Poslednja móžnosć za Ludowy dom
Běła Woda (AK/SN). W lětach 1928 hač do 1930 natwarjeny a dźensa jako kulturny pomnik zapisany Ludowy dom w Běłej Wodźe chcedźa zachować a wožiwić. Za saněrowanje měli so po móžnosći srědki z fondsa za strukturnu změnu wužiwać. Tole je srjedu wjetšina měšćanskeje rady na namjet frakcije AfD wobzamknyła. „To je poslednja šansa dom wuchować, prjedy hač wón rozpadnje“, podšmórny radźićel Ronny Hentschel. „Ludowy dom měł so z centrumom inowacije, kultury a zarjadnistwa stać.“
Kaž z namjeta wuchadźa, móhli stawnistwo, zarjadnistwo pohrjebnišćow, skład a archiw w twarjenju zaměstnić. Škleńčerski muzej móhł tam tohorunja swój domicil měć, wšako bě to něhdy Dom škleńčerjow, kiž běchu z pjenjezami dźěłarnikow natwarili. Dwě žurli w Ludowym domje byštej dosć městna za wuměłstwo a kulturu skićiłoj. Zarjadować hodźeli so kwasy, młodźinske swjećby, reje, kinowe předstajenja a wjele dalšeho. Tež gastronomija hodźała so zapřijeć. W lěću móhła so wonka snano piwowa zahroda zaměstnić, w namjeće frakcije AfD dale rěka.
Komornica Njeswačanskeje gmejny Liliana Wetzko poda so tele dny na ...
Krótkopowěsće (27.06.25)
Etat skónčnje wobzamknjeny
Drježdźany. Sakski krajny sejm je po dołhich diskusijach wčera wječor etat za lěće 2025 a 2026 wobzamknył. Załožba za serbski lud dóstanje lětsa a klětu dohromady 8,2 milionaj eurow. Cyłkownje chce swobodny stat we woběmaj lětomaj 50,2 miliardow eurow wudać. Nowe dołhi předwidźane njejsu. Zastupjerjo frakcijow AfD a BSW stej přećiwo etatej hłosowali.
Njewjedro zachadźało
Choćebuz. W Berlinje, Podstupimje a we Łužicy je wčera wječor sylne njewjedro zachadźało. W Choćebuzu su powalene štomy a hałuzy dróhi blokowali. Kaž tamniša regionalna wuchowanska straža zdźěli, so nichtó zranił njeje. Wohnjowa wobora a policija pak měještej z wjace hač 400 zasadźenjemi ruce połne dźěła. Po cyłej Braniborskej naličichu straže wjac hač 1 000 zasadźenjow.
Móšnju Romjanow namakali
Policija (26.06.25)
Traktor do murje zrazył
Přiwčicy. Z njewšědnym wobchadnym njezbožom dyrbješe so wutoru policija w Přiwćicach w Malešanskej gmejnje zaběrać. Tam bě 40lětny wodźer traktora typa Fendt něhdźe w 7.30 hodź. we wsy po puću. Najskerje strowotniskeho problema dla zajědźe wón ze swojim jězdźidłom na prawy bok jězdnje. Na to zrazy mašina do bydlenskeho domu. Šofer so na zbožo jenož snadnje zrani. Na domje nasta něhdźe 25 000 eurow škody, na traktorje pak na wšěch 150 000 eurow, kaž policija zdźěli.
W prózdninach chcedźa warić
Přeprošuja na wjesny rock
Němcy. Wjesny młodźinski klub w Němcach wuhotuje jutře a sobotu zaso wulku rockowu party. K tomu su sej jědnaće DJjow přeprosyli. Nimo toho čaka na wopytowarjow kapała Lost Eden, kotraž je mjez druhim za swoju show znata. Na swjedźenišću budźetej hnydom dwě jewišći natwarjenej. Na woběmaj dnjomaj smědźa wot 21 hač do 3 hodź. swjećić. Zastupny lisćik za pjatk płaći sydom eurow a za sobotu dwanaće eurow. Kombilisćik za wobaj dnjej płaći 16 eurow.
Rěčna hodźina zapósłanca
Budyšin. Rěčnu hodźinu za wobydlerjow změje zapósłanc Sakskeho krajneho sejma Marko Šiman (CDU) póndźelu, 30. junija, wot 10 do 13 hodź. w swojim Budyskim běrowje na Wysokej hasy (Hohengasse) 16. Zo njeby nichtó dołho čakać trjebał, njech sej zajimcy pod telefonowym čisłom 03591 45159 termin dojednaja.
Kühn dobył a nawjeduje
Serbšćinu wšědnje zapřijeja
WITAJ-pěstowarnja „Milenka“ do noweho domu přećehnje
Rowno (AK/SN). Nowa Rownjanska WITAJ-pěstowarnja „Milenka“ w nošerstwje Slepjanskeje gmejny budźe wot 7. julija na nowym městnje wosrjedź wsy. „Nowotwar je jasny signal za přichod našeje gmejny, za dźěći, staršich kaž tež za personal“, rjekny wjesnjanosta Jörg Funda (CDU) wutoru na dnju wotewrjenych duri. Wjele swójbow a dalšich zajimcow je sej nowotwar wobhladało. Pěstowarnja je 3,35 milionow eurow płaćiła. Z toho je sakske kultusowe ministerstwo nimale tři miliony eurow zapłaćiło. Energijowy koncern LEAG je 260 000 eurow přewostajił. Swójski podźěl Slepjanskeje gmejny we wobjimje 221 000 eurow je Swobodny stat Sakska přidał.
Baćony maja nětko rynku
Štóž je wčera w Malešecach, Miłoćicach, Němskich Pazlicach a druhdźe widźał ludźi na dźěłowym zběhadle při baćonjacych hnězdach, bě swědk kóždolětneje wosebiteje akcije. Spěchowanske towarstwo Njeswačanskeje přirodoškitneje stacije je młode baćony wopjeršćenjało.
Zetkawanja w skupinje pomhaja
Pod hesłom „Die Überlebenskünstler“ chcetej w Budyšinje skutkowacej angažowanej žonje socialny projekt zwoprawdźić. Před tydźenjomaj zahajištej akciju, zo byštej za to trěbne pjenjezy nazběrałoj.
Budyšin (SN/MiP). Projekt ma być skupinski poskitk za dźěći w starobje 6 do 11 lět w Budyskim wokrjesu, kotrež su direktnje abo indirektnje wot namocy w staršiskim domje potrjecheni. Fachowa poradźowarka za trawmatiske dožiwjenja Stefanie Kausche dźěła w Budyskej wotnožce sakskeho towarstwa Pomoc za wopory namocy. Socialna pedagogowka Boudine Mark pak skutkuje w interwenciskej poradźowarni přećiwo namocy w swójbje za dźěći a młodostnych we Wuchodnej Sakskej. Tuta je w nošerstwje Budyskeho towarstwa Dom za škit žonow.
Krótkopowěsće (26.06.25)
Móst měra chcedźa wupyšić
Budyšin. Budyski Móst měra ma so k wosebitym přiležnosćam wupyšić. Na Dnju Hornjeje Łužicy 21. awgusta maja so módro-žołte banćiki přičinić a na Dnju němskeje jednoty 3. oktobra budu tole čorno-čerwjeno-złote banty. Namjet je frakcija AfD wčera na posedźenju Budyskeje měšćanskeje rady zapodała. Wjetšina zapósłancow je přihłosowała. Serbske barby pak so jewić njebudu.
Nowa nawodnica muzeja
Wojerecy. Peg Koedel je nowa nawodnica Wojerowskeho Konrada Zusoweho kompjuteroweho muzeja ZCOM. W Rostocku rodźena je „nazhonita ekspertka za digitalne archiwowanje a digitalne kubłanje“, w zdźělence institucije rěka. Koedel chce wuspěšne dźěło swojeje předchadnicy Andreje Pittmann dale wjesć a muzej jako inowatiwne wuknjenske a dožiwjenske městno za wšitke generacije sylnić.
„Chlěb republiki“ napjekli
