Krótkopowěsće (04.07.17)

wutora, 04. julija 2017
artikl hódnoćić
(0 )

Mólby Lohsy wupožčili

Budyšin. Muzej Budyšin je ze swójskeje wustajency nimale wšitke twórby molerja Carla Lohsy (1895–1965) Hamburgskemu Ernsta Barlachowemu domej za wosebitu přehladku wupožčił. Galeriju mólbow w Budyskim muzeju su tohodla přetworili, kaž wottam rěka. Na městnje mólbow Lohsy wisaja nětko wobrazy Horsta Bachmanna (1927–2007).

Dalše miliony přepokazane

Drježdźany. Sakska dyrbi za swoju bywšu krajnu banku dalše pjenjezy nałožić. W druhim kwartalu lěta je swobodny stat ze swojeho garantijoweho fondsa 18,6 milionow eurow Badensko-württembergskej krajnej bance jako nowej wobsedźerce přepokazał, zdźěla financne ministerstwo. Krajnu banku běchu 2007 předali, rukujo z 2,75 miliardami eurow za rizika.

Wopominaja wopory komunizma

Praha. Na fasadach štyrjoch domow čěskeje stolicy připrawichu njedawno wopominanske taflički. Na nich steja mjena kaž tež wosobinske daty za čas komunizma wotprawjenych wosobow. „Na kopolaki“ podobny dopomnjenski projekt „Poslednja adresa“, załoženy přez organizaciju Memorial w Ruskej, so tak tež w Čěskej republice rozšěrja.

wozjewjene w: Krótkopowěsće
Prošu přizjewće so, chceće-li komentar podać

Serbska debata

nowostki LND