Policija (03.07.17)
Wokno awta rozbić dyrbjeli
Wojerecy. Na parkowanišću Wojerowskeje kupnicy je sobotu připołdnju 48lětna žona swojeho pjećlětneho wnučka sama w njezamknjenym awće wostajiła. Hólčec zalěze ze zadnjeho městna doprědka a stłóči njewotpohladnje na knefl za centralny zamk. Tež klučik w awće tčeše, tak zo njemóžeše je wowka wotwonka wočinić. Wšo dobre přirěčowanje njepomhaše, tak zo ničo njezby, hač zadnje wokno awta rozbić.
Pisane stawizny we wobrazach
K 400. jubilejej Noweje Wjeski wulkotny swjedźenski ćah wuhotowali
Nowa Wjeska (BW/SN). Z kulturnym programom Wudworskich rejwarjow a Přezpólnymi, z Hudźbnym ćahom Wětnica/Čorny Chołmc a z bjesadu je so wčera nawječor skónčił swjedźenski kónc tydźenja, z kotrymž spominachu w Nowej Wjesce na 400. róčnicu prěnjeho naspomnjenja wsy. Zakład jubileja je kniha Alfonsa Frencla „Podłu Klóšterskeje wody“.
Wot minjeneho štwórtka bě wjesne towarstwo z předsydu Křesćanom Korjeńkom na čole wjacore zarjadowanja organizowało. Tak zahajichu swój swjedźeń štwórtk z dźaknej Božej mšu, kotruž swjećeše wosadny farar Měrćin Deleńk. Pjatk běchu wjesnjenjo na literarny wječor pola Dyrlichec přeprošeni. Tam přednjese Benedikt Dyrlich swoje basnje, a Radworčan Měrćin Wagner dopominaše na spočatki Nowowješćanskeje rejwanskeje skupiny kónc 1950tych lět, z kotrejež wurosće pozdźišo Wudworski wjesny ansambl. Sobotu připołdnju steješe volleyballowy turněr ze sydom mustwami na programje, popołdnju bě dźěćacy swjedźeń. Wječor přizamknychu so reje z kapału JANKAHANKA a diskoteku.
Kružny wobchad skónčnje hotowy
Wo towarstwje rozmyslować
Dobrošicy (aha/SN). Kóžde lěto 24. junija přewjeduja w Dobrošicach patronatny swjedźeń swojeje kapałki, kotraž je swjatemu Janej poswjećena. Folklorneho festiwala dla jón wo tydźeń přestorčichu. Tež tónraz je so Hubert Žur z pomocu młodych swójbow a dalšich wo to starał, zo tradiciju janskeho swjedźenja zachowaja.
Swjatočnu Božu mšu swjećeše farar Měrćin Deleńk. W swojim prědowanju chwaleše wón zhromadnu zamołwitosć wjesnjanow wo jich kapałku, pokaza pak tež na trěbne změny w biskopstwje. Wosada dyrbi pruwować, hač móže wšitke dotalne twary w swojej zamołwitosći wobchować. Tuchwilu Chróšćanska wosada k Dobrošicam steji. Biskopstwo pak namjetuje wo tym rozmyslować, załožić zapisane towarstwo, kotrež móhło Dobroščansku kapałku jako městno modlenja přichodnym generacijam zachować.
Hotel ćěkancam dale wotewrjeny
Budyšin (SN/JaW). Sprjewiny hotel při spjatym jězorje wostanje ćěkancam wotewrjeny. Z njeho ma nastać integraciski centrum za připóznatych ćěkancow, rozprawjeja regionalne medije. Kaž zdźěla MDR, spěchuja Swobodny stat Sakska, wokrjes a město Budyšin projekt najprjedy hač do kónca lěta.
Wjacore tydźenje běchu zamołwići wo přichodźe Sprjewineho hotela wuradźowali. Mjeztym nimale tři lěta bydla w bywšim štyrihwězdowym hotelu požadarjo azyla. Dźeń a mjenje ćěkancow dla pak njeje imobilija hižo jako hospoda ćěkacym trěbna. Tak nochcyše wokrjes zrěčenje z wobsedźerjom Peter-Kilianom Rauschom, kotrež srjedź julija wuběži, spočatnje hižo podlěšić. Budyski krajny rada Michael Harig (CDU) pak bě za móžnosću pytał, dom dale za ćěkancow wužiwać. Rausch chce stwy nětko wobnowić dać a so potom wo ćěkancow starać, kotrychž próstwa wo azyl bu přizwolena. Ze swojimi sydom sobudźěłaćerjemi chce ćěkancam pomhać bydlenje a dźěło nańć kaž tež němsku rěč nawuknyć.
Krótkopowěsće (03.07.17)
Marwu El-Sherbimi wopominali
Drježdźany. Wosom lět po morjenju Marwy El-Sherbini w Drježdźanach su Egyptowčanku sobotu wopominali. Rada wukrajnikow a přihotowanski kruh wopominanja běštej, kaž minjene lěta, wobydlerjow namołwałoj před krajnym sudnistwom běłe róže połožić. W twarjenju bě skućićel 1. julija 2009 młodu žonu z hidy na wukrajnikow zakłół.
Pěskowcowy blok wotstronili
Hřensko. Nawodnistwo narodneho parka Čěska Šwica je 60 tonow ćežki a třiceći kubiknych metrow wulki pěskowcowy blok wotstronić dało. Kamjeń hrožeše na sylnje wužiwanu turistisku šćežku pola skalneho mosta Pravčická brána padnyć. Tajki zasah do njemylenych přirodnych wobstejnosćow narodneho parka je skerje wuwzaće, bě pak trěbny.
Mjenje howjadow, wjace swini
Kamjenc. W Sakskej je tak mało howjadow kaž dołho nic. Z něhdźe 487 500 skoćatami je wobstatk na najnišim stawje po lěće 2008, zdźěla krajny statistiski zarjad w Kamjencu. Najbóle woteběrała je ličba dejkow, tuchwilu je jich w swobodnym staće hišće 183 000. Porno tomu je so ličba swini wo 0,2 procentaj na nětko 654 600 skoćatow zwyšiła.
Skoržić njepomha
Płaćizny za hort wostanu samsne
Nowowutworjeny hort w Njebjelčanskim dźěćacym dnjowym přebywanišću zaběraše wčera čłonow tamnišeje gmejnskeje rady. Po tym zo běchu so rozsudźili, swójski hort wutworić, je nětko tež jasne, kelko maja starši za njón płaćić.
Pěskecy (SN/MWj). Za přebywanje swojich dźěći w nowowutworjenym horće w Njebjelčicach změja starši runje telko płaćić, kaž hdyž bychu jich dźěći we Worklecach do horta chodźili. „Na te wašnje nima nichtó njelěpšiny z toho, zo jeho dźěćo do Njebjelčanskeho horta chodźi“, rjekny wjesnjanosta Tomaš Čornak (CDU) na wčerawšim posedźenju gmejnskeje rady w Pěskecach.
Krajny a wokrjesny młodźinski zarjad stej mjeztym přihłosowałoj, zo móža za 14 holcow a hólcow 1. lětnika w šulskim lěće 2017/2018 w Njebjelčanskej pěstowarni hort wutworić. Rjadować pak nětko hišće dyrbja, kak transport dźěći po šulskej wučbje z Worklec do Njebjelčic organizuja a kak tomu zadźěwaja, zo je tele jězdźenje z přidatnymi wudawkami zwjazane.
Krótkopowěsće (30.06.17)
Smědźa hort powjetšić
Worklecy. Sakski krajny młodźinski zarjad je Worklečanskej gmejnje dowolił, zo smě wot šulskeho lěta 2017/ 2018 swój hort wo 15 na cyłkownje 95 městnow powjetšić. Kaž wjesnjanosta Franc Brusk (CDU) zdźěli, pak to woznamjenja, zo dyrbja w šuli dalšu rumnosć za hort woprować. Byrnjež připrajenje dotal jenož ertne było, móža rumnosć hižo nětko přihotować.
Lěhwo dyrbi wupadnyć
Choćebuz. Delnjoserbske młodźinske lěhwo Rěčneho centruma WITAJ lětsa wupadnje, kaž delnjoserbski rozhłós rozprawja. Jeničce třo zajimcy běchu so přizjewili, poskićił bě RCW dwaceći městnow. Přizjewjeni zajimcy móža so na Witaj-campje wobdźělić, kotryž budźe wot 6. do 11. awgusta w Jarješku. Přizjewjenja za njón su hač do 16. julija móžne.
Dźěłowe wiki dale pozitiwne
Budyšin. We wuchodnej Sakskej je wuwiće na dźěłowych wikach dale pozitiwne, rjekny dźensa Ilona Winge-Paul z Budyskeje agentury za dźěło. Kónc junija bě 20 505 ludźi bjez dźěła, 2 740 mjenje hač před lětom. Kwota bjezdźěłnosće wučinja 7,2 procentaj. Budyska agentura móže něhdźe 4 500 swobodnych dźěłowych městnow posrědkować.
W chorowni nětko tež krótkodobne hladanje móžne
Kamjenc (BG/SN). Wot spočatka julija poskići Kamjenska chorownja maltezow swj. Jana stacionarne hladanske městna na krótki čas. We wobłuku dnja wotewrjenych duri su zajimcam wutoru tónle nowy poskitk, wopřijacy dwaceći městnow, předstajili. „Zastaranje w chorowni maltezow so tak wo wažnu komponentu rozšěri“, rjekny jednaćel za medicinu a hladanje němskich maltezow dr. Franz hrabja von Harnoncourt.
Přitomny bě tohorunja překupski direktor maltezow za Saksku a Braniborsku Florian Rupp, jako sej něhdźe 80 ludźi nowe móžnosće wobhlada. Nad nimi wjeseleše so tohorunja zastupowacy Kamjenski wyši měšćanosta Jörg Bäuerle. To woznamjenja lěpšu žiwjensku kwalitu za tych, kotřiž su hladanja potrěbni, ale tež za tych, kotřiž jich hladaja.
Wot sobudźěłaćerjow krótkodobneho hladanja chcychu wopytowarjo mjez druhim wědźeć, kajke su dnjowe wotběhi a kotre móžnosće terapije Kamjenska chorownja skići. Za to maja na přikład fyzioterapeutiske a ergoterapeutiske móžnosće runje tak kaž socialnu słužbu.
