Dokelž kredit za inwesticije do přebywarnjow za ćěkancow njetrjebaja, je jón wokrjesny sejmik Sprjewja-Nysa wčera cofnył. Nětko je w aprylu wobzamknjeny etat płaćiwy.

Baršć (HA/SN). Delnjołužiski wokrjes Sprjewja-Nysa ma skónčnje płaćiwy etat za lěto 2016, po kotrymž móže nětko dźěłać. Wokrjes dyrbješe za lětsa přidatny kredit 2,155 milionow eurow wzać, zo móhł předwidźane inwesticije za přebywarnje ćěkancow zapłaćić. Tak njeje braniborske ministerstwo za nutřkowne naležnosće budget schwalić chcyło, kotryž bě wokrjesny sejmik hižo w aprylu wobzamknył. Ministerstwo sej wot wokrjesa žadaše w swojim etaće dale lutować, zo by trěbnu sumu wurunał.

Na wčerawšim wurjadnym posedźenju měješe so wokrjesny sejmik hišće raz z problematiku zaběrać. Při tym zwěsćichu, zo planowany kredit lětsa scyła wjace trěbny njeje, wšako njeje ličba ćěkancow tak přiběrała, kaž běchu to hišće spočatk lěta wočakowali. Tomu su wokrjesni radźićeljo wšitkich frakcijow přihłosowali. Wokrjes móže pjenjezy z etata tuž tak wužiwać, kaž měješe to před­widźane.

Móžu so hišće derje dopomnić, kak sym jako dźěćo w 70tych lětach z Radworskeho dwórnišća z ćahom do Budyšina abo do Njeswačidła jěł. W někajkim róžku předawachu­ jězdźenki, štož běchu małe papjercowe wotrězki, kotrež wućišćachu z wulkeje ridrowaceje mašiny. Z woknow dołheje čakanskeje hale sym potom na kolije wudźěrał, kaž zo by wulki dyrdomdej na mnje čakał. Po telko lětach zaso raz tam zastupić bě wóndano wulce zajimawe, jako so z wobsedźerku zetkach. Štož je sej Jěwa-Marja Chěžcyna ze swojej swójbu a z partnerami tam předewzała, zasłuža sej najwjetši respekt. Nic jeno, zo su nětko zaso bydlenja wobydlene, tež z projekta inkluzije móhło něšto zajimaweho wurosć, štož by na dobro wšitkich było. Tohodla móžu wam jenož poručić: Wobhladajće sej Radworske dwórnišćo njedźelu na dnju wotewrjeneho pomnika.

Marian Wjeńka

Namołwjeja k demonstraciji

Budyšin. Pod hesłom „Prawa demokratija njetrjeba žane tydźenje demokratije“ chce skupina „Die Sachsen Demonstranten“ jutře we 18 hodź. w Budyšinje přećiwo ćěkancam protestować. Krajny předsyda sakskeje NPD chce tam rěčeć. Młodźinska organizacija Lěwicy Linksjugend´solid Budyšin a zwjazkarstwo Budyšin wostanje pisany namołwjatej k přećiwnej akciji, a to w 17 hodź. na Žitnych wikach.

Matthias Klemm nowy předsyda

Budyšin. Nowy předsyda zarjadniskeho wuběrka Budyskeje agentury za dźěło je Matthias Klemm. Gremij je amtěrowaceho regionalneho jednaćela DGB wuchodneje Sakskeje na swojim skonstituowacym posedźenju wčera na spočatku 13. hamtskeje doby wuzwolił. Mě­stopředsyda je Jörg Waniek, nawoda personalneho managementa Vattenfall Europe generation AG, kaž agentura za dźěło w sprjewinym měsće zdźěli.

Kontrolować, što ludźo tepja