Łaz (AK/SN). Na 4,5 hektarow wulkej płoninje Běłochołmčanskeho ratarskeho zawoda chcedźa fotowoltaikowu připrawu natwarić. Wjetšina Łazowskeje gmejnskeje rady je wčera naćiskej twarskeho plana přihłosowała. Tuž jón přichodne tydźenje zjawnje wupołoža. Předewzaći ze Šćeńcy a z badensko-württembergskeho Weikersheima budźetej připrawu zhotowjeć. W třećim abo štwórtym kwartalu 2025 ma wona milinu produkować.
Kaž planowar Stefan Pötzsch rozłoži, instaluja 12 900 modulow. Kóždy z nich změje wukon 450 wattow. „Tak dohromady něhdźe šěsć megawattow miliny produkujemy“, praji jednaćel Šćeńčanskeje firmy Ingo Netzker. Při tymle mnóstwje miliny liči Łazowska gmejna z dochodami něhdźe 12 000 eurow wob lěto. Nimo toho płaći Šćeńčanske předewzaće přemysłowy dawk, štož je tohorunja na dobro gmejny.
