Problem parkowanja rozrisaja
Bukecy (CS/SN). Dźakowano spěchowanskemu programej „Mosty do přichoda“ móže Bukečanska gmejna problem parkowanskeje situacije wokoło swojeho šulskeho terena rozrisać. Wot planowaneje cyłkowneje sumy něhdźe 200 000 eurow dóstanu 141 000 eurow jako spěchowanje, potajkim 75 procentow. Wjele chwile, swoje plany zwoprawdźić, pak nimaja. Na tamnym boku, tak diskusija na zašłym posedźenju gmejnskeje rady pokaza, přeja sej gmejnscy radźićeljo dołhodobnje kmane rozrisanje. Tohodla wuwi so horca, ale tež konstruktiwna diskusija wo namjeće, kotryž bě Budyska planowarka Beate Hübner předpołožiła. Dojednali su so skónčnje na wariantu, kotruž ma inženjerka nětko pruwować a přesadźić.
W korčmach znowa livehudźba
Kóžde lěto spočatk meje wotměwa so w Budyšinje korčmowy swjedźeń. Mjeztym zo bě to w 90tych lětach wulke zarjadowanje cyłeho města, je wone dźensa trochu mjeńše, ale jara rjane.
Budyšin (SN/MWj). Hižo 13. raz wotměje so 6. meje Budyski korčmowy swjedźeń w swojej tuchwilnej formje. Na njón přeproša towarstwo Staroměšćanska tejka, w kotrymž su gastronomojo zjednoćeni. Tónraz wobdźěli so 13 korčmow, dwě mjenje hač loni, zdźěli dźensa rěčnik towarstwa a mějićel bary „Caracas“ André Herold. Mjeztym zo so towarstwo wo wabjenje z banerami a flajerami stara, rozhladuje so kóždy wobdźěleny korčmar w swójskej režiji wo hudźbnu kapału. Paleta hudźbnych směrow saha wot popa a rocka přez folk a evergreen hač k srjedźowěkowskemu spektaklej. Wšojedne pak, kotra skupina hdźe hraje, zastup je wšudźe darmotny. Nadrobniše informacije wo skupinach su móžne pod adresu www.feiern-in-bautzen.de.
Tež hdyž je wjedro haperlejske, přihotuja młodostni w Radworju ...
Zwěrjenc podpěruje přirodoškitnu staciju
Wojerecy/Njeswačidło (SN). Z nazběranymi pjenjezami z darowanskeho lika w swojim tropowym domje podpěruje Wojerowski coo nětko Njeswačansku přirodoškitnu staciju. „Za nas jako zwěrjenc je škit družin a přirody najwažniši. Tohodla so wjeselimy, hdyž móžemy Njeswačansku přirodoškitnu staciju při jeje wulkotnym dźěle podpěrać“, praji coologiski nawoda zwěrjenca Eugène Bruins k nowemu partnerstwu z Njeswačanskimi přirodoškitarjemi.
Eugène Bruins je fachowc za amfibije a reptilije. Z dźěłom přirodoškitneje stacije a jeje towarstwa je to wón njedawno bliže zeznajomił, jako pomhaše w Njeswačidle na kromje puća nazběrane krokawy přez puć k městnam jich njerkanja nosyć. Dźěći, kotrež so we wobłuku swojeho prózdninskeho campa na akciji wobdźělichu, je Eugène Bruins minjene dny po Wojerowskim coowje wodźił a jim pokazał, kak so tam wo přirodoškit staraja. Dalše tajke kooperaciske předewzaća mjez zwěrjencom a staciju maja slědować.
Policija (24.04.17)
Třo zranjeni po zražce
Ohorn. Při ćežkim wobchadnym njezbožu na awtodróze A 4 pola Ohorna su so wčera něhdźe w 22.30 hodź. tři wosoby ćežko zranili. Dokelž njebě jasne, hač su dalše wosoby potrjechene, su za nimi pytali, njejsu pak nikoho namakali.
Za pišćele so angažowali
Šwarna ličba hudźbnych cyłkow beneficny nyšpor wuhotowała
Chrósćicy (CRM/SN). „Najdrohotniši hudźbny nastroj w našej cyrkwi su pišćele. Wone su wšědnje trěbne“, praji Chróšćanski farar Měrćin Deleńk. Nětko je wjetša techniska reparatura trěbna. Wuměnjenje elektroniskeho wuhotowanja njeje hižo wobeńdźomne. Budyska pišćeletwarska firma poskići akceptabelny namjet. Financne móžnosće wosady pak wón přesahuje. Wčera, njedźelu, su tuž wosadne hudźbne a spěwne cyłki beneficny nyšpor wuhotowali.
We wołtarnišću přednjesechu dujerjo pod nawodom Jurja Hejduški a Jurja Jakubaša swjedźenske kruchi. Při tym złožowachu so předewšěm na pozběhowacy błyšć baroka, štož wosebje swjatočnje skutkowaše. Woni přewodźachu tohorunja kěrluše wosadnych. Dźěćaca šola z nawodnicu Gabrielu Brězanowej poda přihódny dźěl swojeho angažementa k Božej česći a spomóženju wěriwych. Kěrluš „Naš Knjez přesadźuje hory“ zaspěwa cyłk młodostnych Precatio. Dalšu zajimawu hudźbnu barbu poskićištaj Christin Popelic na pianje a jeje bratr Daniel ze spěwnym solom.
Na slědach kamjenjow byli
Mjeztym hižo 22. raz su sobotu w Budyšinje dźeń měšćanskeho lěsa přewjedli. Něhdźe 60 wobdźělnikow poda so w lěsu pod Čornobohom na slědy kamjentnych pomnikow.
Budyšin (CS/SN). Andreas Bültemeier, kiž je hromadźe z Thomasom Sobczykom knihu wo pomnikach w hornjołužiskich lěsach spisał, rozłoži, zo je w lěsach pod Čornobohom wjele tajkich swědkow zašłosće. Jónu su to mězniki, kotrež wobsydstwowe poměry rjaduja. Wšako njesłušeja wšitke lěsne płoniny wokoło Čornoboha městu Budyšinej. Jedyn z najnjewšědnišich kamjentnych pomnikow je na priwatnej ležownosći. Ale z dowolnosću wobsedźerja smědźachu sej wobdźělnicy ekskursije wobhladać reformaciski pomnik, kotryž nadeńdźechu wosrjedź lěsa. Stworił bě jón Kumwałdski kamjenjećesar George Weickert składnostnje 300. jubileja reformacije 1817. Do wulkeho njewobdźěłaneho kamjenja zadypa wón wopomnjenski tekst.
Dohromady 27 dźěći je wčera w Radworju prěni raz sakrament ...
Krótkopowěsće (24.04.17)
W rozmołwje z wobydlerjemi
Plauen. Sakski ministerski prezident Stanisław Tilich (CDU) zahaji dźensa wječor w Plauenje swoju rozmołwnu turu. K zahajenju chce so wón pod hesłom „Zhromadnje w Sakskej – za sylny přichod“ z Plauenskimi wobydlerjemi zetkać. Sto ludźi je so za to přizjewiło. Tilich planuje pjeć zarjadowanjow. Přichodne budźe 2. meje w Biskopicach.
Nadpady na stronske běrowy
Lipsk. Politikarjo a běrowy zapósłancow su dale cil nadpadow, byrnjež ličba atakow woteběrała. Lěwica je w prěnim kwartalu pjeć nadpadow zličiła. Prěnje tři měsacy 2016 bě jich hišće 22. AfD rozprawja wo nadpadomaj na běrow w Budyšinje a Zhorjelcu. Tež SPD a CDU stej tajke nadpady registrowałoj.
Tójšto wobdźělnikow
Bórkowy. Wjace hač 12 200 sportowcow je so na kónctydźenskim 15. błótowskim marathonje w Bórkowach, Lubnjowje, Lubinje a Tšupcu wobdźěliło. To je 300 wjace hač loni, kaž zarjadowarjo zdźěleja. Z wjace hač 1 300 wobdźělnikami bě 200 kilometrow dołha kolesowarska čara najbóle prašana.
Boll němske finale dobył
Při dróhotwarskich dźěłach puće dospołnje zawru
Budyšin (CS/SN). Přichodne měsacy na pućach Budyskeho wokrjesa zaso wjele twarja. Kaž rěčnica krajneho zarjada za dróhotwar a wobchad (LASuV) Isabel Siebert praji, pokaza so při tym wuwiće, wo kotrymž wobswětoškitarjo zahorjeni njebudu. Powołanske drustwa dróhotwarske zarjady napominaja, dróhotwarske projekty jeno zwoprawdźić, hdyž je puć dospołnje zawrjeny, a nic jenož połojčnje. Přičina je wěstota dźěłaćerjow. Při wuskich pućach často wěstotny wotstawk 1,2 metraj k nimo jěducym awtam dodźeržeć njemóža. Tohodla ma so bórze postajenje zawjesć, po kotrymž jenož hišće při dospołnje zawrjenych pućach twarja. Sćěh toho su dołhe wokołopuće a přidatne poćežowanje wobswěta.
