Serbscy pohončojo sobu jěli

wutora, 23. meje 2017
artikl hódnoćić
(0 )
Mjez serbskimi pohončemi w Ramnowje bě Krystof Šołta z dźowku Christinu, na kotrejuž  wozu běchu tež serbscy muzikanća.  Foto: Betina Wenderothowa Mjez serbskimi pohončemi w Ramnowje bě Krystof Šołta z dźowku Christinu, na kotrejuž wozu běchu tež serbscy muzikanća. Foto: Betina Wenderothowa

Ramnow (BeW/SN). Při najrjeńšim wjedrje je so zawčerawšim 59 zapřahow wokoło Ramnowskeho barokoweho hrodu zhromadźiło. Mjez pohončemi bě tež tójšto­ serbskich mjezwočow. Tak měješe na přikład Roman Čórlich z Kanec hnydom štyri konje před wozom, Maćij Šefer z Hory bě jednopřežnje z mandźelskej a synom po puću, Krystof Šołta z Jaseńcy měješe na swojim nowym wozu hnydom­ črjódku muzikantow.

Po wujězdźe z hrodoweho dwora poda so cyła wulka skupina korejtow pod přikleskom publikuma na 30 kilometrow dołhu čaru. Cil bě město Biskopicy, kotrež swjeći swoje 790lětne wobstaće.

Rjanu krajinu na so skutkować dać a swój zapřah prezentować – to je zaměr tajkeje kołojězby. Zarjadowar, jěchanske towarstwo z Biskopic, kaž tež tamniše měšćanske zarjadnistwo a Ramnowski barokowy hród pak sebi tohorunja kóžde lěto nadawk za pohončow wumysleja. Lětsa dyrbjachu woni na Biskopičanskim torhošću figury namakać, kotrež maja zwisk z městom. Mjez druhim wočakowaše wobdźělnikow skupina ruskich wojakow jako pokazka na něhdyšu kasernu. Dale steještej rejwarce škričkoweje gardy na kromje puća a zapřaham kiwaštej, tež Napoleon bě so na torhošću schował.

Po spjelnjenju nadawka w Biskopicach dźěše dale po lěsach kołowokoło města do směra na Ramnow, hdźež dožiwichu přihladowarjo mytowanje. Nimo tójšto serbskich wopytowarjow w publikumje a na korejtach mějachu tam tež znatych serbskich hosći. Tak gratulowaše wodźerjam zapřahow mjez druhim zapósłanča Němskeho zwjazkoweho sejma Marja Michałkowa (CDU).

Zarjadowar Andreas Mikus dźakowaše so zhromadnje z mandźelskej Reginu wobdźělnikam za wšu prócu, kotruž běchu nałožili, zo bychu 20. Ramnowsku kołojězbu wobohaćili. Na tamnej stronje serbscy hercy na korejće Krystofa Šołty swójbje Mikus na kóncu hišće trójnu „Sławu“ zanjesechu. Wšako je so Ramnowska kołojězba tež mjez serbskimi pohončemi w zašłych dwaceći lětach k woblubowanemu terminej wuwiła.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND