Skónčnje twarja nowy wodowód
Gmejna Radwor na dobrym puću
Pomnik priwatneje iniciatiwy, běrowowe a hospodarske twarjenja předewzaća Reclay forest kaž tež wobzamknjenje lětušeho etata běchu temy wčerawšeho posedźenja Raworskeje gmejnskeje rady.
Krótkopowěsće (15.03.17)
Přećiwo wupokazanju
Budyšin. Zwjazkarstwo Budyšin wostanje pisany podpěruje saksku peticiju přećiwo wupokazanju ćěkancow do Afghanistana. To su na wčerawšim zetkanju wobzamknyli. W internetnej peticiji žadaja sej podpisarjo wot sakskeho knježerstwa, z praksu wupokazanja hnydom přestać. Wšako njeje Afghanistan žadyn „wěsty pochadny kraj“.
Přihoty běža
Budyšin/Wodowe Hendrichecy. Přihoty na lětušu olympiadu serbskeje rěče běža. Wona wotměje so kónc apryla we Wodowych Hendrichecach, zdźěla Serbske šulske towarstwo. Hišće hač do kónca měrca je přizjewjenje móžne. Na olympiadźe pruwuja ertne a pisomne serbskorěčne kmanosće šulerjow 6. lětnika wyšich šulow Hornjeje, srjedźneje a Delnjeje Łužicy kaž tež serbskeju gymnazijow.
Kolesowansku šćežku rozšěrić?
Krótkopowěsće (14.03.17)
Interreg-myto spožčili
Frankfurt nad Wódru. Za mjezu přesahowace zhromadne dźěło su wčera dwaj braniborskej a dwaj pólskej projektaj w Frankfurće nad Wódru wuznamjenili, a to prěni raz z braniborsko-pólskim Interreg-mytom. Spěchowanske srědki přewostaji Europska unija. Wjeselić smědźeše so mjez druhim Alberta Schweitzerowy swójbny skutk w Grodku.
Dowólbne „tweetowanje“
Praha. Socialdemokratiska ČSSD, druha najsylniša politiska strona Čěskeje, chcyła tež w lětušich wólbach parlamenta derje wobstać. W tym zwisku planuje potencielnych wolerjow nic jeno přez „rozum“, ale tež přez „emocije“ docpěć. W zwisku ze začućemi chcyła ČSSD stronski program cyle jednorje posrědkować – jeje tweety-zdźělenki njeměli 140 znamješkow překročeć.
Kabinet přechodnje zawrjeny
Drježdźany. Strašnych změnow na mnohich slěbornakach a medaljach dla su Drježdźanski pjenježny kabinet přechodnje zawrěli. Na něhdźe 100 eksponatow je so z njeznatych přičin dźiwna běła woršta wutworiła, kaž ze zdźělenki wuměłstwowych zběrkow wuchadźa.
Poražce za Dźiwje micki
Jutře dale twarja
Budyšin. Po zymskej přestawce pokročuja jutře z dźěłami na kružnym wobchadźe na Budyskej Schliebenowej. Wobchad rjaduja tak kaž loni, z Biskopičanskeho směra do města a nawopak z amplu. Z města won móže wobchad tež do směra na Wojerecy jěć, wottam do města nutř pak jenož busy. Hasa do směra na Móst swjateho Ducha wostanje do wobeju směrow zawrjena.
W septembru změja wólby
Trjebin. Runočasnje z wólbami zwjazkoweho sejma 24. septembra wola wobydlerjo Trjebinskeje gmejny wjesnjanostu resp. wjesnjanostku. Tónle termin je gmejnska rada na swojim zašłym posedźenju wobzamknyła. Wólby su trěbne, dokelž so hamtska doba tuchwilneje wjesnjanostki Kerstin Antonius (Trjebinske wolerske zjednoćenstrwo) po sydom lětach skónči. Hač wona k wólbam znowa nastupi, njeje wěste, tohorunja nic hač je dalšich kandidatow.
Žony zhromadnje swjećili
Wjace přenocowanjow zličili
Hamor sćehnje pozitiwnu bilancu turistiskeho lěta 2016
Hamor (AK/SN). Nowa wodosportowa sezona nad Bjerwałdskim jězorom započnje so 1. apryla a traje hač do 31. oktobra. W tym času budu tež wšitke wot gmejny hladane připrawy znajmjeńša wot srjedy do njedźele wot 10 do 16 hodź. wočinjene. Tole rjekny Hamorski wjesnjanosta Achim Junker (CDU) wčera na posedźenju gmejnskeje rady.
Policija (14.03.17)
Awto so wupaliło
Połčnica. Njelubu překwapjenku dožiwi žona wčera rano w Połčnicy. Jako chcyše ze swojim awtom na dźěło jěć, dyrbješe wustróžana zwěsćić, zo bě jeje jězdźidło dospołnje wupalene. Bjez toho zo bychu wobydlerjo z jeje bydlenskeho doma abo ze susodnych domow abo pěšcy to pytnyli, bě w nocy w Citroënje z dotal njeznateje přičiny woheń wudyrił. Při tym so wosobowe awto dospołnje zniči. Móžno, zo zwisuje tónle pad z tym, zo bě so žona hakle njedawno wot swojeho 48lětneho žiwjenskeho partnera dźěliła. Kaž policija informuje, tčeše za woknotrějakom awta někajka powěsć muža. Što je w njej dokładnje stało, znate njeje. Policija nětko podhlada zapalerstwa dla přepytuje.
W drustwje wšo při starym wostało
Doatalny a přichodny předsyda Njebjelčanskeho hońtwjerskeho drustwa Hubertus Šwejda móže na dobru lońšu hońtwjersku bilancu drustwa zhladować.
Njebjelčicy (JK/SN). Po zymskej přestawce zetkachu so čłonojo Njebjelčanskeho hońtwjerskeho drustwa minjeny pjatk k hłownej a wólbnej zhromadźiznje. Drustwo wobhospodarja nimale 1 200 hektarow pódy na teritoriju gmejny, z wuwzaćom Pěskec, kotrež maja swójske drustwo. Teritorij Njebjelčanskeho drustwa je dźělene do dweju wobwodow, a te sej štyrjo hońtwjerjo dźěla.
Wo štomach, chorosćach a „wóčkach“ zhonili
Stróža (CS/SN). Na kóncu měnješe Klaus Schwarz, zo je rěčał, kaž by hroch sypał. Šef Lubijskeje štomownje je sobotu 35 wobdźělnikam seminara wo wobrězanju štomow na dworje Stróžanskeho zarjadnistwa biosferoweho rezerwata wjele zajimaweho rozłožił, na hišće wjace prašenjow wotmołwił a na praktiskich přikładach pokazał, kak maš sadowcy fachowje wobrězować. Do toho bě jeho sobudźěłaćerka Doreen Mucke dwě hodźinje wo teoretiskich zakładach wobrězanja štomow porěčała. Přetož jeno z tejle wědu móžachu wobdźělnicy pozdźišim wuwjedźenjam jeje šefa sćěhować. Mjez druhim wona rozłoži, što je lětnje a što je zymske wobrězowanje a što su „wóčka“. Runje tak narězny wona prašenja škita rostlin a štomowych chorosćow. Zajimawe mjenujcy je, zo su so hribowe chorosće sadowcow sylnje rozmnožili, po tym zo je po přewróće mnóstwo syrika w powětře woteběrało.
Policija (13.03.17)
Hač chcedźa rjedźić?
Wojerecy. Swojoraznu a skerje njezwučenu rubiznu wupytachu sej paduši, kotřiž běchu so w času wot pjatka popołdnja hač do soboty ranja do wjaceswójbneho domu we Wojerecach zadobyli. Z jedneje z pincow pokradnychu tři bleše płokanskeho srědka kaž tež blešu rjedźenskeho srědka za nuzniki w cyłkownej hódnoće 15 eurow. Hač trjebaja je za nalětnje rjedźenje, bohužel znate njeje.
