W starym dwórnišću sej ruce myli
Składnostnje swětoweho dnja myća rukow je so wčera w Radworskim starym dwórnišću blisko Čorneho Hodlerja njewšědna akcija wotměwa, kotraž steješe cyle w znamjenju inkluzije.
Radwor (CS/SN). Towarstwo Dwórnišćo inkluzije je wčera dopołdnja wosebity projektowy dźeń w Radworskim dwórnišću přewjedło. Přeprošenje sćěhowało je dohromady nimale 50 šulerjow. Z nich bě 20 spěchowanskich šulerjow z Budyšina, tamni chodźa do 3. lětnika Radworskeje zakładneje šule „Dr. Marja Grólmusec“.
Wjace hač 1 200 młodostnych wopyta minjenu sobotu DSF-party w ...
Pytanje a sćerpnosć so zadaniłoj
Krótkopowěsće (17.10.17)
Nowy centrum za delnjoněmčinu
Hannover. Kraje Hamburg, Delnjosakska, Schleswigsko-Holsteinska a Bremen załožeja „Krajny centrum za delnjoněmčinu“ jako zhromadnu towaršnosć. Wone započnje 1. januara 2018 dźěłać, sydło je w Bremenje. „Chcemy zhromadnje nowe, wukonite a kraje přesahowace městno koordinowanja a syće wutworić“, rjekny Gabriele Heinen-Kljajić, delnjosakska ministerka za wědomosć a kulturu.
Žadaja sej knježerstwo přetworić
Drježdźany. Personalne nowowobsadźenje na čole kultusoweho, financneho a nutřkowneho ministerstwa je sej dźewjeć přitomnych sakskich krajnych radow minjenu sobotu na zetkanju k zmištrowanju krizy CDU po wólbach zwjazkoweho sejma z ministerskim prezidentom Stanisławom Tilichom (CDU) žadało. Dojednali pak su so na wobšěrny paket naprawow za wjesne kónčiny.
Mjenje štomow narunali
Katolscy duchowni we wizěrje statneje bjezstrašnosće
Tež 28 lět po přewróće je zajim na předźěłanju stasi wulki. Na Smochćičanskim forumje, kotryž so minjeny šwórtk w bróžnjowej cyrkwi Domu biskopa Bena wotmě, bě sej wjele zajimcow dojěło. Přišli su přewažnje ći, kotřiž NDRski čas sami dožiwichu.
Smochćicy (CS/SN). Wědomostnik a teologa dr. Gregor Buß bě swoju němsku knihu „Katolscy duchowni jako inoficielni sobudźěłaćerjo stasi“ předstajił. Tři lěta je wón na publikaciji, z kotrejž promowowaše, dźěłał. Při tym bě wjace hač tysac stron aktow přelistował. Lědma jednu powołansku skupinu su tak přesłyšowali, kaž duchownych. Hižo w lěće 1998 wuńdźe publikacija „Cyrkej we wizěrje“, na kotruž móžeše Gregor Buß natwarjeć. Podźěl katolskich duchownych, kotřiž jako IM skutkowachu, bě wyši hač přerězny podźěl druhich powołanskich skupin – poćahujo so na ličbu wobydlerjow. To drje na tym zaleži, zo je statna bjezstrašnosć NDR duchownych jako relewantne wosobiny zastopnjowała. Buß prezentowaše zajimawe statistiske ličby. Nawabjeni běchu přerěznje 49 lět stari. Za stasi dźěłachu něhdźe dźewjeć lět.
Pjenježny awtomat rozbuchnyli
Policija (16.10.17)
Při wotbóčce prasnyło
Wojerecy. Ćežke wobchadne njezbožo je so sobotu popołdnju na zwjazkowej dróze B 97 mjez Wojerecami a Sprjewinym Dołom stało. 34lětna wodźerka Forda chcyše tam nalěwo wotbočić, čehoždla za njej jěduce awta zaborzdźichu. 54lětny wodźer BMWja pak chcyše pomałšo jěducych přesćahnyć a do wotbóčaceho Forda zrazy. Při tym so štyri wosoby zranichu. Dohromady nasta něhdźe 25 000 eurow wěcneje škody.
Serbski personal trěbny
Mjez šěsć nowymi wučomnikami-hladarjemi su pola maltezow třo hólcy
Kamjenc (SN/mwe). Derje zažiwili su so w Kamjenskej chorowni maltezow swj. Jana šěsć nowych wučomnikow, kotřiž so spočatk septembra jako přichodni medicinarjo na swój nowy žiwjenski puć nastaja. Pjećo z nich su šulerjo strowotniskeje šule a hladanja chorych, jedna wučomnica chce so z babu stać. Młodostni – tři hólcy a tři holcy – přińdu z gmejny Ralbicy-Róžant, z Połčnic, Kamjenca, Wallrody a Halštrowa. Jedyn z nich je Serb. „Kładźemy wulku kedźbnosć na to a spytamy, zo je w kóždej změnje serbsce rěčaca hladanska móc zaplanowana. To je za našich serbskich pacientow wažne, zo móža so w chorowni w swojej maćeršćinje dorozumić“, nowinska rěčnica Kamjenskeje chorownje maltezow Ines Eifler našemu wječornikej zdźěli. Cyłkownje bychu sej w chorowni swj. Jana w Lessingowym měsće wjace požadarjow za wukubłanje w strowotniskim, domjacym a hladanju chorych přeli. Zajimcy móža so hižo nětko za wukubłanske městno wot septembra 2018 – pod adresu www.malteser-krankenhaus-stjohannes.de – požadać.
Lětsa puć po cyłej wsy wobnowja
Puć Při Klóšterskej wodźe we Łazku je so w poslednich lětach k nimale nje- znjesliwemu stawej pohubjeńšił. Dlěje hač lětdźesatk so Łazkowčenjo wo to prócowachu, zo jón wobnowja.
Łazk (aha/SN). Loni nazymu je hłuboko- twarska firma Schulz ze Carneho Gózda prěnje 70 metrow wobnowiła. Po tym je gmejnska rada Ralbicy-Róžant wutwar dalšeho wotrězka tohole puća wupisała a samsna firma zapodaše porno dalšim najlěpši poskitk. Tuž radźićeljo wobzamknychu, zo lětsa puć po cyłej wsy wobnowja. Kulowski Statnikec inženjerski běrow za twarstwo je zdźěłał detailěrowany časowy wotběh. Započinajo před tydźenjom z dźěłami informowachu potrjechenych, zo njebudu jedyn dźeń swoje awto po zwučenym wašnju wužiwać móc. To bě přičina, zo sy tam minjeny štwórtk wulku ličbu awtow před wjesku ze Smjerdźečanskeho směra parkować widźał. Tež šulski bus njemóžeše minjeny tydźeń po puću jězdźić. Derje, zo běchu prózdniny. Wjesnjanosta Hubertus Ryćer (CDU) je přeswědčeny wo tym, zo twarske dźěła hač do kónca nowembra zakónča.
