Hory (AK/SN). Na wuchodnym pobrjohu Parcowskeho jězora smě so přistawnišćo natwarić. Tule dobru powěsć sposrědkowa wjesnjanostka gmejny Halštrowska Hola Antje Gasterstädt wutoru na posedźenju gmejnskim radźićelam. „Spěchowanske srědki za to steja k dispoziciji. To je nam krajny rada Udo Witschas po jeho rozmołwje w hospodarskim ministerstwje zdźělił“, wona rjekny. LMBV móže projekt nětko planować.
Přistawnišćo ma něhdźe 7,5 milionow eurow płaćić. Sakska projekt ze 6,6 milionami eurow spěchuje. „Pisomne přizwolenje ma najpozdźišo w oktobru předležeć“, praji Antje Gasterstädt. Přiwšěm chcedźa hižo nětko wupisanja twarskich dźěłow přihotować. Žro připrawy ma być 170 metrow dołha mola z přistawnišćom za pasažěrsku łódź. Dale matej nastać před žołmami škitane městno za 112 hač do dźesać metrow dołhich sportowych čołmikow kaž tež skłonina, po kotrejž hodźa so čołmy na připowěšaku do wody pušćić, tak mjenowana slip-připrawa.
