při twarnišću

pjatk, 29. septembera 2017
artikl hódnoćić
(0 )
Při nastawacym mosće nad Klóšterskej wodu w Pančicach-Kukowje su zornowcowu murju sadźili a betonowe rynki składli.  Foto: SN/Maćij Bulank Při nastawacym mosće nad Klóšterskej wodu w Pančicach-Kukowje su zornowcowu murju sadźili a betonowe rynki składli. Foto: SN/Maćij Bulank
Žiwy być
Wobchod wojuje wo přežiwjenje

Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.

Čas wulkeje hary na twarnišću wosrjedź Pančic-Kukowa, jako za tamniši nowy móst hłuboke dźěry točachu, je mjeztym dawno nimo. Hara je so tež za Elku Noack pominyła. Wona pak ma cyle hinaše starosće, a to hižo wot wšeho spočatka twarnišća. Elke Noack wjedźe w swójskim domje na Róžeńčanskim puću, dobre sto metrow wot twarnišća zdalene, kwětkowy wobchod. Mjeztym wobsteji tón 20 lět. Ale jubilej je sej wobchodnica zawěrno hinak předstajiła. „Twarnišćo so woprawdźe jara zlě wuskutkuje. Přerěznje mam jenož połojcu toho wobrota, kaž bě wón do toho, a tendenca je woteběraca“, Kukowčanka roz­łožuje. Po jeje słowach móže­ wona tónle wupad poł lěta kompensować, potom pak budźe ćežko.

Předewšěm starši ludźo, kotřiž špatnje běhaja, so twarnišća boja a do kwětkarnje hižo njepřińdu. A ze wsy sej něchtóžkuli­ přemysli, hač někotrych kwětkow dla wosom kilometrow wokołopuća na so bjerje. Hewak su sej časćišo raz wopytowarjo klóštra Marijineje hwězdy do wobchoda doběhnyli. Tež wottam nětko hižo nichtó njepřińdźe. „Móžeš rjec, zo wšitcy kupcy, kotřiž su hewak nimo přišli a pola mje załožili, dospołnje wotpadnu.“

Problematiske dale je, zo nakładne awta lědma hišće hač k wobchodej Elki Noack přijědu, dokelž móža jenož hišće z Kukowskeho směra přijěć, zawróćić pak so njemóža. Tak zetkawa so předawarka z nimi na někajkim parkowanišću zwonka wsy a kwětki a wšo dalše do swójskeho awta překładuje. To pak wo­znamjenja, zo je poskitk w jeje wob­chodźe za spontane nakupy wobmje­zowany. „Chce-li něchtó hnydom 30 róžow měć, je jemu dać njemóžu. Su-li pak dwaj dnjej do toho skazane, njeje to žadyn problem“, Elke Noack přilubja.

Kak přichod jeje wobchoda wupada, njemóže wona rjec. „Ja znajmjeńša so prócuju, zo móhła tule dale eksistować a so njepodam. Chcu pak na kupcow apelować, zo bychu tež w tymle ćežkim času swoje kwětki pola mje kupowali. Tak móhli woni pomhać, zo budu tež po twarnišću hišće tu“, přeje sej měji­ćelka kwětkarnje.

Při nastawacym mosće su minjene dny na zapadnym boku, potajkim do směra na Kamjenc, murju ze zornowcowych kamjenjow natwarili. Na tamnym boku Klóšterskeje wody nastachu fun­damenty za wulke betonowe rynki. Někotre z nich tam mjeztym steja. Dźěl puća wot mosta hač k Póstowemu pućej je nětko tak daloko hotowy, zo móhli tam jednotliwe asfaltowe woršty zatwarić. To pak so hakle stanje, hdyž budźe tež dalši wotrězk puća za to přihotowany, mje­nujcy wottud hač k přijězdej ke kupnicy Netto, zdźěli nowinska rěčnica krajneho zarjada za dróhotwar a wobchad Isabell Siebert. Tónle dźěl je wot dźensnišeho dospołnje zawrjeny. Hač dosrjedź oktobra ma dróha potom z asfaltom pokryta być. Marian Wjeńka

wozjewjene w: Lokalka

Galerija

dalši wobraz (1)
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND