsa dnja 2016 w Pěskecach wot 10 do 17 hodź. wobšěrny program lěsnistwoweho wobwoda Hornja Łužica. „We wobłuku 8. sakskich lěsnych tydźenjow smy sej znowa Pěskecy za wjeršk swojeho zjawnostneho dźěła wupytali“, praji nawoda Holm Karraß. Na sportnišću kaž tež w lěsu wjerći so wšitko wo temu „Što nam lěs poskićuje“.

Sobudźěłaćerjo lěsnistwoweho wobwoda, z lěsnistwom zwjazane předewzaća a gastronomiscy zastaraćeljo chcedźa w Pěskecach lěs jako njeparujomne zelene płuca, jako dodawarja drjewa za ćopłotu, meble a papjeru kaž tež jako městnosć wočerstwjenja hódnoćić. Lěsni dźěłaćerjo, technikarjo, hajnicy a pčołarjo demonstruja, zo su sej swojeje zamołwitosće za zhromadny žiwjenski rum zwěriny a čłowjeka wědomi.

Zo je mjez sakskimi policistami tež tón abo tamny serbski, mjeztym žana wosebitosć njeje. Na mnohich městnach so Serbja sobu wo porjad a wěstotu staraja. Mjez nimi je Michał Šołta z Drježdźan. Z Ralbic pochadźaceho 39lětneho policajskeho komisara pak njewuhladaš při wobdźěłanju wobchadnych njezbožow abo při měrjenju spěšnosće. Jeho dźěłowy wobłuk ma wjele z modernej techniku činić a druhdy tež z načolnymi němskimi politikarjemi.

Policija (14.04.16)

štwórtk, 14. apryla 2016 spisane wot:

W zahrodkach pobyli

Zubornička. W zahrodkownišću při Olbje w Zuborničce su njeznaći wobsedźerjam wjacorych zahrodkow jich wjeselo nad nimi skazyli. W nocy na wutoru so tam skućićeljo do dohromady sydom zahrodnych domčkow zadobychu, zo bychu je za hódnotnymi wěcami přepytowali. Hač su něšto pokradnyli, njeje hišće wujasnjene. Tež w bliskim předawanišću žiwidłow njeznaći swoje „zbožo“ pospytachu, zwrěšćichu pak. Na woknje nasta něhdźe 1 000 eurow wěcneje škody.

Znowa zražka na znatym městnje

štwórtk, 14. apryla 2016 spisane wot:
Na křižowanišću statneju dróhow S 106 a S 100 pola Błohašec, hdźež wotbočiš do směra na Kamjenc, je so dźensa rano ćežke wobchadne njezbožo stało. Z dotal nje­znateje přičiny stej tam wosobowe awto typa Volvo a přezpólne jězdźidło typa Nissan do so zrazyłoj. Wobaj šoferaj so při zražce zraništaj, tak zo dyrbjachu jeju do chorownje dowjezć. W powołanskim wobchadźe dóńdźe sčasami k poćežowanjam. Po wšěm zdaću je mjenowana wotbočka njezbožowe ćežišćo, přetož tule je hižo k wjacorym ćežkim zražkam dóšło. Foto: Christian Essler

Nakupowanišćo radu pači

štwórtk, 14. apryla 2016 spisane wot:

Rozdźělne měnjenja wo přichodźe bywšeho knježeho kubła

Rakecy (JK/SN). Planowane wulkonakupowanišćo, kotrež ma nastać na ležownosći něhdyšeho knježeho kubła w Rakecach, postara so wčera wo wótru a kontrowersnu diskusiju na posedźenju gmejnskeje rady. Čłonojo bjezstronskeje frakcije pokazachu na to, zo so w planach za twar njejsu wobkedźowali jeho centralne połoženje kaž tež wěste puće k njemu a dosahace zawěsćenje měra a wěstoty wokoło njeho. Nimo toho sej čłonojo frakcije žadaja, poslednje twarjenje něhdyšeho kubła jako pomnik zachować a potorhać njedać. Porno tomu tamni radźićeljo a wjesnjanosta Swen Nowotny (CDU) na to skedźbnichu, zo konkretne wobsahi tuchwilu hišće do planow njesłušeja, ale so hišće dodadźa a we wotpowědnej měrje wobkedźbuja. To zastupjerka Budyskeho krajnoradneho twarskeho zarjada wobkrući, pokazujo na to, zo dźe při schwalenju wobtwarjenskich wustawkow jenož wo zasadne wobtwarjenje ležownosće. Wjetšina radźićelow skónčnje tola wotwažowanje kaž tež wustawki k wobtwarjenskemu planej za kupnicu schwali.

Wulke twarske mašiny tuchwilu wobraz na wonkownym dworje klóštra Marijineje hwězdy w Pančicach-Kukowje postajeja. Tam je Wehnertec twarske předewzaće parkowanišćo dospołnje nowe wuhotowało a při tym zelenišća a šćežki připrawiło. Najpozdźišo ke klóšterskemu swjedźenjej so dwór potom šěršej zjawnosći w nowym napohledźe prezentuje. Foto: SN/Maćij Bulank

Zelena swěca za módru swěcu

štwórtk, 14. apryla 2016 spisane wot:

Mjeztym tři lěta je Smjerdźečanska dobrowólna wohnjowa wobora z jězdźi­dłom wuhotowana. Hakle nětko pak na transporter VW T4 připrawichu, štož na kóžde wohnjowoborne awto słuša.

Smjerdźaca (aha/SN). Při słužbnych zasadźenjach­ a na wubědźowanjach Smjerdźečanscy­ wohnjowi wobornicy swoje awto hižo parować nochcedźa. Loni­ 13. junija pak zwěsćichu bytostny njedostatk, jako buchu při wulkim njewjedrje alarmowani, zo bychu na dróhu spowalene štomy mjez Smjerdźacej a Kamjencom rumowali.

Tehdy zasadźeni wobornicy najprjedy dróhu z wobeju stronow z wobchadnymi pylonami zaraćichu, zo njeby wobchad­ dźěło wobornikow wohrozył. Nadobo pak přijědźe z Kamjenskeho směra awto. Jeho wodźer pylony ignorowaše a wokoło nich jědźeše. Na zbožo so ničo stało njeje. Wopodstatnjenje šofera za tajke jednanje bě woprawnjene: Wón je ze swojeje strony drje widźał wjerćitu warnowacu žołtu swěcu, njemóžeše pak widźeć módru swěcu, pokazowacu na wohn­jowoborne zasadźenje. Dokelž muž měnješe, zo běše k njezbožu dóšło, chcyše wón dale jěć, zo by swoju pomoc poskićił.

Serbska debata

nowostki LND