Njebjelčicy (SN/MWj). Na swojim posedźenju je Njebjelčanska gmejnska rada srjedu rozsudźiła, wustupić z towarstwa IDOL, kotrež ma swoje sydło w partnerskej gmejnje Barleben. „Wob lěto smy ­dotal za swoje čłonstwo w towarstwje něhdźe 600 eurow płaćili. Hdyž nětko z towarstwa wustupimy, wobhladujemy to jako mały přinošk ke konsolidaciji swojich gmejnskich financow“, Njebjelčanski wjesnjanosta André Bulank (njestronjan) rozłoži. Nimo toho radźićeljo žadyn zmysł w tym njewidźa dlěje z čłonom w towarstwje być, dokelž gmejna žadyn konkretny wužitk z toho nima. Towarstwo spěchuje kontakty k wobydlerjam we wukraju. Njewotwisnje wot toho wobsteji dale partnerstwo mjez Pěskečanskej dobrowólnej wohnjowej woboru a tej w Barlebenje. Hakle lětsa dóstachu wottam kamory za drastu wobornikow.

Dale přihłosowachu radźićeljo dwěmaj halomaj, kotrejž chce Miłočanske agrarne předewzaće twarić. Při tym jedna so wo 76 króć 25 metrow wulku halu za skład žita. W dalšej 70 króć 16 metrow wulkej chcedźa ratarske mašiny wotstajić.