Wotrow (SN/MWj). Katarina Weclichowa je we Wotrowje jedna z tych žonow, kotrež so na dobro wsy angažuja a za to swój čas wopruja, njehladajo dźaka. Za to so jej tele dny na wosebite wašnje dźakowachu a ju tak wulce překwapichu.

„Smy wo akciji rozhłosoweho sćelaka Hitradio RTL hromadźe z předewzaćom Sachsenmilch zhonili. Z njej wuzběhuja čestnohamtski angažement jednotliwcow“, powěda Wotrowski wjesny předstejićer Měrko Pohonč. Dokelž so Katarina Weclichowa na mnohostronske wašnje we wsy angažuje, běchu ju za akciju namjetowali. Napisachu sćelakej, zo wona adwentne paslenje runje tak sobu při­hotuje kaž nabožny prózdninski tydźeń a póstnicy na starej šuli. Wosebje na wutrobje pak leži jej hrajkanišćo, kotrež běchu w klóštrje Marijinej hwězdźe wot­twarili a do Wotrowa přiwjezli. Wot wšitkich jednotliwych drjewjanych dźělow měješe so stara barba wotškrabać. Na to mějachu so dźěle znowa wobarbić. To wšo je Katarina Weclichowa sobu organizowała.