Nowa Wjes (UM/SN). Renaturěrowanje Sprjewje pola Noweje Wsy w Malešanskej gmejnje móže so zahajić. Sakski krajny zarjad rěčnych zawěrow (LTV) je nětko twarske dźěła wupisał.

W juniju 2023 je Sakska krajna direkcija trěbne planowe jednanje wotzamknyła. Přećiwo tomu pak bu skóržba zapodata, čehoždla je so naležnosć dlijiła. „Zaměr projekta je, Sprjewi dalokož móžno zaso přirodny wonkowny napohlad spožčić“, praji bywša prezidentka krajneje direkcije Regine Kraushaar. Nic jenož wšelake družiny rybow měli zaso po Sprjewi pućować móc. Tež cyły ekosystem ma lěpšu runowahu dóstać. A skónčnje ma tež čłowjek wot čwaka stroweje přirody profitować.

Sprjewja pola Noweje Wsy so zawěrno jako dźiwja a trochu mystiska krajina prezentuje. Tónle zaćišć pak myla někotre wočiwidnje wusłužene twarske připrawy. Mjez druhim su to tři spušćadła. Te pak jeno zdźěla wotstronja, nic dospołnje. Nimo toho připrawja skłoniny, po kotrychž móža ryby po rěce jednorje pućować.