Krótkopowěsće (17.02.25)
Wuspěšna sezona skónčena
Budyšin. Z předstajenjom wječorneho ptačokwasneho programa „Lubosć na žołmach“ w Slepom je Serbski ludowy ansambl wčera nawječor swoju lětušu sezonu zakónčił. Na dohromady dźesać předstajenjach po cyłej Łužicy je na wšěch 1 500 přihladowarjow přichwatało. Wosom předstajenjow bě wupředatych. Tež program za dźěći „Tajny pakćik“ bu sobotu w Budyšinje posledni króć předstajeny.
Wjace dźěći schorje na gripu
Berlin. Ličba chutnje na influency schorjenych dźěći je wot spočatka lěta drastisce stupała. Spočatk februara su w němskich chorownjach pjeć króć wjace dźěći z ćežkej gripu lěkować dyrbjeli, hač spočatk januara. To zdźěli Němska towaršnosć za pediatrisku infekciologiju (DGPI). Wosebje potrjechene su dźěći w starobje pjeć do wosom lět.
Mjenje pjenjez za festiwal
Za dźěći a młodostnych
Stróža. Serbski šulski muzej w Stróži poskićuje w zymskich prózdninach stajnje wutoru, srjedu a štwórtk wot 9.30 do 14.30 hodź. zabawu za mjeńše a wjetše dźěći kaž tež młodostnych. Wutoru zaběraja so z picu za ptački a twarja picowanske stacije. Srjedu chcedźa z přirodnymi materialijemi paslić a nawuknu makramee. Štwórtk pak změšeja balsam za hubje a přećiwo kašelej. Za wobdźělenje zběraja zamołwići na wosobu wosom eurow. Přizjewjenja su pod telefoniskim čisłom 0176 40525934 móžne.
Jazz Maika Krahla dožiwić
Budyšin. W Budyskim Kamjentnym domje móžeće dźensa wječor w 20 hodź. wuběrneho jazzoweho trompetarja Maika Krahla a jeho hudźbny cyłk live dožiwić. Swoje jónkrótne kmanosće na instrumenće je sej rodźeny Budyšan mjez druhim při studiju pola sławnych wučerjow kaž trompetarja Tilla Brönnera abo Malte Burba zdobył. Zastupny lisćik při wječornej kasy płaći 24 eurow resp. zniženy 21 eurow.
Předstaja kandidatow
Na hładkej dróze do busa zrazył
Policija (14.02.25)
Pytaja za 15lětnej
Zhorjelc. Wot srjedy pyta Zhorjelska policija za 15lětnej Cora-Jolie L. Naposledk su ju swědkojo wčera popołdnju na Landeskronstraße w Zhorjelcu widźeli. Dotalne prócowanja policije, holcu namakać, wuspěšne byli njejsu. Tohodla proša zastojnicy ludnosć nětko wo pomoc. Cora-Jolie L. je něhdźe 1,60 metrow wulka, ma nawoči, šwižnu postawu a hładke, dołhe, swětło-ćěmne włosy. Naposledk měješe módry kabat a jeansy zwoblěkane a bě w běłych sportowych črijach. Pokiwy a informacije podajće prošu Zhorjelskemu policajskemu rewěrej pod telefoniskim čisłom 03581 6500 abo na kóždym druhim lokalnym rewěrje.
Zwyšenje kóštow zadźiwało
Nawoda nowotwara Ralbičanskeje pěstowarnje bilancu wudawkow podał
Róžant (JK/SN). Mnoho prašenjow měješe twarski nawoda nowotwara Ralbičanskeje pěstowarnje Reiner Dittmer (Kamjenski inženjerski běrow PWD) na wčerawšim posedźenju gmejnskeje rady gmejny Ralbicy-Róžant wotmołwić. Na dnjowym porjedźe steješe jeho rozprawa wo stawje a wuwiću twarskich wudawkow kaž tež wo aktualnej situaciji na twarnišću. Kaž hižo na wjacorych posedźenjach do toho wopodstatni Dittmer wočakowane zwyšenje twarskich płaćiznow a z tym wyše wudawki za gmejnu. Na zbožo pak su so wudawki w někotrych pozicijach znižili, dokelž njesu planowane dźěła w předwidźanym wobjimje trěbne byli. Doskónčny přehlad pak hakle změja, hdyž su wšitke firmy zakónčacu zličbowanku zapodali, a to tak spěšnje njebudźe.
Prózdninske poskitki požadane
Radwor/Smjerdźaca/Budyšin (SN/Žu). Dospołnje wuknihowane su prózdninske poskitki Serbskeho experiMINT campusa w Radworju. „Nimamy žane swobodne městna wjac“, wotmołwi projektowa koordinatorka Diana Mejnowa na naprašowanje SN. W technologiskim laborje přewjedu w druhim prózdninskim tydźenju pod nawodom dr. Andreja Měrćinka technologiskej kursaj za započatkarjow wot 3. do 5. lětnika a za pokročenych wot 6. lětnika. Wšitkich 20 městnow je wobsadźenych. Tež dnjowej poskitkaj za zymske slědźenje a eksperimentowanje za dźěći wot 1. lětnika, kotrejž wučer Michał Eiselt nawjeduje, stej wuknihowanej.
Tydźenja je Budyski měšćanosta dr. Robert Böhmer biskopa ...
Krótkopowěsće (14.02.25)
Přizjewjenska doba so skónči
Drježdźany. Towarstwa, zwjazki a institucije maja jenož hišće hač do 1. měrca chwile, so za Dźeń Saksow a z tym zwisowace spěchowanske srědki w projektnym běrowje w Sebnitzu přizjewić a požadać. Dźeń Saksow wotměje so lětsa wot 5. do 7. septembra. Po zakónčenju přizjewjenskeje doby njemóža organizatorojo hižo próstwy wo spěchowanje wobkedźbować. Formulary su na wotpowědnej internetnej stronje wozjewjene.
Pomocnikow nadpadnyli
Budyšin. W Budyšinje je zawčerawšim skupina šěsć wosobow wólbnych pomocnikow Lěwicy nadpadnyła. Pomocnicy běchu informaciske stejnišćo strony posłužowali. Po słowach Lěwicy běchu skućićeljo z prawicarskeje sceny. Policija nětko pad přepytuje. W běhu wólbneho boja je w Sakskej wospjet k nadpadam na wólbnych pomocnikow Lěwicy dóšło.
Němske firmy profituja
Nowe předsydstwo wolili
Nowa Wjeska. Nowowješćanske wjesne towarstwo je kónc januara na wólbnej zhromadźiznje Jana Hellnera jako noweho předsydu woliło.
Dubrjenske bahno a wuměłstwo
Kamjenc. Muzej zapadneje Łužicy w Kamjencu přeprošuje pjatk, 14. februara, w 19 hodź. wšitkich zajimcow na wotewrjenje wosebiteje wustajeńcy „TERRA INCOGNITA Dubrjenske bahno – wuměłstwo zetka přirodu“ w tamnišim elementariju. Wuměłski kružk z wokrjesa Hornje Błóta-Łužica je so do Dubrjenskeho bahna podał a so z krajinu wuměłsce rozestajał. Nastali su cyle rozdźělne wurazliwe twórby w najwšelakorišich barbach, strukturach a materialijach. Kuratorka Julija Baumbachowa je wuběrk twórbow, kotrež su wot lěta 2021 nastali, za wustajeńcu zestajała.
Serbska přirada wuzwolena
Budyšin (CS/SN). Dokelž běchu Budyscy měšćanscy radźićeljo hižo na swojim poslednim posedźenju před dwěmaj njedźelomaj konstituowanje přirady za serbske naležnosće wobrěčeli, běše jeje wobzamknjenje na wčerawšim posedźenju jenož hišće formalny akt. Hač na jednoho, kotryž běše so hłosa wzdał, wuprajichu so wšitcy radźićeljo za to.
Za štyri krute městna w přiradźe běchu poprawom pjeć kandidatow namjetowali. Na kóncu pak frakcija CDU swojeho přidatneho kandidata cofny. Přirada ma nětko sćěhowacych čłonow: Maika Baiera za frakciju AfD – jeho zastupnica je Nicole Scharpe, Daniela Měrćinka za frakciju CDU – jeho zastupjer je Heinrich Schleppers, Andreju Kubank za frakciju Socialny naslědny Budyšin (SNB) – jeje zastupjer je Jonas Löschau, a Dennyja Krause za frakciju Swobodnych wolerjow – jeho zastupjer je Mike Hauschild.
