Krótkopowěsće (23.04.24)
Medicinska uniwersita we Łužicy
Choćebuz/Podstupim. Łužica dóstanje medicinsku uniwersitu. Wědomostna rada poradźowanskeho gremija Zwjazka a krajow je tomu wčera přihłosowała, zdźěli braniborske wědomostne ministerstwo. Uniwersita budźe lětsa 1. julija załožena. Prěni studowacy měli k zymskemu semestrej 2026/27 swój studij w Choćebuzu zahajić móc.
Jasnje mjenje twarnišćow
Kamjenc. Ličba twarskich dowolnosćow za bydlenja w Sakskej je dale a mjenje. Loni bě jich samo 26 procentow mjenje hač lěto do toho, zdźěli wčera krajny statistiski zarjad ze sydłom w Kamjencu. Najwjac twarskich próstwow, mjenujcy 382, je twarski zarjad w Lipsku dowolił. Po tym sćěhuje Lipšćanski wokrjes z 349 přizwolenjemi. W Drježdźanach su zarjady 219 twarskich dowolnosćow sposrědkowali.
CDU: Wólbny bój z wjelkom
Přednošuje wo molerju
Budyšin. Staroměšćanske towarstwo Budyšina přeprošuje jutře, wutoru, w 19 hodź. na přednošk Jurja Łušćanskeho wo žiwjenju a skutkowanju serbskeho molerja Jurja Hajny (1877–1952) do měšćanskeje biblioteki na Budyskej Hrodowej. Jurij Hajna słušeše 1923 k załožerjam Zjednoćenstwa serbskich wuměłcow a je po zakazu tež při znowazałoženju towarstwa 1948 přitomny był. Hajna běše pilny moler-wuměłc, kiž wšitke wuměłske pola molerstwa wobknježeše. Mištersku zdokonjanosć naby sej z mólbami krajinow Łužicy a Italskeje, hdźež wjacore lěta přebywaše a sej mandźelsku namaka. Znate su mnohe jeho zwobraznjenja wosobinow, mjez druhim Miny Witkojc a dekana Jakuba Skale.
Seniorojo škotuja
Njeswačidło. Přichodny škotowy turněr serbskich seniorow wotměje so jutře, wutoru, w Njeswačanskim Knježim hosćencu. Započatk budźe w 14 hodź. Kaž organizator Měrćin Nowak zdźěli, su nowačkojo rady witani. Dalši turněr přewjedu 28. meje w Kozarčanskim hosćencu.
Film pomha při wotkryću korjenjow
Wojerecy (SN/mb). Do zahajenja prezentacije filma „Pola nas rěka wona Hanka“ we Wojerecach dyrbjachu zarjadowarjo Kulturneje fabriki (Kufa) stólcy nosyć, doniž njeměješe kóždy zajimc swoje městno: Najwjetša žurla domu při hłownym torhošću stareho města běše z wjac hač 150 ludźimi přepjelnjena. Wojerowska filmowča Grit Lemkowa so nad wulkej rezonancu wjeseleše prajo: „To su Wojerecy!“ Kaž so po předstajenju w diskusiji z publikumom wukopa, běše wulka wjetšina ludźi bjez konkretnych wočakowanjow přichwatała a so překwapić dała. Jedyn muž z Rólan (Ruhland) pak sej film hižo třeći raz wobhlada a chce nětko delnjoserbšćinu wuknyć, wšako běše to prjedy rěč jeho domizny. Wosebje ludźo, kotřiž su sej wuwědomili, zo maja serbske korjenje, běchu hnući a čujachu so emocionalnje narěčani. Tež Serbja, kotřiž su so słowa jimali, film chwalachu.
Proša zaso na wiki přirody
Stróža. Zarjadnistwo biosferoweho rezerwata Hornjołužiska hola a haty a domizniske towarstwo Radiška přeprošujetej sobotu, 27. apryla, na 21. němsko-serbske nalětnje wiki přirody. Wone wotměja so wot 10 do 17 hodź. w Stróži pola Hućiny. Zahrodnistwa a štomownje poskićeja wulku ličbu symjenjow a rostlin. Lětuša wosebitosć drje budu kiwi-rostlinki z Kamjenicy. Dale chce něhdźe 80 wikowarjow swoje twory poručeć, mjez druhim hornčerske wudźěłki, přirodnu kosmetiku, drastu, marmeladu, korjeniny a wjele dalšeho. Nimo toho zastaraja wopytowarjow z wuběrom kulinariskich słódnosćow. Mjez druhim budu to rybjace a dźiwinowe wudźěłki, twarožk a poliwki.
Wustajeńca w Domje tysac hatow zaběra so z domjacymi amfibijemi. W 13 hodź. započnje so wodźenje podłu Hućinjanskich hatow. Při kóždolětnym kwisu móža wobdźělnicy te abo tamne myto dobyć.
Wulke připóznaće hudźbnikam
Kapała Horjany 30 lět z dujerskej hudźbu w tu- a wukraju po puću
Chrósćicy (MDź/SN). Prěni swěrni fanojo Horjanow su sej zašłu sobotu hižo krótko po pjećich do Chróšćanskeje „Jednoty“ dojěli a z tym dwě hodźinje do jubilejneho koncerta, na kotryž bě dujerska kapała Horjany składnostnje swojeho 30lětneho wobstaća prosyła. W hali běchu dołhe rynki blidow nastajene – něhdźe 450 hosći je sej zbliska a zdaloka dojěło. W nimale dwuhodźinskim programje předstajichu čłonki a čłonojo dujerskeje kapały mjez druhim tež serbski a němski medley, ale tež w tamnych słowjanskich rěčach štučki zaklinčachu. Kaž klarinetistka Sonja Hejdušcyna zdźěli, je kapała z wothłosom wustupa přewšo spokojom. „Je to wulke připóznaće, zo je telko ludźi našeje dujerskeje hudźby dla přijěło. To nas wězo spokoja, zo drje prawu hudźbu na prawym jewišću činimy. Bě tež tójšto hudźbnikow tamnych dujerskich kapałow na městnje, kiž so z našej hudźbu derje a fachowje wuznaja, tuž je to za nas wulke hódnoćenje a připóznaće.“ Tež dźěći a wnučki dujerskeje kapały so z krótkim programom předstajichu.
Přihotuja dožiwjenske tury
Wojerecy (AK/SN). Dožiwjensku turu Krabata a Šajatovića chcedźa přichodnje we Wojerecach, Čornym Chołmcu, Kulowje a Wulkich Ždźarach poskićeć. Dalša čara ma wšitke štyri městnosće Krabatoweho skutkowanja zwjazać, praji Belinda Grellmann z marketingoweho towarstwa Region za swójby HOY. Towarstwo je iniciator a organizator turow, profesionelna agentura projekt kreatiwnje přewodźa.
Drježdźanski hólči chór kapałnikow wobrubi wčera nyšpor w ...
Liškowski jězor hižo derje pjelnjeny
Krótkopowěsće (22.04.24)
Wjace prawicarskich nadpadow
Drježdźany. Dohromady 250 nadpadow z prawicarskim motiwom su regionalne poradźowarnje za wopory namocy loni w Sakskej registrowali. Porno předlětu je ličba z tym wo 21 procentow stupała – to pokazuje cyłkowna statistika, kotruž su pjatk w Drježdźanach wozjewili. Dohromady 380 ludźi je potrjechenych. Nimo městow Lipsk, Drježdźany a Kamjenica słuša nětko tež wokrjes Zhorjelc do ćežišćowych regionow namocy.
Wylem-Keł kandiduje za AfD
Wětošow. Čłon Serbskeho sejma Hanzo Wylem-Keł z Huštanja (Wüstenhain) kandiduje jako jedna z dweju wosobow za AfD při wólbach zhromadźizny měšćanskich zapósłancow we Wětošowje 9. junija. To wuchadźa z přehlada wo wólbnych namjetach stron a zjednoćenstwow, kotrymž je měšćanski wólbny wuběrk k wólbam přizwolił a je w hamtskim łopjenje wozjewił.
Zběrka kaligrafijow a poezije
Pišćele sej wobhladać
Budyšin. Z akciskim dnjom pod hesłom „Pišćele wotewrjene“ chcedźa jutře, sobotu, zajimcam pišćele bliže předstajić a jich za nje zahorić. Mjez druhim budu pišćele Budyskeje tachantskeje cyrkwje wot 14 do 17 hodź. přistupne. Dalše instrumenty móžeš w Šěrachowje, Žitawje a Wostrowcu dožiwić.
Wo powołanjach so wobhonić
Kamjenc. Powołanske wiki wotměja so jutře, sobotu, w Kamjenskej wyšej šuli „Při Halštrowskej łuce“. Wot 10 do 15 hodź. móža šulerki a šulerjo firmy a jich wukubłarjow zeznać, so wo powołanjach informować a tón abo tamny grat wuspytać. Wjace hač sto wustajerjow je so za zarjadowanje přizjewiło. Tež zajimowani fachowcy móža so na powołanskich wikach wo swobodnych dźěłowych městnach wobhonić.
Sól a žałby zhotowić
