Na Helmec burskim statoku dworowy swjedźeń wuhotowali
Jitk (aha/SN). Mjeztym 25. raz pospochi swjećachu na Helmec burskim statoku w Jitku na Dnju němskeje jednoty dworowy swjedźeń. Na jubilej, kotryž běštaj Kornelia a Sven Helm z tójšto kreatiwnymi idejemi přihotowałoj, je tež wjele hosći ze zdalenišich kónčin přijěło. Woni zhonichu něštožkuli wo stawiznach Jitkowskeho kubła. Wot lěta 1952 bě wone we wobsydstwje Hansa-Alberta Granzina, wobhospodariło je je wjele lět Rakečanske ludowe kubło. Po přewróće statok Granzinej wróćo přenjesechu. Jeho dźowka Hella, wukubłana agrarna inženjerka, ratarski zawod dale wjedźeše, spočatnje jeno z drobnym skotom.
