Łužiske mjetarske towarstwo Wojerecy chce dźěćom ćěkancow ...
Štyrjo kandidaća
Krótkopowěsće (31.03.16)
Na kongres pasiona dla
Chrósćicy. Zastupjerjo Chróšćanskeje wosady su so dźensa na 32. mjezynarodny kongres Europasion do pólskeho Cieszyna podali. Dźesaćwosobowa skupina pod nawodom Jurja Špitanka, kiž lońše pasionske hry w Chrósćicach nawjedowaše, budźe tam hač do njedźele. Styki k druhim, kotřiž tohorunja pasion předstajeja, bě wón minjene lěta nawjazał.
Město filmowcy rady wužiwaja
Liberec. Liberec je mjez filmowcami jara woblubowany, wšako bě motiw w dźesatkach čěskich kaž tež wukrajnych dokumentarnych a hrajnych filmow abo serialow. Přichodnje chcyła tamniša radnica filmowe skupiny hišće wuraznišo a bóle systematisce wabić. Zaměr je, docpěć wot agentury Czech Tourism wupisany titul „Film Friendly Region“.
Šešelj wuwinowany
Policija (31.03.16)
Ze sornikom so nasadźałoj
Tři Hwězdy. K njewšědnemu zasadźenju wołachu wutoru wječor sobudźěłaćerjow Techniskeho pomocneho skutka a zastojnikow awtodróhoweje policije do lěska při statnej dróze S 105 mjez Třomi Hwězdami a Słonej Boršću. 13lětnaj hólcaj wołaštaj tam wo pomoc. Kaž wonaj rozprawještaj, bě jeju sornik nadpadnył. Po wšěm zdaću běštaj hólcaj do toho stadło sornow wobkedźbowałoj a při tym sćerpnosć sornika strapacěrowałoj. Zranjeneju hólcow dowjezechu do chorownje. Policisća informowachu staršich a wzachu kolesy małeju dyrdomdejnikow sobu. Sornik bě so mjeztym dawno zminył.
Mlokowe kany pomolować
Miłoćicy (SN). Křesćansko-socialny kubłanski skutk (CSB) a Sakski krajny kuratorij přewodźatej wot lěta 2012 akciju „Žiwidła su wažne“. Sakske ministerstwo za wobswět a ratarstwo tule iniciatiwu tohorunja podpěruje. Kmótřistwo je sakski ratarski minister Thomas Schmidt (CDU) přewzał. We wobłuku akcije „Žiwidła su wažne“ maja so po wšej Sakskej 15 trjebanych mlokowych kanow pomolować. K tomu su wšitcy wuměłcy a kreatiwni lajkojo namołwjeni, zdźěla CSB. Pomolować maja so mlokowe kany hač do 15. junija, a to za dobry skutk. Fantaziji njejsu žane hranicy stajene. Na 19. sakskim krajnym žnjowodźaknym swjedźenju w Torgauwje wot 16. do 18. septembra chcedźa pomolowane mlokowe kany zjawnosći předstajić. Wudawki za barbu a dźěłowy grat dóstanu wobdźělnicy zarunane. Jako dźak přewostaja jim dar z regionalnymi wudźěłkami w hódnoće pjećdźesat eurow.
Zajimcy njech so w Miłočanskim Křesćansko-socialnym kubłanskim skutku (CSB) pola Maika Brězana (tel. 035796/ 971-31 abo e-mailnje pod maik.bresan@ slk-miltitz) hač do 15. apryla přizjewja.
Ćežke časy za kasu
Město hišće bjez strukturneho koncepta
Běła Woda (AK/SN). Pjenježne połoženje Běłeje Wody je jara napjate. „Přichodne lěta zhubimy inwesticije we wobjimje wjace hač šěsć milionow eurow. To změje razne konsekwency“, podšmórny wyši měšćanosta Torsten Pötzsch (Klartext) na wčerawšim posedźenju tamnišeje měšćanskeje rady. Něhdźe dźesać milionow eurow přemysłoweho dawka za lěće 2014 a 2015 dyrbi město Vattenfallej wróćić. Zwyšenja wokrjesneho wotedawka dla dyrbja wot klětušeho 230 000 eurow wjace Zhorjelskemu wokrjesej płaćić. Nimo toho so wuskutkuje, zo ma Běła Woda po najnowšim ličenju 700 wobydlerjow mjenje. „Za nas woznamjenja to lětnje 400 000 eurow mjenje klučowych připokazanjow“, rjekny wyši měšćanosta.
Poradźene popołdnjo w klóštrje
Haleluja křižerjow je runje hakle womjelkło a hižo steješe Pančičanski klóšter Marijina hwězda znowa w srjedźišću zajima. Wčera běchu swójby na nalětni dožiwjenski dźeń do klóšterskeje zahrody přeprošene a su we wulkej ličbje přichwatali.
Pančicy-Kukow (JK/SN). Najebać aprylske wjedro je so wjele swójbow wčera podało do zežiwjenskeje a zeloweje zahrody klóštra Marijineje hwězdy w Pančicach-Kukowje na swójbny dožiwjenski dźeń. Organizatorojo z klóštra, zarjadniskeho zwjazka Při Klóšterskej wodźe, dźěłarnjow za zbrašenych a Miłočanskeho Křesćansko-socialneho kubłanskeho skutka kaž tež klóšterska zahroda běchu zaso wobšěrny a spodobny program zestajeli. Dołhož je wjedro dowoliło, pytachu dźěći na zelowej zahrodźe za jutrownymi jejkami, kotrež běchu mjez rostlinami schowane. Magnet popołdnja bě hnydom při zachodźe do zahrody zaměstnjeny: Hórčanski wowčer Gerat Šmit powědaše wo swojim powołanju. Dźěći smědźachu psaj a jehnjata tež pomajkać.
Štóž chce wědźeć a widźeć, kak su něhdy wjerchojo bydlili, ...
Policija (30.03.16)
Padustwu zadźěwał
Hamor. Měrne hodźiny jutrowneje póndźele chcyštaj paduchaj w Hamorje wužiwać a so do kioska blisko tamnišeje milinarnje zadobyć. Při tym pak njeličeštaj z kedźbliwosću wobydlerja, kiž je tomu zadźěwał. Kaž policija rozprawja, běštaj so mužej něhdźe w 23 hodź. do předawanišća zadobyłoj a sej wšelku rubiznu w hódnoće něhdźe tysac eurow přihotowałoj. Swědk pak tole wobkedźbowaše a informowaše policiju. Jednoho ze zadobywarjow 31lětny wobydler zadźerža a pozdźišo policistam přepoda. Tamny ćekny do ćmy. Při lepjenym skućićelu jedna so wo 45lětneho muža. Kriminalisća spytaja nětko tež twochnjeneho njeznateho dosahnyć.
