Wjele nowačkow a jubilarow
Nowosće a zajimawosće z lětušich křižerskich procesionow
Po wašnju swojich wótcow budu křižerjo tež lětsa w dźewjeć procesionach poselstwo wo zrowastanjenju Zbóžnika wozjewjeć. Kaž kantorojo a nawodźa procesionow na naprašowanje Serbskich Nowin zdźělichu, dožiwimy w jich rjadach někotružkuli nowosć a zajimawosć.
Tak chce w Budyskim procesionje prěni raz pólski duchowny sobu jěchać – kapłan Grzegorz Malinowski. To rjekny nam wjelelětny kantor Bosćij Čórlich. Wón drje sobu jěcha, strowotnych přičin dla pak lětsa kantorić njemóže. Tuž přewozmje za njeho tele zastojnstwo Florian Kaulfürst. Hižo trochu wjeselić smědźa so Budyscy křižerjo na klětu, hdyž podadźa so po wozrodźenju swojeho procesiona 25. raz do Radworja. Nimo dweju slěborneju jubilarow změja woni njedźelu w swojich rjadach pjeć nowačkow, štož je za tónle procesion nahladna ličba.
Policija (24.03.16)
Do pincow so zadobywali
Wojerecy. Pincy we wjaceswójbnych domach su nastajnosći cil paduchow. Zwjetša dźě bydla potrjecheni někotre poschody wyše, tak zo jim hnydom njenapadnje, hdyž běchu so paduši zadobyli. Tak su hakle nětko pytnyli, zo běchu so w nocy na minjenu póndźelu njeznaći na Wojerowskej Hasy měra do pincow wjaceswójbneho domu zadobyli. Mjez druhim pokradnychu woni tam točensku mašinu, kutowe rězadło a dalši elektriski grat. Cyłkownu wěcnu škodu trochuja na něhdźe 380 eurow.
Wupruwowanu praksu wobchowaja
Kulow (AK/SN). Swoje wodźizny a hrjebje chce město Kulow dale w swójskej režiji wobhospodarjeć. Při tym dowěrjeja dotalnej wupruwowanej praksy a technice. Toho bě sej měšćanska rada na swojim zašłym posedźenju přezjedna.
Budyski wokrjes bě namjetował, zwjazk za wobhospodarjenje wodźiznow 2. rjadowanje załožić, zo by so jich porjadny staw zawěsćił. „Hladać tele wodźizny je nadawk městow a gmejnow“, pisaše přirjadnica wokrjesa Birgit Weber loni nazymu komunam. Při tym dopominaše wona na sćěhi wulkeje wody 2010 a 2013. Tehdy je runje při wodźiznach 2. rjadownje tójšto škodow nastało, kotrež pak su dźakowano spěchowanskim programam mjeztym w dalokej měrje wotstronjene. Hdyž so zwjazk załoži, hodźeli so po měnjenju wokrjesa nadawki koncentrować, kóšty lutować a komunikacija zjednorić.
Chór Serbskeje zakładneje šule Budyšin je zawčerawšim z małym ...
Rjadny row rozšěrili
Łaz (AK/SN). Dwurěčne stawizny Łazowskeje ewangelskeje wosady wotbłyšćuja so nětko tež na tamnišim pohrjebnišću, hdźež steji nětko kaž čłowjek wulka stela z łužiskeho zornowca. Stajnje na dwěmaj bokomaj je tam němsce a serbsce napisane „Jezus Chrystus praji: Ja sym žiwy, a tež wy budźeće žiwi“. „Dwurěčny napis je wosadna rada namjetowała“, podšmórnje jeje čłon Günter Wjenk, „tak wuznawamy so k serbskim stawiznam a rěči we wsy a we wosadźe.“
K jubilejej rjenje ponowjena
Sulšečanska kapałka swj. Marka wobsteji 300 lět – Za ponowjenje Božeho domu su wjesnjenjo sobu darowali
Słónčne pruhi Sulšečansku kapałku swj. Marka wobdawaja. Ze swojimi přećelnymi ćopłymi barbami skutkuje wona runjewon přeprošowaca. „Loni nazymu smy kapałku ponowili, wonkowny wobmjetk wobarbili a sćěny nutřka wobělili. Tež wotwodźowanski system dešćikoweje wody je ponowjeny“, praji wjesny předstejićer Jurij Brösan. „Nětko chcemy hišće zwóńcu zwuporjedźeć a wobarbić.“ Hromadźe z Pětrom Kumerom, Janom Kumerom a Pawołom Čórlichom angažuje so wón w předsydstwje kapałki. Kónc februara běchu we wsy pjenjezy zběrali, zo móhli swójski podźěl wsy za saněrowanje zwjesć. „Dokonjane je“, zdychnje Jurij Brösan a so za kóždy jednotliwy dar dźakuje. „Nětko móžemy 300lětny jubilej kapałki 24. apryla woswjećić.“
Drohotne dary zničene
Dojutrowne rjedźenje
Kaž minjene lěta tak stej tež nětko zaso Němčanski wjesny klub a dobrowólna wohnjowa wobora nalětnje rjedźenje organizowałoj. Tak zetka so minjenu sobotu wjace hač 30 mužow z dźěłowym gratom, zo bychu kromu statneje dróhi a pućniki we wsy wurjedźili. Hdyž jutrońčku cyrkwinske chorhoje zmawuja a křižerjo so na puć do Kulowa podadźa, ma wjes čista być. Wšako pojědu mnozy ludźi z druhich kónčin přez Němcy.
Dźěła bě dosć, dokelž bě přez zymu wšitko chětro zanjerodźene. Dźiwamy so, zo město Wojerecy tu awto z rjedźenskej techniku njezasadźa.
Druha skupina muži dźěłaše při wjesnej kapałce. Tam wurězachu hałzy štomow a rjedźachu městno před kapału a pućniki wokoło njeje. Hdyž dźěło zakónčichu, běchu wšitcy spokojom a zwěsćichu, kak wažna wjesna zhromadnosć je. Achim Nowak
Policija (23.03.16)
W lěsu so zranił
Załom. Kak strašne móže dźěło w lěsu być, dyrbješe wčera nawječor młody muž pola Załomja nazhonić. 26lětny tam drjewo rězaše, jako jemu z dotal njeznateje přičiny tołsta hałza na hłowu padny. Na zbožo měješe wón nahłownik, kotryž žiwjenjastrašnym zranjenjam zadźěwa. Přiwšěm dowjezechu muža do chorownje.
Dwójce tak spěšnje
Lěskej. Wobchadna kontrolna słužba Zhorjelskeje policajskeje direkcije je zawčerawšim na zwjazkowej dróze B 156 w Lěskej spěšnosć awtow měriła. Ze 611 kontrolowanych jězdźidłow bě kóžde wosme spěšniše hač dowolene 50 km/h. 74 razow je błysknyło. Šofera Audija z Bonnskim čisłom lepichu ze 103 km/h. Muž změje 280 eurow płaćić, dóstanje dwaj dypkaj a dyrbi měsacaj nóžkować.
Přičiny podróšenja pomjenowane
Wjacore tydźenje a měsacy su so we Wojerowskej radnicy z prašenjom zaběrali, čehodla bě twar noweho wobydlerskeho centruma tójšto dróši hač planowany. Wčera dóstachu měšćanscy radźićeljo wjacore wotmołwy.
Wojerecy (AK/SN). Přidatne wudawki 760 000 eurow při twarje Wojerowskeho wobydlerskeho centruma Piwarska hasa 1 změja konsekwency. Tole připowědźi wyši měšćanosta Stefan Skora (CDU) na wčerawšim posedźenju měšćanskeje rady. Wón rozłoži radźićelam kónčnu rozprawu wuběrka „Piwarska hasa 1“, kotryž chcyše wot zarjadnistwa wotmołwy na 49 prašenjow.
„To bě jara dołhi proces“, rjekny Stefan Skora. Njeje pak tak, zo by něchtó z wobdźělenych dopokazujomnje swoje winowatosće zanjechał. Skerje rěčeše Skora wo cyłej lisćinje přičinow. Tak su projekt předołho planowali a přihotowali, tele dźěło samo nachwilnje přetorhnyli a lěta 2008 dale wjedli. 2014 měješe wšitko hotowe być, twarske dźěła pak trajachu hač do awgusta 2015. Hižo prjedy, hač su twarić započeli, podróšichu so twarske kóšty wo šěsć procentow, hač do kónca projekta rozrosćechu wone wo 15 procentow.
Bjez pasa hižo njepojědu
„Je kliknyło?“ rěkaše akcija, při kotrejž móžachu šoferojo wot póndźele hač do dźensnišeho na awtodróhowym wotpočnišću „Hornja Łužica“ pola Słoneje Boršće sami nazhonić, kotre wuskutki ma, hdyž we wosobowym abo nakładnym awće připasany njejsy. Tež redaktor Serbskich Nowin chcyše to wědźeć.
Sam bych wo sebi rjekł, zo sym nastupajo připasanje w awće porjadny wobdźělnik nadróžneho wobchada. Rano na dźěło, popołdnju domoj, wječor raz słužbny termin abo do Kamjenca něšto wobstarać – to so někak awtomatisce připasam. Ale spěšnje raz we wsy nakupować abo tankować jěć – to žno wěstotny pas tež raz wostanje, hdźež je. A runje to móhło zahubne być.
