Čołmy do wody pušćeli
Zawjedu elektronisku aktu
Wot 1. junija digitalizuja w jobcenteru Budyskeho wokrjesa wšitke akty. To zmóžnja spěšniše wobdźěłanje padow. Mnóstwo składowanych papjerjanych aktow potom dale njepřiběra.
Budyšin (CK/SN). Papjera budźe w jobcenteru Budyskeho wokrjesa bórze material zašłosće. Kóždužkuli dochadźacu póštu, a teje njeje po słowach načolnika jobcentera Mathiasa Bielicha mało, potom skenuja. Podłožki jenož hišće tři tydźenje wobchowaja, na to je zniča. Tohodla měli wobydlerjo jenož hišće kopije zapodać. W jednotliwych padach, w kotrychž trjebaja dokumenty w originalu, to potrjechenym zdźěla. Po skenowanju jim dokumenty wróća.
Krótkopowěsće (11.04.17)
Šulski zakoń schwaleny
Drježdźany. Sakski krajny sejm měješe dźensa wo nowym šulskim zakonju kraja, centralnym předewzaću knježerstwa CDU a SPD, wothłosować. Zakoń zmóžnja lětnik přesahowacu wučbu a ma zawrjenju šulow we wjesnych kónčinach zadźěwać. Kritikarjo na to skedźbnjeja, zo zakoń žadanje za dlěšim zhromadnym wuknjenjom dźěći njespjelnja. CDU na dotalnym rjadowanju wobstawa.
Mjenje gmejnow w Sakskej
Kamjenc. Ličba gmejnow w Sakskej je loni dale woteběrała. Tole wuchadźa z noweho zapisa gmejnow, kaž Kamjenski krajny statistiski zarjad informuje. Tak bě 1. januara 2017 cyłkownje 423 gmejnow w swobodnym staće, tři mjenje hač loni w samsnym času. Statistikarjo zličichu 170 městow, mjez nimi tři bjezwokrjesne Drježdźany, Lipsk a Kamjenica.
Wólbomat trojorěčny
Flensburg. Wobydlerjo Schleswigsko-Holsteinskeje maja 7. meje nowy krajny sejm wuzwolić. Lětsa budźe wólbomat – z nim móže kóždy woler do wólbow zwěsćić, kotrej stronje je najpřichileniši – prěni króć tež frizisce a dansce k dispoziciji, kaž mjeńšinowy sekretariat w Flensburgu zdźěla.
Optimalne wuměnjenja zaručić
Budyska wokrjesna hudźbna šula ma dobre mjeno. Wuspěch jeje šulerjow na lětušim krajnym finalu wubědźowanja „Młodźina hudźi“ je najmłódši dopokaz za to, zo pedagogojo tam dobre dźěło wukonjeja. Wuměnjenja za zwučowanje pak su zdźěla chětro špatne. Nětko bě to tema w Budyskim wokrjesnym sejimiku.
Budyšin (SN/at). Wokrjesna hudźbna šula je wobstatk swójskeho zawoda Budyskeho wokrjesa a wot lěta 1999 w rumnosćach pincy nětčišeho powołanskošulskeho centruma za hospodarstwo a techniku zaměstnjena. Kaž z lista kubłanišća staršim, šulerjam a sobudźěłaćerjam ze spočatka februara wuchadźa, „njewotpowěduje klimatiska situacija w tychle rumnosćach wučbnemu narokej. Wjacore próstwy wo pomoc na wokrjes a wšelake testy w rumnosćach njejsu změnu přinjesli.“
Krótkopowěsće (10.04.17)
Protestny pochod wotprajeny
Rowno. Zwjazk „Strukturnu změnu nětko – žanu jamu Wochozy II“ je swój za 23. apryl planowany protestny pochod přećiwo dalšemu wudobywanju brunicy wotprajił. Hłowna přičina je najnowši rozsud energijoweho zastaraćela LEAG, Rowno a Mułkecy njewotbagrować. „Respektujemy, zo dyrbja wobydlerjo Rownoho połoženje najprjedy raz předźěłać.“
Komisarej EU so wuskoržili
Storkow. Braniborscy rybarjo su zamołwitemu komisarej Europskeje unije swoje starosće z čaplemi, bobrami a wudrami přednjesli. Komisar Karmenu Vella jim na wopyće w Storkowje přilubi, zo chcył naležnosć pruwować dać. Po měnjenju rybarjow su krute škitne naprawy za mjenowane zwěrjata wina na masiwnych problemach w rybarstwje.
Ptaki lětanišćo wobstražuja
Policija (10.04.17)
Při njezbožu so ćežko zranił
Kulow. Ćežke wobchadne njezbožo sta so sobotu wječor blisko Kulowa. 50lětny muž bě ze swojim Fordom z Mučowa přijěł a při wotbóčce do Brěžkow z dotal njeznateje přičiny kontrolu nad wodźidłom zhubił. Awto zajědźe na lěwy bok jězdnje, zwróći so a wosta na třěše ležo. Šofera dyrbjachu z ćežkimi zranjenjemi do chorownje dowjezć. Wěcnu škodu na wosobowym awće trochuje policija na něhdźe 16 000 eurow.
Pojěcha z nanom a bratrom
Jutrońčku 1993 sy mjez Ralbičanskimi křižerjemi młodeho pachoła ze zelenym wěnčkom wuhladał. Poboku swojeho nana, nazhoniteho křižerja Stanisława Statnika, nastaji so tehdy runje 15lětny Robert sobu na puć do Kulowa, zo by jutrowne poselstwo wozjewił. Z jasnym hłosom wón rjane serbske kěrluše sobu zanošowaše. Robert Statnik wě so na wonu jutrowničku derje dopomnić. Wón bě wšón hordy, směć poselstwo zrowastanjenja wšěm ludźom – wěriwym a njewěriwym – posrědkować.
Jako křižerski nowačk bě wón 1993 šuler 10. lětnika na Budyskim Serbskim gymnaziju. Po wuspěšnym złoženju abitury studowaše na Žitawskej wysokej šuli za techniku a hospodarstwo. Mjeztym wón hižo 14 lět jako inženjer w twarskim běrowje swojeho nana w Kulowje dźěła.
Rěčna hodźina raz hinak
Budyšin. Nawjazujo na swoju prěnju rěčnu hodźinu pod hołym njebjom loni w septembru chcedźa čłonojo Budyskeje měšćanskeje rady tule formu rozmołwow z wobydlerjemi přichodnje časćišo wužiwać. „Na te wašnje chcemy ludźom zmóžnić, zo z radźićelemi direktnje do rozmołwy přińdu“, praji zastupowacy šef frakcije CDU Patrick Höhne. Přichodna tajka rěčna hodźina pod hołym njebjom budźe srjedu, 12. apryla, wot 15 do 18 hodź. na Žitnych wikach.
Po zwěrjencu so rozhladować
Wojerecy. Na dojutrowne wodźenje přeprosy Wojerowski zwěrjenc ćichi pjatk. W 10 a w 14 hodź. poskića zajimcam składnosć, so wot fachowcow po zwěrjencu wodźić a sej nowosće rozkłasć dać. Wobdźělnicy mjez druhim zhonja, kotrych nowych wobydlerjow maja w tropowym domje a kak nowa připrawa za kenguruwy wupada. Nimo toho wotmołwjeja fachowcy wězo tež na prašenje, kotre zwěrjata w coowje jeja lahnu.
Nowe wusyłanje
Dorost jejka sobu debił
Na jutrownych wikach serbske wuměłstwo a kulturu předstajili
Nowa Łuka (JoS/SN). Debić jutrowne jejka ze serbskimi motiwami w znatych debjenskich technikach je wažna forma, tradiciju hajić. Tole pokazuja kóžde lěto na srjedźołužiskich jutrownych wikach w Nowołučanskim wjesnym hotelu. Jutrowne wiki na wsy a w přijomnej swójbnej atmosferje njejsu kónc tydźenja jenož wopytowarjow z bjezposrědnjeje wokoliny přiwabili, ale tež wot druhdźe, kaž Carolu Stauberowu z Berlina, rodźenu Wojerowčanku, a Hansa Schimanka z Kamjenicy, kiž z Noweje Łuki pochadźa.
Dwurěčne gmejny najwěsćiše
Ličba njeskutkow woteběra – pokradnjene kolesa a awta dale problem
Budyšin/Zhorjelc (SN/MWj). W Bóščanskej, Worklečanskej a Chróšćanskej gmejnje je so loni po wšej Zhorjelskej policajskej direkciji najmjenje kriminelnych deliktow stało. Tole wuchadźa z wčera wozjewjeneje statistiki policajskeje direkcije. Trend minjenych lět tuž wostawa, zo su dwurěčne gmejny mjez Budyšinom a Zhorjelcom sobu najwěsćiše cyłeje wuchodneje Sakskeje. Zwěsćić tole móžachu, přeličiwši mnóstwo njeskutkow na 100 000 wobydlerjow. Tale cyfra častoty wučinja za Zhorjelc wjace hač 15 000, za Bóšicy pak 853, za Worklecy 997 a za Chrósćicy 1 082.
