Budyšin. W swojim 3. sinfoniskim koncerće w aktualnej sezonje tematizowaše Serbski ludowy ansambl Budyšin (SLA) njedawno tworjenje sławnych francoskich ekspresionistow w prěnjej połojcy 20. lětstotka. Jako jara hódnotnu wurywanku prezentowaše dirigentka Katharina Dickopf z wuběrnym solowym wiolinistom Ludwigom Blaserom a z orchestrom SLA „Rapsodie Lusacienne“ (Łužisku rapsodiju) Pariskeho komponista Marca Delmasa. Wot basnicy Marie de Vaux Phalipau na kulturu Łužiskich Serbow skedźbnjeny wubra wón w 1920tych lětach z „Pěsničkow Łužiskich Serbow“ J. A. Smolerja rjad melodijow a skomponowa elegantnu rapsodiju w stilu noweho myslenja. Tak stwori wón z motiwiki serbskich ludowych melodijow na hudźbnych barbach bohate a z tym skutkowne wuměłske wobrazy.

Wojerecy. Srjedu, 7. meje, wotměje so we wobłuku lětušich Wojerowskich hudźbnych swjedźenskich dnjow koncert serbskich spěwow. Wot 19.30 hodź. zahudźi na hrodźe čěska kapała Lidová muzika z Chrástu. Wona wustupi z programom z albumow „Za čěskimi horami“ a „Weddings&Funerals“. Regionalne spěwy, zwjetša ze Smolerjoweje zběrki we wobdźěłanjach Vojtěcha Koubi a Jaroslava Krčeka, předstaja čěscy hudźbnicy srjedu a štwórtk tež na třoch Wojerowskich ­šulach, mjenujcy na spěchowanskej šuli, na Zejlerjowej zakładnej šuli a na Lessingowym gymnaziju.

Wotewru wustajeńcu

Budyšin. František Vydra a jeho wuměłske tworjenje stejitej w srjedźišću wustajeńcy „Lužice – má láska“, kotruž wote­wru jutře, wutoru, w 17 hodź. w Budyskej Serbskej kulturnej informaciji. Wo hudźbne wobrubjenje postara so serbski spěwotwórc Bernd Pittkunings. Přehladka je hač do 31. julija přistupna.

Křižnu cyrkej w Radworju tuchwilu ponowjeja. Na informaciskim zarjadowanju zawčerawšim zhonichu zajimcy wo aktualnym stawje a planach. Něhdźe 20 zajimcow je přišło.