Hnujaca meditacija zahoriła
W cyrkwi Marije a Marty twórbu klasiskeje moderny předstajili
Budyšin (CRM/SN). Ewangelsko-lutherska wosada swj. Pětra běše wěriwych Smjertnu njedźelu wječor do Cyrkwje Marije a Marty na „Requiem“ Johna Ruttera a motety mištra baroka Johanna Sebastiana Bacha přeprosyła. „Z pomocu stajnje so wospjetowacymi tekstowymi a hudźbnymi wobrazami w předstajenych twórbach chcemy wo našim žiwjenju a wumrěću w Jězusu Chrystusu rozpominać“, pisachu w přiručce nyšpora. Liturgiski nawod je superintendent Tilmann Popp přewzał. Drježdźanska sopranistka Heidi Maria Taubert, wulke spěwne ćěleso Ewangelsko-lutherskeje kantornje kaž tež orchester Serbskeho ludoweho ansambla předstajichu sakralne twórby hłubokeho wobsaha. Cyłkowny hudźbny nawod je kantor Michael Vetter přewzał.
Žiwa ludowa kultura eksistuje
Wojerecy (KD/SN). Njeje prěni raz, zo su we Wojerowskej Kulturnej fabrice (Kufa) dokumentarny film režiserki Grit Lemke „Pola nas rěka wona Hanka“ pokazali. Na njedźelniše předstajenje běše filmowča wosobinsce přichwatała. Přewodźeli su ju dalši serbscy wuměłcy kaž tež protagonisća filma: Tworjaca wuměłča Hella Stoleccyc, čłon serbskeho sejma Tomaš Čornak z Njebjelčic, spěwotwórc Jacke Schwarz a Wolfgang Kraus, kotryž jako Krabat wustupuje.
Jacke Schwarz je z hudźbnikom Williom Stoyanom k zwukam gitary a mandoliny spěwajo w publikumje přihódnu atmosferu za film stworił. „Hudźbnikaj staj tež wčera na spěwnym swjedźenju Hoyschrecke w Kufa wustupiłoj a jeju serbske přinoški njejsu jenož aplaws žnjeli“, skedźbni Grit Lemke w swojim krótkim witanju před předstajenjom filma. Jedna z protagonistkow filma je juristka Anna z Delnjeje Łužicy, kotraž je so z katolskim serbskim mužom zmandźeliła a kotraž je hornjoserbšćinu nawuknyła – maćeršćinu w nowej swójbje a we wjesce, w Chrósćicach.
Skupina Astronawt dźěła tuchwilu na nowym hudźbnym kruchu. ...
Hornjołužiske kliniki z wulkim deficitom
Budyšin (SN/BŠe). Dohladowanska rada Hornjołužiskich klinikow je na swojim posedźenju spočatk septembra wo kónclětnym wotličenju 2023 wuradźowała a wotpowědne doporučenje sformulowała. Na posedźenju Budyskeho wokrjesneho sejmika přichodnu póndźelu zhonja tež radźićeljo wo aktualnym połoženju. Wšako je wokrjes towaršnik Hornjołužiskich klinikow, ke kotrymž słušatej Budyska a Biskopičanska chorownja. Zaměr towaršnosće je zaručenje medicinskeho zastaranja ludnosće. Nimo wukonow w chorownjach zapřija to tež nuzowe zastaranje wuchowanskeje słužby.
Krótkopowěsće (27.11.24)
Chcedźa wjace ćahow zasadźić
Budyšin. Wobchadny zaměrowy zwjazk (ZVON) je na swojej wčerawšej zhromadźiznje w Budyšinje wobzamknył, zo chce přidatne ćahi zasadźić. Naprašowanjow je mjenujcy dale a wjace, na čož chce ZVON reagować. Tak rozmysluje ZVON wo tym, mjez Biskopicami a Drježdźanami město dweju cyłkownje tři ćahi na hodźinu zasadźować a zwiski sobujěducym tak polěpšić.
Druhi raz „Oscara“ dobył
Motydło. Časnikarja Stefana Kudoke z Motydła (Weifa) su druhi raz z tak mjenowanym Oscar „Petite Aiguille Award“ časnikoweje industrije wuznamjenili. Z modelom „Kudoke 2“ je wón hižo 2019 wubědźowanje dobył. Nětko je wón z „KUDOKE 3 salmon“ druhi raz mjezynarodnu jury přeswědčił. Hižo srjedź nowembra je myto na wikach w Genfje přijał.
Šuli spěchowanje přizwolili
Swjedźeń towarstwow woswjećili
Płaćiznywostanu stabilne
Wojerecy (AK/SN). Płaćizny za milinu, płun, dalnoćopłotu, pitnu wodu a wopłóčki wostanu klětu we Wojerecach stabilne. Zwyšene wudawki přewozmu Wojerowske zastaranske zawody (VBH). Dołholětnym kupcam płaća samo bonus. To zdźěli jednaćel Wolf-Thomas Hendrich tele dny při předstajenju lětneje bilancy.
„Nam je so poradźiło, stupace wudawki wurunać. Wo tym swojich kupcow w decembru informujemy“, Hendrich rozłoži. Po jeho słowach so płaćizna za płun wot oktobra 2023 změniła njeje. „Chcemy, zo to tež klětu tak wostanje“, wón wuzběhnje. Přerězna domjacnosć płaći wob měsac něhdźe 300 eurow za płun. Štóž je połtřeća lěta kupc, dóstanje za płun sto eurow darjene. Za wosom lět a dlěje wučinja bonus samo 385 eurow. Tež płaćizny za milinu chcedźa Wojerowske zastaranske zawody klětu konstantne dźeržeć.
Kino w Kamjentnym domje
Budyšin. W Budyskim Kamjentnym domje pokazuja jutře, 27. nowembra, w 20 hodź. film „Treasure – Familie ist ein fremdes Land“. Předłoha za tragikomisku dramu je roman „Too Many Men“ awstralsko-ameriskeje awtorki Lily Brett, w kotrymž poda so nan ze swojej dźowku na zhromadne pućowanje po Pólskej, zo by z njej swoje židowske swójbne korjenje wotkrył.
Nóc krótkofilmow w bibliotece
Wojerecy. Přećeljo krótkofilma móža sej jutře, 27. nowembra, wot 18 hodź. we Wojerowskej měšćanskej bibliotece šěsć dobyćerskich filmow lětušeho srjedźoněmskeho filmoweho festiwala KURZSÜCHTIG z kategorijow animacija, dokumentarny film, fikcija a eksperimentalny film wobhladać. Filmotwórcy pochadźeja ze Sakskeje, Saksko-Anhaltskeje a z Durinskeje. Organizatorojo přeprošuja na zhromadnu diskusiju po předstajenju filmow. Zastup je darmotny.
Ze škitom datow so zaběrali
Radwor (SN). W kooperaciji z Budyskim Kamjentnym domom je Radworske towarstwo Dwórnišćo inkluzije minjeny pjatk na filmowy wječor z diskusiju wo škiće datow w dźensnišim digitalnym swěće přeprosyło. Režiser Marc Meillassoux je so w swojim dokumentarnym filmje „Nothing to hide“ wobšěrnje z tutej temu zaběrał. Dokumentacija dokładnje znazorni, kak poskićowarjo socialnych medijow a dalši akterojo w interneće hoberske mnóstwa datow wo wužiwarjach šmóratkow a kompjuterow hromadźa. Daty přeradźa jim na přikład chronologiju našich přebytkow w digitalnym swěće, z kotrychž móža potom naše wosobinske styki, zajimy, haj samo politiske nastajenja wučitać.
Pućuja zhromadnje po adwenće
Horjanska Bjesada wobdźěli so prěni raz na wjelelětnej tradiciji
Wojerecy (SiR/SN). „Bližimy so poněčim slěbornemu kwasej“, měni diakon Torsten Vogel, jako wuliči, kak dołho hižo žiwa adwentna protyka we Wojerecach wobsteji. Iniciator wopisuje ju jako dołhu tradiciju, kotraž akterow a wobdźělnikow runje tak zwjazuje kaž spušćomnych partnerow a najwšelakoriše městnosće. Mjeztym 22 lět žiwu adwentnu protyku we Wojerecach přewjeduja.
Kóžde lěto čaka na wopytowarjow hinaši program, kiž Torsten Vogel zestaja. W minjenych lětach stejachu knefle, durje, listy abo kaž loni stawizny wo klučikowej dźěrce w srjedźišću, lětsa pak su to dźiwy. Wjace iniciator hišće přeradźić nochce. Jasne pak hižo nětko je, zo so kóžde zarjadowanje při Janskej cyrkwi započina. Wottam podadźa so wobdźělnicy k Sinapiusec rěznistwu, najstaršemu w Sakskej. Tam we wukładnym woknje Boži narodk kóždy dźeń trochu wudospołnjeja. Nimo toho smě kóždy wječor jedne dźěćo jednu z figurow sobu domoj wzać a ju přez nóc hospodować, prjedy hač ju nazajtra zaso do wukładneho wokna staji.
