Róžant (JK/SN). Dlěje hač dźesać lět su domjacnosće při Róžeńčanskej Putniskej šćežce na nowy wodowód a z nim zwjazany čujomny wyši ćišć w syći čakali. Prěni raz wuradźowali běchu wo tym, ponowić wodowód k zastaranju domjacnosćow na Putniskej šćežce, hižo w lěće 2005. Na wonym posedźenju z wobydlerjemi tehdyši jednaćel Kamjenskeho zastaranskeho zawoda EWAG přilubi, ručež móžno, wodowód k zastaranju domjacnosćow na mjenowanym puću ponowić. Tamniše domjacnosće su hišće přizamknjene dźělej něhdyšeje wjesneje syće.
Wobydlerjo dóstawaja drje kaž wšitcy druzy Róžeńčenjo swoju wodu z Kamjenca, ale přez železnu rołu, kotraž je po lětach zezerzawjena a jara mało wody přepušća. Domjacnosće mějachu zdźěla tak mało wody, zo njemóžachu so ani w samsnym času kupać abo dušować. Tež płokawy a wopłokowanske mašiny dyrbjachu wěstoty dla w nocy běžeć. Kónc lěta 2015 mějachu wobydlerjo samo dwójce krótko za sobu cyły dźeń bjez wody wutrać, dokelž bě so roła puknyła.
