Hajnicy z bilancu njespokojom

pjatk, 09. měrca 2018
artikl hódnoćić
(0 )

Hońtwjerske drustwo Nowoslicy hłownu zhromadźiznu přewjedło

Nowoslicy (JK/SN). Čłonojo Nowosličanskeho hońtwjerskeho drustwa móža so wjeselić. Woni dóstanu w přichodnych tydźenjach dźěl dochodow z wotnajenskich zrěčenjow drustwa podźělnje wupłaćeny. Předsydstwo bě to rozsudźiło, kaž předsyda drustwa Pětr Wawry čłonam na lětušej hłownej zhromadźiznje drustwa w Nowoslicach zdźěli. Na Kamjenskim katasterowym zarjedźe wobstarachu sej aktualny zapis wobsedźerjow ležownosćow wokoło Nowoslic. ­Nimo toho dóstachu wšitke konkretne daty čłonow kaž tež wobsedźerjow ležownosćow. Nětko móža z derje pjelnjeneje kasy drustwa kóždemu woprawnjenemu čłonej wupłaćić dwaj euraj na hektar přenajateje płoniny, wróćo sahajo hač do lěta 2009. To drustwownikow wězo zwjeseli. Tójšto z nich je so na lětušej hłownej wobdźěliło, pokazujo zajim na drustwje a dźěle předsydstwa a hajnikow.

Tak spokojom kaž čłonojo drustwa wšak hajnicy, kotřiž na Nowosličanskich honach na hońtwu chodźa, njeběchu. Woni maja tójšto dźěła, zo bychu dźiwinowe wopory wobchadnych nje­zbožow z dróhow rumowali. Tak dyrbjachu loni jědnaće sornow zrumować, kotrež njeběchu zražku z awtom přežiwili. Sorny bychu hajnicy radšo při łakańcy abo při wulkej hońtwje před flintu měli. Při tajkich składnosćach wšak jim hońtwjerske zbožo tak njekiwaše. Wulku hońtwu běchu z jeno snadnym wunoškom zakónčili. W běhu minjeneho hońtwjerskeho lěta třělichu hajnicy dźewjeć sornow, młodeho dańka, šěsć dźiwich swini a štyri šupy. Přichodnu wulku hońtwu chcedźa lěpje přihotować a sej wotběh a wobsah z honjerjemi dokładnje dorěčeć, zo by potom wuspěšniša była.

Přiwšěm su hajnicy kaž tež honjerjo z atmosferu po hońtwje jara spokojom, wšako zapřijimaja při słódnej jědźi a dobrej kapce tež dalšich wjesnjanow. Tak słuži hońtwa tež bjez wulkich trofejow skrućenju wjesneje zhromadnosće.

Wjeršk hońtwjerskeje zhromadźizny w Nowoslicach bě přednošk zamołwi­teho za krajinowe wuwiće w přirodoškitnej krajinje Kinsporskeje hole Dirka Sy­natzschki. Z jara rjanymi wobrazami, kotrež jako hobbyjowy fotograf třěla, zamó wón na putace a čiłe wašnje přirodne žiwjenje w Kinsporskej holi w běhu lěta před­stajić. Drustwownicy zhonichu tójšto dotal njeznateho wo cyłkownym wuwiću škitaneje krajiny a jeje wosebitosćach, wo rostlinach a dźiwinje, ale tež wo strachach, kotrež tam přeco hišće z časa wojerskeho wužiwanja hroža. Přednošk bě za přitomnych wjac hač nastork, sej tule parličku přirody raz bliže wobhladać. ­Zarjadnistwo Kinsporskeje hole poskića za to mnohe móžnosće.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND