Prawy poměr mjez hospodarskim wužiwanjom přirody a jeje zachowanjom steješe w srjedźišću dźěłarnički, kotraž je so minjene dny w Njebjelčanskej gmejnje wotměła.
Njebjelčicy (JK/SN). Na polu přirodoškita a noworjadowanja přirodnych žiwjenskich rumow su w Njebjelčanskej gmejnje minjeny čas z projektom „Njebjesa“ mnohe aktiwity wuwili. Při zwoprawdźenju projekta złožuja so na zasady permakultury. Nazhonity fachowc na tym polu je Njebjelčan Thomas Noack, geologa a aktiwny škitar přirody. Na jeho iniciatiwu a z podpěru Njebjelčanskeje gmejny je so wot minjeneho štwórtka hač do wčerawšeho wotměła dźěłarnička k zaměram a móžnosćam permakultury.
