Při busowym zastanišću twarja

srjeda, 14. februara 2018
artikl hódnoćić
(0 )
W aprylu započnu w Budyšinje tónle wotrězk Tuchorskeje hasy ponowjeć. Buso weho dwórnišća dla (naprawo) činja to w mjeńšich wotrězkach.  Foto: Steffen Unger W aprylu započnu w Budyšinje tónle wotrězk Tuchorskeje hasy ponowjeć. Buso weho dwórnišća dla (naprawo) činja to w mjeńšich wotrězkach. Foto: Steffen Unger

Za ponowjenje poslednjeho wotrězka Tuchorskeje w Budyšinje je měšćanska rada nětko zelenu swěcu dała. Hinak hač na druhich městnach njetrjebaja za to žane štomy pušćić.

Budyšin (CK/SN). Jednohłósnje je Budyska měšćanska rada na swojim zašłym posedźenju wobzamknyła, posledni hišće njesaněrowany dźěl Tuchorskeje hasy wot Friedricha Engelsoweho naměsta hač k wotbóčce na Liebknechtowu wobšěrnje ponowjeć. Najwjetši problem při tym je centralne busowe dwórnišćo. Tohodla chcedźa projekt we wjacorych mjeńšich wotrězkach zwoprawdźić a 2. apryla započeć, bjez toho zo přijězd k busowemu dwórnišću zahaća. Na cyłkownej naprawje wobdźělene su nimo wysoko- a hłubokotwarskeho zarjada města tež měšćanski wopłóčkowy zawod a energijowe a wodowe zawody města. Tuchwilu mjenujcy nimaja tam hišće žane porjadne wotwodźowanje dešćikoweje wody, a nadróžne wobswětlenje dyrbja tohorunja ponowić.

Přepytujo w mjenowanym wotrězku zemske woršty zwěsćichu w snadnej hłubokosći skału, štož so na kóšty wuskutkuje. Nimo toho skedźbni nawoda twarskeho zarjada Falko Wendler na špatny staw plestrowaneje dróhi. Tež wodźenski system za slepych a špatnje widźacych aktualnemu stawej njewotpowěduje. „Wulke starosće načinjeja nam štomy. Wone su přewusko wobtwarjene, čehož­dla so prawje wuwiwać njemóža. Jich dla je­ so jězdnja z městnami zbě­hnyła“, wón rozłoži. Městnosć wokoło štomow tuž powjetša. Pušćeć pak je nje­trjebaja. Toho dźě běchu so wobydlerjo bojeli. Kaž Falko Wendler měšćanskim radźićelam rjekny, budu samo někotre nowe štomy sadźene.

Jězdnju Tuchorskeje rozšěrja na 6,50 metrow, tak zo móža tam busy bjez problemow nimo sebje jěć. Město parkowanja do jězbneho směra budu jězdźidła přichodnje na wupokazanych městnach parkować móc. Tam składu potom plesternaki, z kotrymiž je puć nětko hišće wukładźeny.

Loni nazymu wotmě so wobydlerska zhromadźizna. Zasadźić chcedźa twarnišćoweho koordinatora za wobydlerjow, praji Falko Wendler. Kak wobchad za čas twarnišća powjedu, dyrbja sej hišće dorěčeć. Twarske dźěła maja po wšěm zdaću hač do 29. septembra trać. Projekt płaći cyłkownje 740 000 eurow, z toho dóstanu 130 000 eurow ze spěchowanskich horncow.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND