Njeswačidło (JK/SN). Na poslednim lětušim posedźenju Njeswačanskeje gmejnskeje rady wčera wječor njedyrbjachu a nochcychu radźićeljo ničo wobzamknyć. Tola dwaj wulkej problemaj jich tola zaběraštej. Rozmyslowachu a wuradźowachu, hač měła gmejna samostatna wostać abo hač měła so zaměrowemu zwjazkej za wopłóčki „Delnja Sprjewja“ přizamknyć. Prašenje je, što je hladajo na wobhospodarjenje wopłóčkow za gmejnu spomóžniše. Z wotpowědnej namołwu běše so krajnoradny zarjad na gmejnu wobroćił. Měnjenja běchu wšelake: Na jednej stronje ma čłonstwo w zaměrowym zwjazku hladajo na wudawki za techniku a wobhospo­darjenje lěpšiny. Na tamnej stronje pak hroža wyše popłatki za wobydlerjow. W januaru ma gmejna w tutej naležnosći poradźowanski termin w Budyskim krajnoradnym zarjedźe, informowaše nawodnica twarskeho zarjada gmejny Katrin Ullrich. Tak dojednachu so radźićeljo na to, zo wuslědk wuradźowanjow wočaknu. Přiwšěm pak so dale z temu zaběraja, wšako chcedźa w přichodźe zamołwitosć za čisćernju wopłóčkow we Wětrowje přewzać..