Helaw při nalětnim wjedrje
311. Kulowska sezona norow z tysacami hosći wjeršk dožiwiła
Kulow (JK/SN). Bjezdwěla je róžowopóndźelny ćah wjeršk pjateho počasa tež w Kulowje. Miłe, nimale nalětnje wjedro je wčera znowa tysacy ludźi zbliska a zdaloka do póstniskeje metropole Łužicy přiwabiło. Hižo hodźinu do zahajenja swjedźenskeho ćaha pytachu sej hosćo a lubowarjo karnewala přijomne městno, zo móhli so wot najwšelakorišich wozow a skupin překwapić dać.
Policija (28.02.17)
Garaža so wotpaliła
Porchow. Z njeznatych přičin je so wčera w Porchowje garaža wotpaliła, tež w njej wotstajeny VW-transporter. 28 wobornikow z Porchowa, Hornjeho Wujězda a Panec móžeše rozpřestrěću płomjenjow na bydlenski dom zadźěwać. 42lětna wobydlerka poćerpje šok, a dyrbjachu ju ambulantnje zastarać. Kriminalna słužba pad přepytuje.
Wopity randalěrował
Dźěžnikecy. Zwady dla běchu swědcy policiju njedźelu do Dźěžnikec na pomoc wołali. Zastojnicy spytachu wopiteho 32lětneho změrować, tón pak jich nastajnosći křiwdźeše. Test wunjese 2,42 promilow alkohola w kreji, na čož jeho policija do fachoweje kliniki dowjeze.
Kisykał wurjadne žórło witamina C
Radwor (BHR/SN). Měnjateho wjedra dla so tuchwilu wjele ludźi z gripu bědźi. Jako škit je znate, zo trjeba čłowjek dosć witamina C. Njezadźiwa tuž, zo su citrusowe płody požadane. Zo hodźi so efekt tež z domoródnym wudźěłkom docpěć, zhonichu wopytowarjo zarjadowanja zašły pjatk w Radworskim „Słodeńku“. Křesćan Sćapan a swójbni běchu prosyli na zajimawy a słódny wječork, na kotrymž wjerćeše so wšitko kołowokoło kisykała. Sćapan skedźbni mjez druhim na stawizniski wuznam pojědźe jako prowiant na dołhich jězbach namórnikow jako škit přećiwo strašnej chorosći skorbut. Dźiwaše při tym na to, informacije w dobrej serbšćinje podać. Zdobom rozprawješe wo tym, zo je wjacore razy ze šulerjemi Radworskeje šule kisykał dźěłał.
Zbrašeni w „Jednoće“ hejsowali
Policija (27.02.17)
Woheń na přemysłownišću
Wojerecy. Na Narćanskim přemysłownišću je wčera wječor wokoło šesćich k wulkemu wohenjej dóšło. We wulkej hali palachu so tam składowane walčki stareje papjery. Zasadźene běchu wjacore wohnjowe wobory z wokoliny, kotrež móžachu płomjenja spěšnje zhašeć. Zranił so na zbožo nichtó njeje. Wo přičinach wohenja hač k redakciskemu kóncej žanežkuli dopóznaća njepředležachu. Policija pad přepytuje.
30. žonjace póstnicy swjećili
Z 89 pisanymi wobrazami telko kaž hišće ženje w Kulowje
Kulow (aha/SN). Po wichorojtych dnjach minjeny tydźeń wabješe sobotu poměrnje rjane wjedro tysacy ludźi do Kulowa, zo bychu sej wobhladali žonjacy póstniski ćah. Tón wšak je tam wot lěta 1988 z tradiciju. Bě to potajkim třicety raz, zo wuhotowachu žony a holcy do róžoweje póndźele tež swoje póstnicy.
Krótkopowěsće (27.02.17)
Dale požadane město filma
Zhorjelc. Na wšě dźesać mjezynarodnych kinowych filmow chcedźa lětsa w Zhorjelcu nahrawać. Tole je wyši měšćanosta Siegfried Deinege (njestronjan) připowědźił. Hižo w měrcu maja so dźěła za nowu filmowu wariantu „Kuzłarskeho wučomnika“ zahajić. Město chce so jako posłužbnik filmoweje branše dale wuwić, kaž Deinege rjekny.
Čaru skónčnje ponowja
Liberec. Železniska čara mjez Liberecom a Žitawu bědźi so hižo wjacore lěta z tři kilometry dołhim wotrězkom na teritoriju Pólskeje. Zanjechanosće dla móža tule ćahi jeno ze spěšnosću 30 km/h jězdźić. Pólska wulkopósłanča w Čěskej republice Grażyna Bernatowicz pak je nětko na zetkanju z hejtmanom Liberecskeho regiona Martinom Půtu přilubiła, zo pólski wotrězk ponowja.
Dynamo so jasnje přesadźił
125 000 eurow za projekty
Budyšin/Wojerecy/Drježdźany (SN/CoR). Ze spěchowanskeho programa „Integratiwne naprawy“ přewostaji sakske ministerstwo za runostajenje a integraciju třom projektam Budyskeho wokrjesa dohromady 125 000 eurow.
Spěchowanje dóstanu Budyski Kamjentny dom za wjetšinu a ćěkancow zwjazowacy projekt „Ćěkancow w Budyšinje integrować“, towarstwo Majak jako interkulturny centrum z poradźowanskim poskitkom, kotryž chce mjezykulturny a -nabožinski dialog spěchować, kaž tež Wojerowske regionalne dźěłanišćo za kubłanje, demokratiju a žiwjenske perspektiwy za projekt „Integracija požadarjow azyla we Wojerecach“, zdźěla ministerstwo za runostajenje a integraciju. „Demokratiske a integraciske dźěło w Sakskej je wjace hač trěbne. To su minjene tydźenje a měsacy pokazali. Ze spěchowanjom tworimy poskitki, kotrež tyja wšitkim wobydlerjam. Klima so polěpši, hdyž zesylnimy mjezyčłowjeski a interkulturny dialog kaž tež solidarnu mjezsobnosć“, podšmórny ministerka Petra Köpping (Lěwica).
Krótkopowěsće (24.02.17)
Mjenje mortwych na dróhach
Wiesbaden. Ličba smjertnych woporow při wobchadnych njezbožach je w Sakskej loni widźomnje woteběrała. Cyłkownje 162 ludźi je na dróze žiwjenje přisadźiło, zdźěla Zwjazkowy statistiski zarjad we Wiesbadenje. To je 30 mjenje hač lěta 2015. Po wšej Němskej zličichu loni 3 214 smjertnje znjezboženych.
Tysac kulturnych wjerškow
Podstupim. Hač w koncertnych halach, cyrkwjach abo pod hołym njebjom – w Braniborskej chcedźa lětsa wjace hač tysac koncertow, dźiwadłowych předstajenjow, operow, čitanjow, filmow a dalšich zarjadowanjow wotměć. Wone su wažny wobstatk kulturneho turizma a zesylnjeja regiony, potwjerdźi kulturna ministerka Martina Münch (SPD).
Planuja datajowy skład
Hrádek nad Nisou. Liberecska firma „CS spoje“ planuje na přemysłownišću pola Hrádeka nad Nisou natwarić najwjetši skład kompjuterowych datajow w sewjernej Čěskej. W kruće škitanym objekće móhli statne organy, předewzaćeljo kaž tež priwatnicy swoje dataje jako rezerwu składować. Projekt wusměrja so tež na zajimcow w Němskej, kaž čěske medije rozprawjeja.
Na swójbnu schadźowanku
Chrósćicy (SN). Rěčny centrum WITAJ a župa „Michał Hórnik“ přeprošatej dźěći, jich staršich, dźědow a wowki, na 7. swójbnu schadźowanku, kotraž budźe njedźelu, 5. měrca, w Chróšćanskej „Jednoće“. W 15 hodź. zahaji so popołdnjo z klankarjom Měrćinom Krawcom. Dale skića dźěćom paslenske a sportowe zaběry, krosnowanje a šminkowanje. W rjadownjach zakładneje šule změja čitanski stan, a zajimcy móža so wobdźělić na dźěłarničce wo strowym zežiwjenju a dalšich.
Město budźe zašlahane
Kulow (SN). Składnostnje Kulowskeho karnewala je nutřkowne město wot jutřišeho do přichodneje wutory, 28. februara, zašlahane. Tam bydlacy pak móža z awtom hač k swojim domskim jěć. Wobjězdka je wupisana a wopytowarjo karnewala měli awto po móžnosći zwonka města, kaž při Kobrec młynje, wotstajić.
Čita wo Lutheru
Budyšin (SN). Dr. Jens Buliš w swojej knize „Das Bistum in der Reformationszeit“ wopisuje, kotre nahlady Luther, jeho rowjency a w přećiwku k tomu posledni Mišnjanscy biskopja zastupowachu a kotrym wliwam woni podležachu. Wo tym čita awtor knihi 2. měrca, w 19.30 hodź. w Budyskej Smolerjec kniharni.
