Pančicy-Kukow (BW/SN). Kóždolětna zelowa njedźela, po dobrej tradiciji organizowana wo Křesćansko-socialneho kubłanskeho skutka (CSB), je wčera po informacijach zarjadowarja něhdźe 1 300 wopytowarjow do klóšterskeje zahrody w Pančicach-Kukowje přiwabiła. Wjace zajimcow hač tamne lěta bě tónraz z Radworja a Chrósćic kaž tež z wokolnych wsow, zo bychu swojeho bywšeho fararja a dźensnišeho Kamjeničanskeho propsta Clemensa Hrjehorja zetkali. Wón je hromadźe z wyšim krajnym cyrkwinskim radu Dietrichom Bauerom z Drježdźan ekumeniski nyšpor swjećił. W prědowanju zaběraše so Dietrich Bauer z rjanosću stwórby a z rjanosću čłowjeka, kotraž so w běhu jeho žiwjenja wuwiwa. Clemens Hrjehor na to jenož kwětki a zela we wołtarnišću pod hołym njebjom njepožohnowa, ale dźěše tohorunja přez rynki kemšerjow a jich zelowe kwěćelki pokrjepi. Na nutrnosći zaspěwachu wěriwi zhromadnje serbski kěrluš „Budź Kralowna nam witana“. Za angažement dźakowaše so sobudźěłaćerka CSB Sonja Hejdušcyna, kotraž tohorunja serbske próstwy čitaše, duchownymaj z dopomnjenku.