Ponowjena gratownja a transportne jězdźidło přepodatej

Sulšecy (SC/SN). Wšitke tři wjesne wohnjowe wobory Hodźijskeje gmejny maja mjeztym dwójne mjeno. Wone wotbłyšćuja, zo je so něhdy šěsć woborow na nětko tři zjednoćiło. Wohnjowa wobora Njezdašecy-Prěčecy měješe na swojim stejnišću w Sulšecach pola Haslowa dotal gratownju, kotruž běchu 1971 we wobłuku tak mjenowaneje VMI (ludohospodarska masowa iniciatiwa) natwarili. Bě to jeničce hala, kotrejež wrota běchu za dźensniše zasadźenske jězdźidło přemałe. Nimo toho pobrachowachu kubłanska rumnosć, wopłóčkowej syći přizamknjene sanitarne připrawy a dosć wysoke a šěroke wrota.