Liza-Marija Cyžec w našej redakciji
Liza-Marija Cyžec je lětsa abituru złožiła a so potom za najlěpšu opciju rozsudźiła: něšto měsacow w redakciji Serbskich Nowin dźěłać. Tak móže so 19lětna Chróšćanka wšědny dźeń z nowymi temami serbskeho a druheho swěta zeznajomić. Wona njeje sej pak mysliła, zo budźe jej dźěło za redakciju serbskeho dźenika tak spodobać. Wšako druhdy hakle na rańšim posedźenju zhoniš, štož změješ popołdnju na starosći.
Přiwšěm profituje redakcija wot jeje kruteho zakótwjenja w serbskim kulturnym žiwjenju a wjele kontaktow. A Liza-Marija dóstawa nic jenož dohlad do pisanja, komentowanja, ale, kaž sama praji, „móžnosć zwučować, kritisce swoje měnjenje prajić.“
Team redakcije začuwa wona jako jara pomocliwy, tak dóstawa přeco hnydom wotmołwu na wšě prašenja. Zdobom so redaktorojo wězo wjesela, zo něhdyša šulerka wukonoweho kursa serbšćiny w dobrej maćeršćinje tež pod wulkim časowym ćišćom jara produktiwnje – z tekstami a fotami – k aktualnym wudaćam Serbskich Nowin přinošuje.
Krótkopowěsće (25.10.24)
Lěpša sirena w Chrósćicach
Chrósćicy. Na wčerawšim wječoru wobzamkny gmejnska rada w Chrósćicach nowu sirenu za wjes. 16 metrow wysoka sirena z wosom trubami a rěčacym warnowanjom płaći něhdźe 17 000 eurow. Kwalitatiwniša připrawa financuje so přewažnje ze srědkow swobodneho stata Sakskeje. Nowu sirenu nadeńdźeće potom na sćežoru wosrjedź wsy.
Nowu přijimarnju wotewrěli
Kamjenc. Po intensiwnej twarskej fazy su dźensa w Kamjenskej chorowni swj. Jana nowu centralnu wuchowansku přijimarnju přepodali. Mjeztym zo běchu sej dźensa předewšěm zastupjerjo z politiki a twarskeje branše nowu modernu nuzowu ambulancu wobhladali a medicinski team zeznali, je jutře wot 10 do 14 hodź. dźeń wotewrjenych duri za wšitkich zajimcow předwidźany. Wot nowembra chcedźa tam dźěłać započeć.
Pytaja wobydlerjow za wuběrki
Policija (24.10.24)
Wobšudźerjo dale aktiwni
Zhorjelc. Wot minjeneho tydźenja sem su wobšudźerjo, kotřiž so telefonisce jako policisća wudawaja, w kónčinje kołowokoło Slepoho, Wojerec a Radeberga wospjet aktiwni byli. Mjez druhim su 90lětnemu Slepjanej na tute wašnje dohromady 30 000 eurow pokradnyli (SN rozprawjachu). Wutoru su wobšudźerjo kołowokoło Zhorjelca wjacorych ludźi zazwonili. Dohromady šěsć potrjechenych pak reagowaše přikładnje a rozumnje. Wšitcy su hnydom Zhorjelski policajski rewěr informowali, tak njedyrbjachu žanu škodu wobskoržić.
Finisaža wustajeńcy w muzeju
Budyšin. Serbski muzej w Budyšinje přeprošuje njedźelu, 27. oktobra, w 15 hodź. na finisažu wosebiteje wustajeńcy „Twarski inženjer Eberhard Dučman. Mjez łužiskej drjewowej architekturu a industrielnym twarjenjom“, kotraž wěnowaše so žiwjenju a skutkowanju dotal hišće mało znatemu serbsko-němskemu twarskemu specialistej. Zhromadnje z kuratorku a dźowku inženjera dr. Betinu Kaunowej zhladuja muzejownicy w ramiku wjedźenja a přednoška hišće raz na Dučmanowe (1926–2005) wusahowace regionalne a nadregionalne wukony na polu twarstwa a pomnikoškita.
Čita z noweje kriminalki
Łaz. Spěchowanske towarstwo Zetkanišćo dom Zejlerja a Smolerja we Łazu přeprošuje wšitkich zajimcow wutrobnje na čitanje z knihi „Der Wassermann-Räuber. Ein Oberlausitzkrimi“. Serbski awtor Christian Schneider z Hrubjelčic je kriminalny roman hižo na lětušich Lipšćanskich knižnych wikach šěršemu publikumej předstajił. Nětko chce swoju twórbu tež zajimcam we Łužicy zbližić a to pjatk, 25. oktobra, we 18 hodź.
Herkuleskeule w Budyšinje
Wutworjenje wuběrkow rozjimali
Worklecy (SN). Na swojim wčerawšim posedźenju su Worklečanscy gmejnscy radźićeljo mjez druhim nowe dawkowe wustawki wobzamknyli. Z lěta 2023 předležaca wersija je so nětko na dobro wobydlerjow skorigowała. Wobzamknyła je gmejnska rada tež wobstaranje nowych drastow a noweho wuhotowanja za dobrowólnu wohnjowu woboru.
Dlěšu diskusiju mějachu radźićeljo wo temje „wutworjenje gmejnskich wuběrkow“. Wone znazornichu pro a kontra tuteje formy fachoweho poradźowanja w gmejnje a wotwažowachu alternatiwnu formu dźěłowych skupin. Doskónčny rozsud w tutym nastupanju pak wčera tworili njejsu. Prěni naćisk su přiwšěm wudźěłali. Tam namjetuja mjez druhim wutworjenje dźěłoweje skupiny za socialne a dźěłowy wuběrk twarstwa.
Rjadowniske zetkanje po 60 lětach
We wjesnej korčmičce w Pančicach su so minjeny pjatk wotchadnicy lětnika 1964 tamnišeje bywšeje wyšeje šule zešli, zo bychu 60lětny jubilej wotchada zhromadnje woswjećili.
Dźensa je drje nanajmjenje Serbam wědome, zo bu w Pančicach w lěće 1953 prěnja wjesna serbska wyša šula załožena, na kotrejž su šulerjo tež dźewjaty a dźesaty lětnik šulskeho kubłanja absolwowali. Tamne serbske wjesne šule tehdy jenož hač do wosmeho lětnika wuwučowachu. Łubja Pančanskeje šule běše so na internat wutwariła, w kotrymž so wjetšina šulerjow zaměstni. Šulske a internatne žiwjenje běše wot spočatka sem serbske.
Šulu wopytachu wosebje dźěći a młodostni z wokoliny, z teritorija župy Michał Hórnik. Dalši pochadźachu z wjeskow Rakecy, Njeswačidło, Bóšicy a Bukecy. Wosebje holcy su so po zakónčenju dźesateho lětnika na Serbski wučerski wustaw do Małeho Wjelkowa podali. Tam su potom powołanje wučerki abo pěstowarki nawuknyli. Hólcy rozsudźichu so hustohdy za techniske powołanja.
Wjeselo a tróšku zbóžnosće
Marlies Krannich ma wosebity žiwjenski nadawk: Pomha potrěbnym jěžam
Wojerecy (SiR/SN). Hižo 20 lět zasadźuje so Wojerowčanka Marlies Krannich za zwěrjata w nuzy. Wukubłana chorobna sotra, kotraž je pozdźišo tež studij diplomoweje inženjerki złožiła a w tutym powołanju dźěłała, je so nětko za čas wuměnka wosebje na pomoc za potrěbne jěže specializowała. We Wojerecach a wokolinje mjenuja ju tohodla mjeztym hižo „mać jěžikow“.
Serbska přirada so skonstituowała
Přirada za serbske naležnosće Wojerec je so wčera na historiskej žurli radnicy w starym měsće skonstituowała. Běše to prěnje posedźenje gremija po lětušich komunalnych wólbach.
Wojerecy (SN/mb). Stara a nowa předsydka serbskeje přirady je Evelin Graf, mnohostronsce čestnohamtsce angažowana předewzaćelka z wobchodom za modu wot lěta 1991. Serbska přirada eksistuje wot 1996, lěta zagmejnowanja wjesneju dźělow Ćisk a Čorny Chołmc do Wojerec, kotrymajž serbska kultura charakteristiski raz dawa. Prěnja předsydka přirady bu Gertrud Winzerowa, do toho wjesnjanostka a potom wjesna předstejićerka w Čornym Chołmcu. Wona je we Wojerecach tež čestnohamtske zastojnstwo zamołwiteje za serbske naležnosće wukonjała.
Krótkopowěsće (24.10.24)
Wo Serbach w Japanskej
Kumamoto. Na nazymskej konferency japanskich germanistow, kotraž je so njedawno w Kumamoto wotměła, su sympozij wo „widźomnych a njewidźomnych hranicach w srjedźnej Europje“ přewjedli. Prof. Dr. Goro Christoph Kimura z Uniwersity Sophia w Tokiju je wo dwurěčnosći we Łužicy přednošował. Wosebje kreatiwny wobchad z dwěmaj rěčomaj w Serbach je zajim zbudźił.
Fachowa konferenca SI
Choćebuz. Dźensa a jutře diskutuja wědomostnicy wšelakich fachowych směrow na fachowej konferency Serbskeho instituta (SI) w Choćebuzu wo kulturnej mnohotnosći a imaterielnym kulturnym herbstwje. Zjawny publikum je štwórtk wječor na přednošk wo temje „Potenciale imaterielneho kulturneho herbstwa w času strukturneje změny“ přeprošeny.
Němska chwalba Čěskej
Nowe wjednistwo zasadźili
Gmejnska rada we Łazu so wčera schadźowała
Łaz (AK/SN). Wohnjowa wobora Łazowskeje gmejny změje nowe wjednistwo. Na swojim wčerawšim posedźenju wobzamknychu gmejnscy radźićeljo jednohłósnje komisariske zasadźenje Alexandera Trella ze Złyčina(Litschen) jako nawodu, Steva Moritza z Hermanec (Hermsdorf/Spree) jako zastupjerja nawody kaž tež Marcela Noacka ze Šćeńcy (Steinitz) jako druheho městopředsydu na dwě lěće. Ingo Netzker, Marcel Noack a Torsten Schombel – čłonojo bywšeho nawodnistwa gmejnskeje wohnjoweje wobory – běchu swoje zastojnstwo złožili. Wjesnjanosta Thomas Leberecht (CDU) so jim na spočatku zhromadźizny wutrobnje za wukonjane dźěło dźakowaše.
