Pytanje za korjenjemi abo přidatne lěto na gymnaziju?
Čehodla dwójce do 10. lětnika chodźić a 600 kilometrow wot doma zdalena bydlić? Leńka Meyerec je to zašłe šulske lěto činiła. Ma serbsku mać a němskeho nana a bydli z bratromaj a sotru w Münsteru.
Minjene šulske lěto pak je w Budyšinje w internaće přebywała a na Serbskim gymnaziju do šule chodźiła. Zajimawy bě za nju rozdźěl mjez šulomaj. Nimo koncepta šule bě wězo rěč rozsudna. Leńka je doma wot maćerje serbsce nawuknyła. Na prózdninskich kursach rěčneho centruma WITAJ je so tohorunja wobdźěliła, ale tutu „domjacu“ serbšćinu nětko w šuli nałožować, to bě hišće raz wulki krok. Serbsce pisać bě za nju tola wužadanje, runje tak kaž wurazy wosebje w přirodowědnych předmjetach. Ale Leńka je to wulkotnje zmištrowała.
Spušćomnje swoje nadawki spjelniła
Policija (03.07.25)
Bjez zawěsćenja jězdźił
Budyšin. Zo trjebaš za jězdźenje z e-scooterom winowatostne zawěsćenje, wě nětko tež 63lětny muž w Budyšinje. Jeho zadźerža policija póndźelu wječor na Drježdźanskej dróze w Budyšinje. Płaćiwe zawěsćenje muž njeměješe. Tohodla jemu zastojnicy dalšu jězbu zakazachu. Nimo toho změje 63lětny pjenježnu pokutu płaćić.
Starši dyrbja wjace płaćić
Rakečanska gmejna přinoški za pěstowarnju zwyšiła
Rakecy (JK/SN). Cyłu kopicu je Rakečanska gmejnska rada na swojim poslednim posedźenju do lětnjeje přestawki wobzamknyła. Zdźěla běchu to tež njelube, za mnohich wobydlerjow z dźěćimi samo bolostne, ale přiwšěm trěbne rozsudy.
Po wjacorych lětach, w kotrychž su so zwyšenju popłatka za dźěćace dnjowe přebywanišća wuwinyli, njemóžachu radźićeljo nětko wjace trěbny rozsud wobeńć. Tak dojednachu so po dosć kontrowersnej diskusiji na to, zo popłatk za žłobikowe městno wot 255 na 295 eurow, za pěstowarske městno wot 140 na 165 eurow a za městno w horće wot 80 na 90 eurow zwyša. To su zdźěla jara čućiwe zwyšenja, ale kaž wjesnjanosta Swen Nowotny (CDU) rjekny, nic najwyše. W někotrych susodnych gmejnach su popłatki hišće wyše, zdźěla hižo wjace hač 300 eurow. To pak nima Rakečanske nowe popłatki złahodźić. Dokelž statnu podpěru za wobhospodarjenje dźěćacych dnjowych přebywanišćow w přichodnych lětach zniža, chcedźa wjesnjanosća Budyskeho wokrjesa zhromadnje wo tym wuradźować, kak so naprawam sakskeho knježerstwa wobaraja.
Z nawočemi hinaši swět dožiwjeja
Při temperaturach daloko nad 30 stopnjemi je so wčera kóždy na ...
Alarm něhdy na fanfarje trubili
Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (2)
W lěće 1954 zetka so w znatym a mjeztym zawrjenym Smječkečanskim hosćencu „Bücke dich“ horstka muži na załožensku zhromadźiznu wohnjoweje wobory. Jako swój nadawk sej předewzachu, zo spěšnu, efektiwnu a njekomplikowanu pomoc potrěbnym w kóždej situaciji zaruča. Credo muži bě, zo jako wobornicy stajnje pomhaja, hdyž jich trjebaja. Při tym njehladaja na mjeno a powołanje potrjecheneho a so za mzdu njeprašeja. Mjez přitomnymi bě tehdy tež Rolf Jacławk. Přišoł bě jenož, kaž sam praji, dokelž bě wćipny – chcyše jenož připosłuchać. Njeje z tym ličił zo jeho za nawodu wobory wuzwola. Přiwšěm tónle nadawk přewza.
Krótkopowěsće (03.07.25)
Najebać horcotu putnikowali
Róžant. Cyłkownje dźewjeć procesionow serbskich katolskich wosadow je so wčera na dnju Marije wopytanja najebać wulkeje horcoty na puć do Róžanta napodało. Horcoty dla su so mjez druhim družki Radworskemu a Baćonskemu procesionej hakle w Sernjanach přidružili. Hłowny celebrant Božeje mšě be Radworski farar Beno Jakubaš. Chór Meja je Božu mšu hudźbnje wobrubił.
Siegemund překwapjace dobyła
London. Němska tenisowa profihrajerka Laura Siegemund je prěni raz w swojej dołhej karjerje třeće koło we Wimbledonje docpěła. 37lětna přewiny Kanadźanku Leyluh Fernandez 2:0. W třećim kole hraje wona přećiwo Madison Keys z USA. Eva Lys zwrěšći porno tomu přećiwo Čechowce Lindźe Noskovej 1:2.
Sturm so nawróći
Policija (02.07.25)
Spěšnosć kontrolowali
Kulow. Dlěje hač štyri hodźiny su policisća póndźelu dopołdnja spěšnosć na statnej dróze S 95 pola Kulowa kontrolowali. W potrjechenym wotrězku blisko Kulowskeje wodočisćernje směš 50 km/h jěć. 359 jězdźidłow su měrili, 82 z nich bě přespěšnych. 42 šoferow dyrbi warnowanski pjenjez zapłaćić, 40 pak dóstanje list z informaciju wo pokuće. Njesławny rekord docpě Mercedes Vito z Budyskim čisłom, pola kotrehož naměrichu 98 km/h. Za to dóstanje šofer dwaj dypkaj w Flensburgu. Dale ma 400 eurow pokuty płaćić a měsac nóžkować.
Wotpadki do lěsa ćisnyli
Sprjewiny Doł. Njeznaći su w minjenym času swoje wotpadki w lěsu pola Sprjewineho Doła wotbyli. Kaž policija zdźěli, namakachu tam tele dny wjacore drjewjane łaty a asbestowe platy. Kriminalna słužba Wojerowskeho policajskeho rewěra pad dale přepytuje.
Premjera na Glawšec dworje
Róžant. Wosebite knižne popołdnjo budźe jutře, štwórtk, w 17 hodź. na Glawšec dworje w Róžeńće. Tam změje kniha Svena Nordqvista „Kak je Findus k Petterssonej přišoł“, wušła w Ludowym nakładnistwje Domowina, premjeru. Kniha wo tym powěda, zo bydleše Pettersson sam w swojej chěžce a zo měješe jenož swoje kokoše. Rjaneho dnja dari jemu susodka karton z napisom „Findus. Zeleny hroch“. W nim pak njebě hroch, ale kocork. To bě spočatk přećelstwa. Štóž chce wědźeć, kak stawizna pokročuje, njech přińdźe jutře popołdnju do Róžanta.
Mokrica zaso rosće
