Policija (09.06.17)
Rozestajenje mjez mužomaj a woheń
Hućina. W nocy na štwórtk je w Hućinje k namócnemu rozestajenju mjez mužomaj dóšło. Po tym zo běštaj so wobaj zhromadnje do alkohola dałoj, nadpadny 40lětny podhladny swojeho 21lětneho kumpla z cyhelom a nožom. Škodowany bu při tym snadnje zranjeny. Přiwołani policisća situaciju změrowachu. Dwě hodźinje pozdźišo w samsnym bydlenskim domje woheń wudyri, kiž alarmowani wobornicy spěšnje zhašachu. Zranił so při tym nichtó njeje. Hač zwisuje woheń z rozestajenjom mužow, policija pruwuje.
Skulptury přećahnu
Wojerecy. Šěsć skulpturow, kotrež nastachu na mjezynarodnymaj rězbarskimaj sympozijomaj 2014 a 2016 we Wojerowskim zwěrjencu, přenjesu přichodny tydźeń do parka Łužiskeje jězorinoweje kliniki. Wjacori wuměłcy ze wšelakich krajow běchu skulptury na temu integracija stworili. Nětko chcedźa zdźěla jara ćežke twórby na nowym městnje prezentować. Kaž kulturna a zwěrjencowa tzwr zdźěli, su wone hišće na předań.
Žónska unija so zetka
Tři Hwězdy. Přichodne zjawne zarjadowanje žónskeje unije Budyskeho wokrjesa wotměje so srjedu, 14. junija, w 19 hodź. w hosćencu w Třoch Hwězdach. Póńdźe wo wočakowanja na młode swójby w dźensnišej towaršnosći.
Dom Měrćina Nowaka wotewrjeny
Twarnišćo wulce zaběra
Zawrjena statna dróha S 100 a jeje wokołopuće wubudźeja diskusije
Pančicy-Kukow (SN/MWj). Dobre tři tydźenje je statna dróha S 100 w Pančicach-Kukowje dospołnje zawrjena, dokelž tam twarske dźěła za nowy móst nad Klóšterskej wodu přihotuja. Wokołopuće a z tym zwjazane problemy njejsu jenož wulka tema mjez wobydlerjemi, ale běchu to wčera tež na posedźenju Pančičansko-Kukowskeje gmejnskeje rady. Tak maja po słowach radźićelki Katrin Piller na přikład busy wulke problemy, při pěstowarni wokoło róžka jěć, hdyž tam parkowace awta staršich, kotřiž swoje dźěći přiwjezuja abo wotebjeru, městno blokuja. Poručene parkowanišća při sportnišću pak lědma štó wužiwa, hačrunjež su je staršim z wosebitym wuwěškom doporučili, wšako tež wo wěstotu dźěći dźe.
Přičiny k swjećenju na lětanišću
Z powětrowej a techniskej show 17. a 18. junija hódnoćeja wuspěšne wuwiće Kamjenskeho lětanišća w minjenych lětach. Tajkile podawk dožiwja tam prěni raz po šěsć lětach.
Kamjenc (UM/SN). Dokelž móžeš hakle swjećić, hdyž maš woprawdźe přičinu k tomu, móže so stać, zo mjez dwěmaj swjedźenjomaj trochu wjace časa zańdźe. Na Kamjenskim lětanišću je mjeztym šěsć lět zašło, zo je so tam posledni lětanišćowy swjedźeń wotměł. „Nětko je čas za přichodny“, praji Kamjenski wyši měšćanosta Roland Dantz (njestronjan). Jako zastupjer wjetšeho z dweju towaršnikow (tamny je Budyski wokrjes) móže sej wón tajki posudk dowolić. Přetož lětanišćo je dźensa tak wuwite, zo skića wone přičinu k swjećenju. Jedne z wuměnjenjow bě, zo su z Kamjenskim lětarskim klubom dobreho wobhospodarja namakali.
K zakónčenju šulskeho lěta su šulerki a šulerjo Radworskeje ...
Na Budyskej Sukelnskej je so dźensa dopołdnja paliło. Woheń bě w ...
Krótkopowěsće (09.06.17)
Zeleni za „Załožbu přichoda“
Drježdźany/Podstupim. Hladajo na trěbnu strukturnu změnu we Łužicy namjetuja Zeleni wutworjenje „Załožby přichoda“. Je to jedyn z wjacorych klučowych projektow, kotrež běštej frakciji Zelenych w Sakskim a Braniborskim krajnym sejmje zestajałoj. W załožbje móhli so wšelake koncepty za čas po brunicy koordinować, Zeleni dźensa zdźělichu.
Festiwal wjace njebudźe
Drježdźany/Mißlareuth. „Festiwal wosrjedź Europy“ w třikrajowym róžku mjez Sakskej, Bayerskej a Čěskej je doskónčnje nimo. Lěto po zahajenju insolwencneho jednanja njewidźa zamołwići hižo žadyn přichod za koncertowy rjad w pomjeznej kónčinje, powěsćernja dpa rozprawja. Poprawom chcychu loni 25. lětne wobstaće festiwala swjećić.
Nastaja wulkobaterije
Krótkopowěsće (08.06.17)
TU na dobrym městnje
Drježdźany. Techniska uniwersita w Drježdźanach słuša po mjezynarodnym přepytowanju k 200 najlěpšim uniwersitam swěta. Při najnowšim „QS World University Ranking“ je kubłanišćo 195. městno wobsadźiło, kaž uniwersita zdźěla. Posudk přewjeduja wot lěta 2004. Britiski team QS přepytuje při tym wjace hač 4 000 uniwersitow swěta.
Spěchowanske srědki šmórnjene
Drježdźany. Amaterske dźiwadła Sakskeje bědźa so z pjenježnymi problemami. Mjeztym dyrbjachu wukubłanje hrajnych nawodow skónčić, dokelž bě swobodny stat spěchowanske srědki šmórnył, krajny zwjazk amaterskich dźiwadłow dźensa zdźěli. Kraj bě spěchowanske srědki wo 45 procentow přikrótšił.
Kožuchowe farmy zakazane
Praha. Čěski parlament je z nowym zakonjom kožuchowe farmy w kraju zakazał. Zawody dyrbja hač do januara 2019 z etiskich přičin zawrěć. Po wuprajenju čěskich kožucharjow naprawa jich rjemjesło wokomiknje njewohroža. Čěska organizacija škitarjow zwěrjatow chcyła pak tež dowožowanja zwěrjećich kožušinow z druhich krajow, kaž z Němskeje, zakazać.
Policija (08.06.17)
Wopity z pokradnjenym mopedom
Budyšin. 21lětneho wodźerja mopeda typa S 51 je policija w nocy na srjedu w Budyšinje kontrolowała a při tym hnydom wjacore delikty zwěsćiła. Młody muž scyła žanu jězbnu dowolnosć njeměješe a moped tež zawěsćeny njebě. Nimo toho měješe wón 0,78 promilow alkohola w kreji. A skónčnje so wukopa, zo bě 21lětny moped krótko do toho pokradnył. Nětko drje so z tymle padom statne rěčnistwo dale zaběra.
Kolesa wotšrubowali
Bukecy. Swjatkowny kónc tydźenja pobychu njeznaći na terenje firmy w Bukecach. Tam wotšrubowachu wot wosoboweho awta typa VW Passat wšitke štyri kolesa. Dale měrjachu so woni na Audi. Tomu pobrachujetej nětko wonkownej špihelej. Cyłkowna škoda wučinja dohromady nimale 2 000 eurow.
