Započinaja zahe planować

štwórtk, 19. januara 2017
artikl hódnoćić
(0 )

Za lětuše inwesticije trjeba Rakečanska gmejna sčasom schwaleny hospodarski plan. Zo wo tym hižo na januarskim posedźenju rěča, je za hornjołužiske komuny skerje njezwučene.

Rakecy (JK/SN). Njemało so Rakečanscy gmejnscy radźićeljo dźiwachu, zo steješe na dnjowym porjedźe jich wčerawšeho prěnjeho wuradźowanja w nowym lěće diskusija wo lětušim hospodarskim planje. Wjesnjanosta Sven Nowotny (CDU) wopodstatni zažny termin z wobšěrnymi lětušimi inwesticijemi, za kotrež je trěbny schwaleny hospodarski plan.

Tak maja lětsa planowane, ponowić sanitarne připrawy zakładneje šule, cyrkwinske naměsto kaž tež wobnowić a rozšěrić wobswětlenje na přemysłowej přestrjeni při Jitkowskim puću a ponowić Žorawjowy puć w Psowjach.

Naćisk lětušeho hospodarskeho plana předwidźi, zo njezměje gmejna jenož wurunany etat, ale zo na kóncu lěta samo snadny plus. Za inwesticije wužiwaja přewažnje spěchowanske srědki Sakskeje a Zwjazka kaž tež inwestiwne klučowe připokazanki wokrjesa, kotrež wšak su tónraz wo tójšto mjeńše hač w minjenych lětach. Přiwšěm chcedźa po słowach wjesnjanosty puć zaměrneje konsolidacije dale kročić a so tak financielnje skrućić. ­Dawkowe sadźby w Rakečanskej gmejnje njezwyša, hačrunjež změja za dźěćace přebywanišća 100 000 eurow wjace ­wudać hač loni. Jako pozitiwne za polěpšenje financnych poměrow Sven Nowotny posudźowaše, zo stej gmejnski zastaranski zawod kaž tež bydlenjotwarski zawod swój dołh čujomnje pomjeńšiłoj a stej na dobrym puću, solidnje hospodarić. Radźićeljo wobzamknychu, naćisk etata wot 13. do 21. februara zjawnje wupołožić. Hač do 2. měrca móža potom wobydlerjo dodawki abo korektury za­podać.

Dalša tema wčerawšeho posedźenja Rakečanskeje gmejnskeje rady bě wobzamknyć stejišćo gmejny k znowawu­žiwanju třoch třělenskich čarow třělcowskeho towarstwa na ležownosći něhdy­šeje Muny. Čary z NDRskeho časa chce towarstwo zaso wužiwać a dalšim zajimcam kaž tež hońtwjerjam a sportowym třělcam za zwučowanja přewostajić. Posudk ze stron fachowcow nima žane wobmyslenja k wužiwanju třělnišća nastupajo haru abo njeměr. Posudk bě třělcowske towarstwo w swójskim zajimje přewjesć dało. Na zakładźe posudka su radźićeljo wužiwanju třělnišća pod datymi wuměnjenjemi wčera přihłosowali.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND