Z pawšalu tež nadróžne tafle w Kulowje ponowili
Kulow (AK/SN). Kóždolětnu komunalnu pawšalu Swobodneho stata Sakskeje za hajenje serbskeje rěče a kultury město Kulow zaměrnje a zmysłapołnje zasadźuje. Na to skedźbnja zamołwity za serbske prašenja města Stephen Rachel. „Gratownje jednotliwych wjesnych wohnjowych woborow su nětko dwurěčnje wuhotowane. W Kulowje su nimo toho wšitke nowe nadróžne tafle dwurěčnje popisane. Dale smy serbsku drastowu stwu w Jakubetzowym wustawje a zakładnu šulu Krabat podpěrali. Wobě dóstaštej přiražku za wuporjedźenje a hladanje swojeho wobstatka serbskeje drasty. Loni su w Kulowje dohromady 6 100 eurow za serbske naležnosće wudali. „Dwurěčne napisy na gratownjach běchmy sej hižo dołho předewzali“, praji Rachel. Za to su najprjedy naćisk zhotowili a wo nim z wobornikami rěčeli. Nětko su na wšitkich gratownjach jednotne tafle přičinjene. Za nje wudachu 700 eurow. W Mučowje chcedźa wobornicy samo cyłu fasadu dwurěčnje wuhotować.
