Sportowy podawk kombinuja z němskim mišterstwom

Hamor (AK/SN). 28. mjezynarodna Łužiska rallye ADMV wotměje so lětsa na­zymu we wosebitej kombinaciji. Wona ma so jako finale němskich rallyjowych mišterstwow přewjesć. Tole zdźěli Wolfgang Rasper, organizatoriski nawoda ­Łužiskeje rallye. Wón je zdobom předsyda towarstwa Rallyjowy a wodosportowy klub Łužica we wobłuku ADMV. Finalny běh němskich rallyjowych mišterstwow ma so wot 30. oktobra hač do 1. no­wembra na šćerkowych čarach kołowokoło Hamora wotměć. „Dohromady wosom króć móžachmy našu Łužisku rallye hižo jako dźěl němskich rallyjowych mišterstwow přewjesć. Posledni raz bě to w lěće 2014“, organizatoriski nawoda rozłoži.