Posłuchaj lěkarja, prjed hač jeho trjebaš
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (70/ kónc).
Sydomdźesate wudaće Mediciny raz serbsce je zdobom poslednje. Hižo połtřeća lěta rozprawjam kóždy druhi tydźeń wo wšědnych a njewšědnych chorosćach. „Medicina raz serbsce“ rěka serial, kotrehož hłowny zaměr je, medicinsku wědu w serbskej rěči posrědkować. Sym sej wěsty, zo su swěrni čitarjo a swěrne čitarki mjeztym tójšto zajimawych zjawow a wurazow kołowokoło čłowječeho ćěła a strowoty nawuknyli. Nětko rozžohnuju so z poslednim artiklom, zhladowacym jara powšitkownje na medicinu.
„Koło časa“ wabi do hornjeho kraja
Chróstawa (AP/SN). Za Budyšinom, w Hornim kraju předstaja nětko w Chróstawje njewšědna wuměłska twórba stawizny Hornjeje Łužicy. We wsy, kotraž přisłuša městu Šěrachow-Korzym, dožiwichu zajimowani wobydlerjo a mnozy hosćo, mjez kotrymiž běchu wjacori Radworčenjo, zašłu sobotu swjatočne wotkryće „Koła časa“. To je kulojty, wjerćaty so relief Jürgena Spottki. Na nim jewja so wjacore serbske motiwy. Měšćanosta Sven Gabriel a iniciator předewzaća, serbski filmowc Reiner Nagel z mandźelskej Lysann běchu wuměłcej Jürgenej Spottke poboku, jako wón swoju originelnu nowotwórbu wotkry. Do toho bě něhdyši Radworski wjesnjanosta Wincenc Baberška lawdaciju na wuměłca přednjesł, kotryž wo sebi praji, zo je rjemjeslnik. Spottke je w mnohich wsach a městach serbskeje Łužicy swoje stopy zawostajił. Twórbu „Koło časa“ spěchuje sakski fond simul+ w zwisku z filmom wo rězbarju Jürgenu Spottke, kiž ma klětu zhotowjeny być. Filmowe studijo Reinera Nagela „ostwärts“ je podawk a postupowanje tworjenja za dokumentaciski film natočiło.
Kolesowanski puć ponowja
Zo njebychu korjenje šćežku wokoło Třižonjanskeho jězora kóncowali
Łaz (AK/SN). Štóž rady wokoło łužiskich jězorow kolesuje, smě so wjeselić. Łazowska gmejna chce puć wokoło Třižonjanskeho jězora wobšěrnje saněrować. Nalěwo a naprawo zatwarja škit před korjenjemi. Nimo toho cyły puć znowa asfaltuja. To je wjesnjanosta Thomas Leberecht (CDU) na zašłym posedźenju gmejnskeje rady připowědźił. Z LMBV jako nošerjom projekta su wotpowědne zrěčenje wotzamknyli. Dohromady inwestuja za to 1,3 miliony eurow. Z toho zapłaći gmejna 193 000 eurow, štož wučinja 15 procentow. Najwjetši dźěl wudawkow dóstanu z fondsa za hórnistwowe saněrowanje spěchowane.
Satkularce na zahrodce talentow
Smjerdźaca (aha/SN). Swoju zahrodku móžeš zawěrno na rozdźělne wašnje wužiwać. Zwjetša ludźo w njej čerstwu zeleninu plahuja. Tež kubłanske srjedźišćo LIPA w nošerstwje Serbskeho šulskeho towarstwa je sej před połtřeća lětom zahrodku zarjadowało. W njej pak njeplahuja buny abo morchej. Zaměr bě w zahrodce předstajić młode talenty. To je so tež njedźelu zaso raz poradźiło.
Jedne z mnohich mejemjetanjow minjeny kónc tydźenja bě w Jaworje. ...
Krótkopowěsće (27.05.25)
Wuběrk skonstituowany
Budyšin. Rewizijny wuběrk Domowiny – Zwjazka Łužiskich Serbow je so wčera zaso skonstituował. Za předsydu wuzwolichu Jana Klimana. Dalši čłonojo wuběrka su Gabriela Linakowa, Lubina Dučmanowa a Tadej Cyž. Rewizijny wuběrk je centralny kontrolny gremij Domowiny. Jeho nadawk wobsteji w tym, zarjadnistwo wosebje hladajo na porjadne wužiwanje spěchowanskich srědkow pruwować.
Pytaja najlěpšich DJjow
Choćebuz. We wobłuku wubědźowanja „laut@Lausitz“ přijimuje kulturny běrow Lausitziade wotnětka hač do 16. junija přinoški dorostowych DJjow z Łužicy. Zapodać móža zajimcy w starobje dźesać do 25 lět jednotliwe titule runje tak kaž cyłe sety. Dobyćerjam kiwa nimo dźěłarničkow wustup na openair-festiwalu Wilde Möhre, kotryž wotměje so wot 22. do 25. awgusta w Drjowku.
Wjace wučerjow za region
Tohodla je Kotołnja nětko zawrjena
Dźěžnikecy (UM/SN). W socialnych syćach a we wirtuelnym rumje je so powěsć spěšnje rozšěriła: Dźěžnikečanska Kotołnja je začinjena. Tež mnozy serbscy lubowarjo najwšelakorišich žanrow načasneje hudźby su tam hižo rjane koncerty dožiwili. Nětko su takrjec „přez nóc“, kaž w syćach rěka, zachody woblubowaneje koncertneje městnosće začinili. Wo pozadkach pak awtorojo jednotliwych přinoškow ničo rjec njemóžachu. W lokalnych medijach su minjene tydźenje hižo připowědźene zarjadowanje wotprajili. Andreas Greiner-Bär, jedyn z dweju jednaćelow Kulturneje produkcije Kotołnja tzwr, kaž zarjadnišćo oficialnje rěka, njedawno na naprašowanje jeničce zdźěli: „Žadyn komentar!“.
Policija (26.05.25)
Paduši po puću byli
Lipič. . Njeznaći su so mjez pjatkom popołdnju a sobotu připołdnju w Lipiču pola Minakała w Radworskej gmejnje na ležownosć na Hermanečanskej dróze zadobyli. Tam łamachu so do kólnje, z kotrejež spakosćichu wšelki grat, motorske piły a koleso. Kaž Zhorjelska policajska direkcija zdźěli, bě rubizna něhdźe 3 000 eurow hódna. Jako přiwołani policisća přijědźechu a so w bliskosći rozhladowachu, woni zwěsćichu, zo njeběchu so skućićeljo na jednu ležownosć wobmjezowali, ale zo běchu so tohorunja do susodneje zahrody zadobyli. Z njeje pokradnychu paduši trawusyčak za 150 eurow. Na pućiku mjez woběmaj ležownosćomaj namakachu zastojnicy motorsku piłu. Komu wona słuša, dotal zwěsćić njemóžachu. Móžno, zo běchu ju skućićeljo druhdźe pokradnyli. Policisća wšitko zapisachu, slědy zawěsćichu a chłostanske přizjewjenje dla wosebje ćežkeho padustwa wupisachu.
Seniorojo škotuja
Kozarcy. Na dalši škotowy turněr su serbscy seniorojo jutře, wutoru, do Kozarčanskeho hosćenca přeprošeni. Započatk budźe kaž stajnje w 14 hodź. Tež nowačkojo su wutrobnje witani. Přichodny turněr zarjaduja 24. junija w hosćencu w Njeswačidle.
Radźićeljo wuradźuja
Malešecy. Přichodne posedźenje Malešanskeje gmejnskeje rady wotměje so jutře, wutoru, w 19 hodź. w gratowni dobrowólneje wohnjoweje wobory w Budyšinku. Radźićeljo zaběraja so mjez druhim z twarskim planom za nowu kupnicu w Malešecach. Dalša tema budu twarske dźěła při pěstowarni w Budyšinku.
Drastowu stwičku zarjadowali
Spěchowanske srědki w najwšelakorišich wobłukach zasadźili
Kulow (AK/SN). Spěchowanske srědki sakskeho nutřkowneho ministerstwa za hajenje serbskeje rěče město Kulow zaměrnje zasadźuje. Tole podšmórny społnomócnjeny za serbske naležnosće a twarski zamołwity města Stephen Rachel. „Tule přiražku smy jako stoprocentne spěchowanje wotpowědnym nošerjam dale dać móhli. Za to smy jara dźakowni“, wón rozłoži.
Runja druhim komunam dósta Kulow loni 5 000 eurow komunalneje pawšale jako spěchowanje. Dźěl toho přewostajichu Witaj-skupinje pěstowarnje katolskeje wosady. Tam móžachu drastu serbskeho katolskeho kwasneho ćaha wudospołnić. Dale wobstarachu serbski pedagogiski material, knihi za předčitanje a dźěle za dźiwadło na blidźe, Stephen Rachel naliči. Tež Krabatowa zakładna šula móžeše někotre dźěle narodneje drasty zhotowić dać.
