Za hamtske wozjewjenja chcedźa so digitalnemu swětej wotewrić

Pančicy-Kukow (SN/MWj). W gmejnach zarjadniskeho zwjazka při Klóšterskej wodźe móhła so lětsa w lěću nowa forma hamtskich wozjewjenjow zawjesć. Wo tym je předsyda zarjadniskeho zwjazka Stefan Anders njedawno zastupjerjow pjeć přisłušnych gmejnow informował.

Tuchwilu rozšěrjeja gmejny Chrósćicy, Pančicy-Kukow, Njebjelčicy, Worklecy a Ralbicy-Róžant swoje wozjewjenja w hamtskej nowinje „Mitteilungsblatt“ a na tele wozjewjenja w informaciskich kašćikach w jednotliwych wsach skedźbnjeja. We wšitkich pjeć gmejnach je to we wustawkach wo zjawnych wozjewjenjach rjadowane. Gmejna Ralbicy-Róžant čini to přidatnje w swojej gmejnskej nowinje, kotraž měsačnje serbsce a němsce wuchadźa. Problematiske je, zo so „Mitteilungsblatt“ w někotrych wjeskach stajnje njeroznošuje, dokelž zdźěla dosć roznošowarjow nimaja. Nimo toho so wozjewjenja w nowinje wobstajnje podróšuja.