Krótkopowěsće (15.09.16)

štwórtk, 15. septembera 2016 spisane wot:

„Platu“ sobu barbić

Budyšin. Jutře wotměje so wulka molowanska akcija na Budyskich Žitnych wikach. Na tak mjenowanu „platu“ su wšitcy přeprošeni, kotřiž chcedźa ju z barbami wuhotować. Skupina angažowanych měšćanow, mjez kotrymiž su tež Serbja, přeproša zajimcow wot 10 hodź. hač do popołdnja na tele zarjadowanje. Wječor chcedźa prawicarjo pod Bohatej wěžu demonstrować.

Za wjac studentow

Choćebuz. Z nowymi studijnymi směrami chce Braniborska techniska uniwersita Choćebuz-Zły Komorow (BTU) wjace studentow přiwabić. K tomu słušeja orientaciski studij a štyri dualne studijne směry, kotrež so nazymu zahaja. Tole praji dźensa prezident BTU Jörg Steinbach w Märkische Oderzeitung.

Lětsa mjenje baćonow

Drježdźany. Baćony ze Sakskeje su so na puć do swojich zymskich kwartěrow nastajili. Wjetšina hnězdow je mjeztym prózdna, zdźěli Sylvia Siebert z Drježdźanskeho přirodoškitneho instituta. Ličba młodych baćonow pak je so wo nimale sto pomjeńšiła. Bě jich loni w Sakskej hišće 618 młodźatow, liči přirodoškitny institut lětsa jeno z 520.

Kral přezahe swjećił

Policija (15.09.16)

štwórtk, 15. septembera 2016 spisane wot:

Drasta na zahrodźe fuk

Budyšin. Předewšěm na žonjacu drastu měrješe so njeznaty, kiž bě w nocy na wutoru w Budyšinje po puću. Kaž policija rozprawja, posłužowaše so wón z drastysušaka na zadnim dworje na Weigangowej. Tam zhubichu so hnydom tři na­drowcy a dwaj slipaj. Nimo toho je paduch paket klamorčkow z kwětkacym motiwom kaž tež měšk z dalšimi klamorčkami, kotrež na sušaku wisaše, sobu wzał. A skónčnje lubješe so cuzemu abo cuzej tež hišće šěra žonjaca sportowa jaka znački „Vaude“ z běłym zasmykom. Wobsedźerce nasta dohromady něhdźe 260 eurow škody.

Sportnišćo nětko přepodadźa

štwórtk, 15. septembera 2016 spisane wot:

Serbske Pazlicy. Wulki wokomik budźe jutře za Njebjelčanske sportowe towarstwo. Jeho nowe sportnišćo w Serbskich Pazlicach chcedźa w 17.30 hodź. oficialnje přepodać. K tomu budźe kopańca za dźěći, kotrež móža so tež na skakanskim hrodźe wucychnować.

Wustajeńca so skónči

Budyšin. Přehladka Budyskeho Serbskeho muzeja „Pruhi, kruhi, třiróžki – Pisane serbske jutrowne jejka“ so njedźelu, 18. septembra, skónči. Tón dźeń budźe wot 15 hodź. poslednje wodźenje po wustajeńcy starodawnych mustrow a ornamentow w ludowym wuměłstwje. Wot 16 hodź. zahudźa čěscy a němscy hudźbnicy na zhromadnym koncerće na žurli muzeja. Serbski muzej je jedna ze stacijow koncertneho rjadu we wokolinje němsko-čěskeje mjezy z wobdźělenjom Turnowskeho orchestralneho zwjazka. Repertoire zestaja so ze staršich a no­wšich kompozicijow.

Swjedźeń a muzejowa nóc

Jara porjadne dźěło smě so štyrjom přistajenym dźěłaćerjam gmejny Pančicy-Kukow wobkrućić, kotřiž tuchwilu kromu puća Při młónčiku twarja. Puć hač k poprawnej mjezy ležownosćow rozšěrja a ze zornowcowymi kamjenjemi wobdadźa. Nimo toho nastanu wuliwy, po kotrychž ma dešćikowa woda lěpje wotběžeć. Na kóncu dóstanje puć nowu asfaltowu worštu. Při dźěle wobkedźbowachmy dźensa Handrija Bjeńša, Heinera Lubka, Martina Kreuza a Bosćija Domašku (wotprawa). Foto: SN/Maćij Bulank

Dobytk za kulturu regiona

srjeda, 14. septembera 2016 spisane wot:

Z jónkrótnej přiražku gmejna Łaz Mortkowsku twjerdźiznu podpěruje

Łaz (AK/SN). Za dźiwadłowe inscenacije na Jakubecec twjerdźiznje w Mortkowje přida Łazowska gmejna klětu jónkrótnje 2 100 eurow. Tole su wčera Łazowscy gmejnscy radźićeljo wobzamknyli a tak próstwje mějićela twjerdźizny dr. Andréja Jakubetza wotpowědowali.

Dr. Jakubetz bě so pola kulturneho ruma ­Hornja Łužica-Delnja Šleska wo spěchowanje moderneje swěcoweje a zwukoweje techniki prócował. Po płaćiwych směrnicach pak ma so wotpowědna gmejna – w tym padźe Łazowska – z pjeć procentami wobdźělić. „Jako priwatna wosoba po zakonju tele pjenjezy přidać njesměm“, rozłoži Jakubetz. Wón chce twjerdźiznu jako kulturne městno dale wutwarić. Hakle njedawno je tam Serbski ludowy ansambl hrodowej nocy wuhotował a chce to tež klětu. Sakske krajne jewišća so klětu tohorunja w Mortkowje znowa prezentuja. Předewšěm inscena­cije za swójby chcedźa tule pokazać. Techniku sej stajnje wupožčować pak načinja­ wudawki. Tuž ma swójska technika wotpomhać.

Klětu snano zaso ze swjedźenskim ćahom

srjeda, 14. septembera 2016 spisane wot:

Komorow (HN/SN). Hakle prěni kónc tydźenja w septembru běchu w Komorowje pola Klukša wulke zetkanje woso­bowych awtow typa VW Käfer přewjedli. A hižo minjeny kónc tydźenja steješe w samsnej wsy 54. holanski swjedźeń na programje. Zakład dołheje tradicije bě w lěće 1956 Domowina połožiła. Pod jeje wjednistwom wuwiwaše so Komorowski swjedźeń k jednomu z najwjetšich tehdyšeho Budyskeho wokrjesa. Po přewróće dóńdźe k přestawce, kotruž pak 1999 ze załoženjom towarstwa Komorowske holanske zetkanje skónčichu a swjedźeń wožiwichu.

Prěni wjeršk bě minjeny pjatk smól­nicowy ćah, kotremuž přizamknychu so reje hač do nocy. Sobota steješe cyle w znamjenju sporta, jako wuslědźichu dobyćerjow pokalow wjesnjanosty w třělenju, darće, kehelowanju a volleyballu. Njedźela bě swójbam wěnowana. Tak mějachu dźěći na swjedźenišću swoje zawjeselenja, liveband nA und postara so wo spodobnu hudźbu, a w tomboli sy móhł jako hłowne myto koleso dobyć. Překwapjenka bě popoł­dnju demonstracija moderneje žnjenskeje techniki.

Najstarša Budyšanka 107 lět

srjeda, 14. septembera 2016 spisane wot:
Z wulkim kwěćelom a najlěpšimi přećemi sakskeho ministerskeho prezidenta je so Budyski wyši měšćanosta Alexander Ahrens (njestronjan) wčera na puć do Židowskeje hladarnje nastajił. Tam gratulowaše wón w stwě połnej kwětkow najstaršej wobydlerce sprjewineho města Annje Cernohorskej k 107. narodninam. Žortniwa a nad žiwjenjom radowaca so staruška je wobdźiwajomnje strowa. Wot lěta 1946 bydli wona w Budyšinje a so mjeztym hižo šěsć lět w hladarni derje čuje. Jeje žiwjenske hesło rěka: stajnje optimistisce na žiwjenje zhladować! Foto: André Wucht

Jónu tak jónu hinak rozsudźili

srjeda, 14. septembera 2016 spisane wot:

Radwor (SN/MWj). W jara emocionalnej diskusiji su čłonojo Radworskeje gmejnskeje rady na swojim wčerawšim posedźenju cyle rozdźělnej rozsudaj tworili, byrnjež so wo samsne wuchadźišćo jednało. We woběmaj padomaj zaběrachu so woni z twarskimaj próstwomaj w tak mjenowanym wonkownym wobłuku.

Łupjanski ratar chce bydlenski dom a pódlanske hospodarske twarjenja kaž tež halu natwarić, zo móhł swój ratarski zawod dale wjesć. Tejle próstwje radźi­ćeljo wotpowědowachu, wobkrućejo to z hospodarskim spěchowanjom domoródnych předewzaćelow. Druhu próstwu bě předewzaćel ze starych zwjazkowych krajow zapodał. Wón chce tohorunja we Łupoji hospodarski a běrowowy dom za swój lěsniski zawod natwarić. Tole pak radźićeljo raznje wotpokazachu, dokelž twarske wotpohlady pječa přirodu niča. Tomu měło so po słowach parlamentnikow na kóždy pad zadźěwać. Na naprašowanje SN mjenuje wjesnjanosta Wincenc Baberška (CDU) tule diskusiju „wohańbjacu“ a „wot zawisće ćěrjenu“.

Krótkopowěsće (14.09.16)

srjeda, 14. septembera 2016 spisane wot:

Sezona najwuspěšniša była

Zły Komorow. Hrajna doba 2015/2016 bě za Złokomorowske Nowe jewišćo najwuspěšniša minjenych dźesać lět. Tak su pod intendantom Manuelom Soubeyrandom dohromady 73 030 přihladowarjow witali. Lětsa zhladuje Złokomorowske dźiwadło na 70lětne wobstaće. Nowu sezonu zahaja 24. septembra ze swjedźenjom „Wir sind 70! Das Fest“.

Zjawne ertne jednanje

Luxemburg. Europske sudnistwo w Luxemburgu chce prawnisku naležnosć iniciatiwy Minority SafePack přećiwo komisiji EU pjatk, 16. septembra, w zjawnym jednanju wobjednać. To zdźěli dźensa Federacija europskich narodnych mjeńšin (FUEN). Jeje prezident Loránt Vincze rěči wo „mězniku za FUEN a aw­tochtone mjeńšiny w Europje“. Komisija EU bě namjety federacije před třomi lětami bjez wobkrućenja wotpokazała.

W Sakskej wuběrne žně

Policija (14.09.16)

srjeda, 14. septembera 2016 spisane wot:

Drohi diagnozowy nastroj fuk

Mužakow. Wšelki grat kaž tež kompjuter su njeznaći w nocy na póndźelu z awtoweje zamkarnje w Mužakowje pokrad­nyli. Tež diagnozowy nastroj ležeše njezamknjeny w hali, a zadobywarjo njedachu sej dwójce kazać jón sobu wzać. Tele nastroje su paducham awtow wulce witane, dokelž móža z nimi motor jězdźi­dła tež bjez klučika startować. Rada policije, diagnozowe nastroje kaž pjenjezy po dźěle do trezora zamknyć, njebu w tymle padźe wobkedźbowana. Škoda wučinja 10 000 eurow.

nowostki LND