Wotpočink. W lěsu blisko małeje wjeski Wotpočink (Ruhethal) w Malešanskej gmejnje je so minjenu sobotu projekt „Swětnišćo zetka přirodu“ wotměł. Zaměr projekta, kotryž rěčny motiwator Lucian Kaulfürst a fyzikar Jan Winša přewjedźeštaj­, bě, zajimcow wo hribach w lěsach kaž tež w swětnišću informować. Wjace hač dźesać ludźi je přepro­šenje sćěhowało. Mjez nimi běše tež hósć z Prahi.

Z přednoškom Luciana Kaulfürsta wo rozeznawanju kurjatka wot njesłódneho wopačneho kurjatka so popołdnjo zahaji. Wobdźělnicy zhonichu, kotre rozdźěle mjez jara słódnym parlowym hribom (Perlpilz), jědojtym muchomorom (Pantherpilz) a prawakom a žołčhórkim trubkowcom­ (Gallenröhrling) wobsteja. Wosebje wo wuskutkach žołčhórkeho trubkowca na pónoj słódnych hribow Lucian­ Kaulfürst ze swójskich „hórkich“ nazhonjenjow powědaše. Wšitke informacije běchu tež na łopjenach wućišćane, kiž móžachu sej wobdźělnicy na kóncu sobu domoj wzać.

Po zakładnych informacijach so sku­pina do lěsa poda, zo by hriby pytała. Mjez mnohimi hribami namakchu tež smoržu (Morchel), kurjatka a prawaki.