Wulka Dubrawa (CS/SN). Zaručić porjadne zastaranje dźěći w pěstowarni a žłobiku je we Wulkej Dubrawje po wšěm zdaću wulki problem. Kaž wjesnjanosta Lutz Mörbe (njestronjan) na zašłym posedźenju gmejnskeje rady zdźěli, je přepytowanje hospodarskosće wunjesło, zo by ponowjenje „Dźěćaceje kupy“ we Wulkej Dubrawje znajmjeńša poł miliona eurow płaćiło. Z tym pak by dom jenož aktualnemu stawej předpisow wotpowědował. Trěbne bychu nimo toho dalše twarske naprawy byli. „To je sud bjez dna“, wjacori radźićeljo měnjachu a zwěsćichu, zo njeje zmysłapołne, tajku inwesticiju zwoprawdźić. Najpozdźišo za pjeć lět potom woprawdźe wulke problemy wočakuja. Předewšěm potrjeba za městnami w žłobiku přiběra. Tohodla rozmysluja radźićeljo wo nowotwarje dźěćaceho dnjo­weho přebywanišća. Dwělomne tohorunja je, hač dyrbja dźěći na jednym centralnym městnje zastarać abo je radšo na wjacore městna rozdźělić.