Łaz (AK/SN). Hišće njecyły měsac wostanje statna dróha S 108 přez Łaz dospołnje zawrjena. Nic jenož šoferojo dyrbja hišće tak dołho sćerpni być. Tež Łazowscy předewzaćeljo přiběrajcy zawrjeneje dróhi dla skorža. Jedyn z nich je hosćencar Maik Herzog, kotryž wjedźe z mandźelskej a sydom přistajenymi „Stare dwórnišćo“. „Tydźenski wobrot je jenož hišće poł tak wulki. Je ćežko wšitkich přistajenych dźeržeć“, hosćencar rozłoži.
Potrjecheny je dale hosćenc „Pyramida“ při Třižonjanskim jězoru. „Jenož hišće někotři kolesowarjo přijědu. Naše terminy zarjadowanjow, kwasy a swójbne swjedźenje nam dochody zaručeja“, powěda nawoda hosćenca André Franz. Po jeho słowach by hižo pomhało, hdyž by lěpje woznamjenjene było, wot hdźe je dróha woprawdźe zawrjena.
