Z wuslědkom hońtwy spokojom

srjeda, 25. apryla 2018
artikl hódnoćić
(0 )

Ralbicy (JK/SN). Wo tójšto lěpša hač loni běše bilanca hajnikow na njedawnej zhromadźiznje Ralbičanskeho hońtwjerskeho drustwa. Sydom sornow, šěsć dańkow, dwanaće dźiwich swini, sydom liškow a tež šupaj stejachu na lisćinje delanskich hońtwjerjow. Zo ma wjelk na hišće lěpšim wunošku hońtwjerskeje zaběry wěstu winu, njemóža hońtwjerjo tak jednorje zamjelčeć. Prezenca šěreho rubježnika wuskutkuje so na wotběh lětneho a wšědneho cyklusa tamnišeje dźiwiny. Diskusija wo nim pak wosta w Ralbicach wěcowna a z hońtwjerskeho wida fairna.

Dotalni třo hajnicy, kotřiž su jako hońtwjerske zjednoćenstwo hońtwu na 341 hektarach Ralbičanskeho drustwa wotnajeli, přepodachu hońtwjersku zamołwitosć do rukow młodych Ralbičanow. To předsydu drustwa Bjarnata Brězana wosebje zwjesela. Serbski dorost njetyje jenož drustwu, ale wožiwja zdobom drustwowe a towaršnostne žiwjenje w Delanach. Je to tohorunja pokazka na to, zo so młodźi ludźo za přirodu a jeje wobhospodarjenje zajimuja.

Hłowna tema hłowneje zhromadźizny bě so hižo loni připowědźiła. Zo móhło drustwo wotnajenske dochody swojim čłonam sprawnje rozdźělić, je trěbne, měć přehlad wo tym, štó kotru ležownosć wobsedźi. Za to je so předsydstwo prócowało wot katastroweho zarjada w Kamjencu dóstać wotpowědne podłožki. Te pak njejsu dóstali. Nětko su čłonojo drustwa namołwjeni, podać dopokazy wobsydstwa ležownosćow. Nimo toho pomha předsydstwu tež informacija wo změnjenych wobsydstwowych poměrach. To njeje jenož wuměnjenje za wupłaćenje podźělneje danje, ale zdobom zakład za trěbne mnóstwo hłosow při schwalenju wobzamknjenjow drustwa. Z poměrnje derje pjelnjeneje pokładnje by so po rozprawje pokładnika Michała Kubańka móhł wěsty podźěl wupłaćić. Sprawnosće dla je trěbne, měć dokładny přehlad wo zapisu ležownosćow drustwownikow. Kaž předsyda Bjarnat Brězan zdźěli, maja podobne starosće tež w druhich drustwach we wobłuku zarjadniskeho zwjazka Při Klóšterskej wodźe. Tohodla wón čłonow namołwja, tež w swójskim zajimje tak spěšnje kaž móžno zapodać podłožki wo ležownostnych poměrach respektiwnje změny předsydstwu zdźělić.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND