Z města k wjesnemu hrodej
Městno w dnjowym přebywanišću budźe dróše
Wulka Dubrawa (CK/SN). Wot 1. oktobra 2016 podróši so we Wulkodubrawskej gmejnje staršiski přinošk za městno w žłobiku na 210 eurow, w pěstowarni na 120 eurow a w horće na 70 eurow wob měsac. Tole je wjetšina gmejnskeje rady na swojim wčerawšim posedźenju wobzamknyła. Přirunujo z tamnymi gmejnami leži Wulka Dubrawa w srjedźnym polu, rěkaše ze zarjadnistwa. Wone wobkrući zwyšenje předewšěm z rozrosćenymi personalnymi wudawkami. Po słowach wjesnjanosty Lutza Mörby (njestronjan) pak při tym ani hišće wobličili njejsu, zo wot lěta 2017 hišće wjace personala trjebaja, dokelž so tak mjenowany hladanski kluč změni. Dohromady płaći zastaranje dźěći w dnjowych přebywanišćach Wulkeje Dubrawy a wokolnych wsow lětsa 950 000 eurow, štož sej Sakska, gmejna a starši dźěla. Nimo swojeho podźěla přewostaji gmejna přidatnje 100 000 eurow.
Skupinje zhromadnje rejwałoj
Brětnja (UH/SN). Z mnohimi wjerškami wotměchu minjeny kónc tydźenja w Brětni 40. němsko-serbski wjesny swjedźeń. Z wothłosom běchu wjesny předstejićer Lothar Kujaš a jeho sobuorganizatorojo jara spokojom. „Zastupjerjo wšitkich towarstwow wědźa, što ma so činić. A tak je nam wjeselo, tajke zarjadowanja organizować“, praji Kujaš, sam čłon drastoweje a rejwanskeje skupiny.
K zahajenju swjedźenja wobhladachu sej film wo wuwiću Brětnje, při čimž sej wopytowarjo wuwědomichu, što je minjene lětdźesatki we wsy nastało. Wjeršk bě njedźelny pisany program. Byrnjež chětro horco było, su dorosćeni kaž tež dorost Brětnjanskeje drastoweje a rejwanskeje skupiny w serbskej narodnej drasće wjesne tradicije a nałožki předstajili. Překwapjenka bě zhromadna reja Brětnjanskeho dorostoweho cyłka z Čornochołmčanskej dźěćacej rejwanskej skupinu.
Poskitk přesnadny był
Tež druhe přesadźowanje Worklečanskeho hosćenca bjez wuslědka
Budyšin (SN/MWj). Marlies Hüllowa je dale wobsedźerka Worklečanskeho hosćenca „Ke kupowemu hatej“. Po prěnim nanuzowanym přesadźowanju spočatk junija tež wčerawši druhi termin na Budyskim zarjadniskim sudnistwje žadyn wuslědk přinjesł njeje.
Suma a wuměnjenje, pod kotrymž móhł něchtó hosćenc kupić, běštej samsnej kaž spočatk junija. Objekt ma cyłkownu wobchadnu hódnotu 162 000 eurow. Znajmjeńša połojcu toho měł zajimc poskićić. Ludowa banka pak na kóncu rozsudźi, hač poskitk přiwozmje. Wona dźě je Worklečanskej korčmarce kredit 316 000 eurow dała.
Přesadźowanje wjeršk było
Budyšin (CS/SN). Tak horco bě posledni kónc tydźenja awgusta zrědka. To je so wot minjeneho pjatka hač do njedźele na swjedźeń při Budyskej Starej wodarni z tym wuskutkowało, zo je wodnjo wočiwidnje mjenje wopytowarjow hač tamne lěta přišło. Wječorne zarjadowanja porno tomu běchu derje wopytane, wobkrući wotnajer Stareje wodarnje Tilo Rosjat.
Stajny garant je na přikład Conni Wolf ze swojej kapału, kotraž staraše so pjatk wječor wo spodobnu hudźbu. Klankodźiwadźelnik Ekkehart Heute, kiž jako Wenzel Röhrscheidt wodźenja po měsće poskića, bě samsny wječor trochu přesłapjeny. Ani jenički hósć nochcyše so na wodźenju wobdźělić. Za to měješe wón na swojim dworje Pod Hrodom na klankodźiwadłowym swjedźenju stajnje dosć přihladowarjow. Tam bě tež chłódnišo a přijomnišo hač horjeka na Serbskim kěrchowje.
Policija (30.08.16)
Do jastwa dyrbjał
Bělšecy. Wobsadka ciwilneho policajskeho jězdźidła je zawčerawšim w Bělšecach wosobowe awto kontrolowała. Při tym so wukopa, zo přećiwo 44lětnemu sobujěducemu dwaj přikazaj zajeća předležitej. Dokelž bě wón wospjet drogowych deliktow dla napadnył, bu k wjacorym měsacam jastwa zasudźeny. Nastupił pak swoje chłostanje dotal njeje. Jako policisća jeho drastu a nachribjetnik kontrolowachu, namakachu wšelake nastroje za konsum drogow a snadne mnóstwo crystala. 44lětneho dowjezechu hnydom do jastwa.
Pony w měsće po puću
Kamjenc. Na Kamjenskej Pastwinej horje ćeknjeny pony je wčera rano na tamnišej Wuchodnej hasy po puću był. Hakle na Njeswačanskej dróze so poradźi štyrinohača popadnyć.
Překwapjacy přewrót swědka dla
Proces 20. nowembra 2015 rubjenych časnikow dla je na swojim druhim jednanskim dnju překwapjacy přewrót nazhonił. Swědk, kiž měješe wobskorženeho Wojciecha W. poprawom poćežować, je ze swojim wuprajenjom runje to nawopačne docpěł. Sćěh toho je, zo je W. nětko swobodny. Z Budyskeho sudnistwa njeje wón wróćo do Zhorjelskeho jastwa, ale domoj do Zgorzeleca jěł.
To bě sej Matthias T. hinak předstajił. Jeho wuprajenja mějachu wobskorženeho Wojciecha W. do jastwa přinjesć. Wšako bě wón jeho wony wječor, jako bu Budyski juwelěrowy a časnikarski wobchod na Serbskich hrjebjach nadpadnjeny, cyle jasnje widźał. T. bě z awta wobkedźbował, kak maskěrowanej wosobje z wobchoda spěchatej. Bjez wahanja Budyšan ze swojim VW-busom za nimaj jědźeše, najprjedy po dróze Před Šulerskimi wrotami a na to wusku a normalnje (ale nic tón wječor) ze zadźěwkom zawrjenu Tobołkowu horu horje hač k małemu parkowanišću.
Dohromady něhdźe 500 přiwisnikow twjerdeje hudźby wopyta minjenej ...
Krótkopowěsće (30.08.16)
38 milionow eurow za wokrjes
Budyšin. Wokrjes Budyšin dóstanje we wobłuku programa „Mosty do přichoda“ 38 milionow eurow. Wulki dźěl toho, cyłkownje 25 milionow eurow, je za města a gmejny. Zbytk dóstanje wokrjes, kotryž planuje mjez druhim twar noweje pěstowarnje na Budyskim Třělnišću. Za jednotliwe projekty maja komuny 10 procentow kóštow same přewzać.
Ličba turistow přiběra
Drježdźany/Choćebuz. Turizm na wuchodźe Němskeje zwjesela so nad dale a wjace wopytowarjemi. Tak je so ličba přenocowanjow w Błótach porno lońšemu wo 11,3 procenty stopnjowała. Tole wuchadźa z ličbow Zwjazkoweho statistiskeho zarjada. Mnozy turisća předewšěm z Berlina wužiwaja składnosć a so w Błótach wočerstwjeja.
Přewjeduja naprašowanje
Budyšin. Tele dny je Budyski wokrjes zahajił online-naprašowanje k temje: „Kak derje sće na wulku wodu přihotowani?“ Ze statistiku chce krajnoradny zarjad zwěsćić, hdźe su słabosće nastupajo swójske zawěsćenje. Tak chcedźa zjawnostne dźěło zaměrnje na rozswětlowanje, na lěpše komunikaciske puće a móžne strategije wusměrić.
Krótkopowěsće (29.08.16)
Přistup znowa rjadować
Drježdźany. Přistup k dalewjeducym šulam po 4. lětniku dyrbja w Sakskej po wšěm zdaću znowa rjadować. Tole wuchadźa z wobzamknjenja Drježdźanskeho zarjadniskeho sudnistwa. Sudnicy maja kubłanske poručenje za njedosahacy zakonski zakład. Skoržiłoj staj staršej holcy, kotraž njebě žadany přerězk 2,0 w předmjetach matematika, němčina a wěcna wučba docpěła.
Wo zmysle dawkow zhonili
Drježdźany. Sobudźěłaćerjo financneho zarjada su w běhu jednoho lěta na wjac hač 200 zarjadowanjach we wyšich šulach a gymnazijach šulerjow wo zmysle dawkow informowali. Tak dóstachu wuknjacy zrozumjenje za to, zo su dawki za žiwjenski zakład bytostne, hódnoćeše dźensa sakski financny minister Georg Unland (CDU) zaměr projekta.
Mjenje jězbow po Łobju
Bad Schandau. Trajneje suchoty dla móža łódźe jenož hišće we wobmjezowanej měrje po Łobju jězdźić. Tak sakske parne łódźnistwo zdźěla, zo su jězby mjez Drježdźanami a Bad Schandauwom redukowali. W Drježdźanach je pegel Łobja jenož hišće 70 centimetrow, normalnej stej dwaj metraj.
